កីឡាអូឡាំពិកព្យុងឆាងបិទបញ្ចប់ ក្រោមវត្តមានគណៈប្រតិភូកូរ៉េខាងជើង
ចុះផ្សាយនៅថ្ងៃ៖
ស្តាប់ - ០៥:០៥
កីឡាអូឡាំពិករដូវរងារនៅព្យុងឆាង កូរ៉េខាងត្បូង បិទបញ្ចប់ យប់ថ្ងៃអាទិត្យនេះ ដោយមានវត្តមានរបស់គណៈប្រតិភូកូរ៉េខាងជើង ដ៏សំខាន់នោះ គឺមេដឹកនាំយោធាជាន់ខ្ពស់កូរ៉េខាងជើង លោក Kim Yong-chol។ ទន្ទឹមនេះ ក៏មានវត្តមានលោកស្រី អ៊ីវ៉ាន់កា ត្រាំ តំណាងប្រតិភូអាមេរិកដែរ។ ដោយឡែក ថ្ងៃបិទបញ្ចប់កីឡាអូឡាំពិកនេះ គ្មានវត្តមានទង់ជាតិរុស្ស៊ីទេ។
គ្មានទង់ជាតិរុស្ស៊ី ព្រោះកីឡាករជនជាតិរុស្ស៊ី២នាក់ បានប្រើថ្នាំលើកកម្លាំង
គណៈកម្មាធិការអន្តរជាតិអូឡាំពិកបានសម្រេចបែបនេះ ដោយសារតែរកឃើញថា មានកីឡាកររុស្ស៊ី២នាក់ បានប្រើថ្នាំលើកកម្លាំង ក្នុងការប្រកួតនៅព្យុងឆាង ដែលនេះជាការបំពានធ្ងន់ធ្ងរលើបទបញ្ជា។ គួររំលឹកថា រឿងអាស្រូវថ្នាំលើកកម្លាំងកីឡាកររុស្ស៊ីនេះ មានច្រើនដងហើយ ពិសេសកើតមានកាលពីឆ្នាំ២០១៤ ក្នុងពេលប្រកួតកីឡាអូឡាំពិករដូវរងារ Sotchiតែម្តង។
ដោយសារបញ្ហានេះ គណៈកម្មកាធិការអូឡាំពិក អនុញ្ញាតអោយកីឡាកររុស្ស៊ីតែ១៦៨នាក់ប៉ុណ្ណោះ ដែលគេគិតថា ស្អាតស្អំមិនប្រើថ្នាំកម្លាំង អោយពួកគេមកចូលរួមការប្រកួតនៅកូរ៉េខាងត្បូងឆ្នាំ២០១៨នេះ។ ដើមខែធ្នូ ឆ្នាំ២០១៧កន្លងទៅ គណៈកម្មាធិការសម្រេចថា ប្រហែលជាអាចអោយរុស្ស៊ីបង្ហាញទង់ជាតិខ្លួនដែរ នៅថ្ងៃបិទបញ្ចប់កីឡាអូឡាំពិក ថ្ងៃអាទិត្យនេះ នៅកូរ៉េខាងត្បូង។ ប៉ុន្តែ ដោយសារតែគេរកឃើញថា កីឡាកររុស្ស៊ី២នាក់បានប្រើថ្នាំកម្លាំង ដូច្នេះ ការព្យួរទង់ជាតិរុស្ស៊ី នៅតែរក្សាទុកដដែល។
កីឡាអូឡាំពិកព្យុងឆាង ឆ្នាំ២០១៨ ត្រូវបានប្រសិទ្ធនាមថា ជា”កីឡាសន្តិភាព"
បូកសរុបព្រឹត្តការណ៍ទៅ គឺគ្មានហេតុការណ៍ប៉ះទង្គិចធំដុំអ្វីកើតឡើងទេ ក្នុងអំឡុងពេលប្រកួតកីឡាអូឡាំ។ សន្តិភាពនេះ គឺសំដៅលើការស្រុះស្រួលផ្សះផ្សាគ្នារវាងប្រទេសបងប្អូនកូរ៉េទាំង២នោះហើយ ព្រោះតែមានវត្តមានកីឡាករ និងគណៈប្រតិភូកូរ៉េខាងជើង ក្នុងទឹកដីកូរ៉េខាងត្បូងនេះឯង។ នេះជាទង្វើផ្សះផ្សាគួរកត់សម្គាល់ ព្រោះថា មុននេះ បងប្អូនកូរ៉េទាំង២តានតឹងនឹងគ្នាគួរសមដែរ ដោយសារតែការគំរាមនុយក្លេអ៊ែររបស់កូរ៉េខាងជើង។ ការផ្សះផ្សាគួរកត់សម្គាល់នេះ ជាក់ស្តែងយើងឃើញថា កីឡាការនីកូរ៉េល្បែងHockey ជនជាតិកូរ៉េខាងត្បូងនិងខាងជើង មានវត្តមានក្នុងក្រុមប្រកួតតែមួយ។ ប្អូនស្រីលោកគឹម ជុងអ៊ុន គឺលោកស្រីគឺម យ៉ូចុង ក៏បានមកចូលរួមសម្ពោធកីឡាព្យុងឆាងនេះទៀត ហើយថែមទាំងអញ្ជើញប្រធានាធិបតីកូរ៉េខាងត្បូង លោកមូន ចែអ៊ីន អោយទៅចូលរួមជំនួបកំពូលនៅក្រុងព្យុងយ៉ាងទៀត។ លើសពីនេះ ក៏មានវត្តមានក្រុមរាំនារីកូរ៉េខាងជើង ក្នុងអំឡុងពេលប្រកួត២សប្តាហ៍ជាងនេះដែរ។
ហើយថ្ងៃបិទបញ្ចប់កីឡាអូឡាំពិក ថ្ងៃអាទិត្យនេះ ក៏មានវត្តមានគណៈប្រតិភូសំខាន់ៗដូចជាមេដឹកនាំយោធាជាន់ខ្ពស់កូរ៉េខាងជើង Kim Yong-chol មានលោក Choe Kang ជាអ្នកទទួលខុសត្រូវជាន់ខ្ពស់មួយរូប ខាងកិច្ចការអាមេរិក។ លោក Kang បម្រើការនៅក្រសួងការបរទេសកូរ៉េខាងជើង។ វត្តមានលោកត្រូវបានគេមើលឃើញថា កូរ៉េខាងជើងប្រហែលចង់បង្ហាញបំណងបើកចំហការចរចាណាមួយ ជាមួយសហរដ្ឋអាមេរិក ព្រោះថា ថ្ងៃអាទិត្យនេះ ក៏មានវត្តមានលោកស្រីអ៊ីវ៉ាន់កា ត្រាំ ជាកូនស្រីលោកដូណាល់ ត្រាំ តំណាងប្រតិភូអាមេរិកដែរ។ ទោះយ៉ាងនេះក្តី ក៏ខាងអាមេរិកប្រាប់ថា គណៈប្រតិភូខ្លួនគ្មានគម្រោងជជែកគ្នាជាមួយកូរ៉េខាងជើងទេ។
ទំនាក់ទំនងកូរ៉េទាំង២អាចប្រែប្រួលទៀត ក្នុងពេលខាងមុខ
ប្រទេសកូរ៉េទាំង២ធូរស្រាលនឹងគ្នាវិញ បានយូរប៉ុណ្ណាគេនៅមិនទាន់អាចដឹងទេ។ វត្តមានមេដឹកនាំយោធាជាន់ខ្ពស់កូរ៉េខាងជើង លោក Kim Yong-chol ក្នុងពិធីបិទបញ្ចប់ការប្រកួតអូឡាំពិកថ្ងៃអាទិត្យនេះ ជាវត្តមានចម្រូងចម្រាស ធ្វើអោយក្រុមប្រឆាំងអភិរក្សនិយមកូរ៉េខាងត្បូងខឹងសម្បារជាខ្លាំង។ ក្រុមអភិរក្សចោទថា លោកគឺម ជាឧក្រិដ្ឋជនសង្គ្រាម។
រឿងរ៉ាវនេះ ដើមទង គឺចេញពីគ្រោះលិចកប៉ាល់ចម្បាំងកូរ៉េខាងត្បូង កាលពីឆ្នាំ២០១០។ គេសង្ស័យថា លោក Kim Yong-chol នេះ អាចគ្រប់គ្រងការិយាល័យទូទៅមូយ នៃផ្នែកចារកិច្ចកូរ៉េខាងជើង ហើយអាចបានបញ្ជាអោយវាយប្រហារកប៉ាល់ចម្បាំងកូរ៉េខាងត្បូង ធ្វើអោយស្លាប់មនុស្ស៤៦នាក់។ កូរ៉េខាងជើងតែងបដិសេធថា មិនជាប់ពាក់ព័ន្ធហេតុការណ៍នេះទេ។ ដោយសាររឿងពីមុនមកនេះ តាំងពីថ្ងៃសុក្រ រហូតដល់ថ្ងៃសៅរ៍ម្សិលមិញ ចូលព្រឹកថ្ងៃអាទិត្យនេះទៀត មានបាតុកម្មក្នុងស្រុកកូរ៉េខាងត្បូង ប្រឆាំងវត្តមាន មេយោធាកូរ៉េខាងជើង Kim Yong-chol។ តំណាងរាស្រ្តអភិរក្សក្នុងស្រុកមួយចំនួនទាមទារអោយចាប់ខ្លួនលោក Kim Yong-chol។ កន្លងមក កូរ៉េខាងត្បូងក៏បានដាក់ទណ្ឌកម្មឯកតោភាគីប្រឆាំងលោកគីមនេះដែរហើយ។
ពេលនេះ គេនៅចាំមើលទៀតពីការវិវត្តទំនាក់ទំនងរវាងប្រទេសកូរ៉េទាំង២។ ព្រោះថា ស្ថានការណ៍អាចតានតឹងឡើងវិញ ដោយសារតែលោកដូណាល់ ត្រាំ ទើបនឹងប្រកាសដាក់ទណ្ឌកម្មធ្ងន់មិនធ្លាប់មានថែមទៀត ទៅលើក្រុងព្យុងយ៉ាង។ កូរ៉េខាងត្បូងក៏នឹងបន្តសមយុទ្ធយោធារួមគ្នាជាមួយអាមេរិក ក្រោយកីឡាប៉ារ៉ាឡាំពិក ខែមិនាខាងមុខនេះដែរ។ ដូចយើងធ្លាប់ដឹងហើយ សមយុទ្ធយោធារួមគ្នានេះ មិនធ្វើអោយកូរ៉េខាងជើងសប្បាយចិត្តទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ