កូរ៉េខាងជើងលុបចោលជំនួបខ្លី នៅព្យុងឆាង ជាមួយអនុប្រធានាធិបតីអាមេរិក
ក្រសួងការបរទេសអាមេរិកបានឲ្យដឹងថា ជំនួបខ្លីមួយ រវាងលោកអនុប្រធានាធិបតីអាមេរិក និងគណៈប្រតិភូកូរ៉េខាងជើង ត្រូវបានគ្រោងធ្វើ នៅក្នុងអំឡុងពិធីបើកការប្រកួតកីឡាអូឡាំពិកនៅកូរ៉េខាងត្បូង។ ក៏ប៉ុន្តែ ជំនួបនេះត្រូវបានភាគីកូរ៉េខាងជើងលុបចោលទៅវិញ ក្រោយពីលោកអនុប្រធានាធិបតីអាមេរិក Mike Pence បានរិះគន់របបក្រុងព្យុងយ៉ាង ដោយចាត់ទុកថាជា « របបឃាតក”។
ចុះផ្សាយនៅថ្ងៃ៖
នាឱកាសអញ្ជើញទៅចូលរួមបើកកម្មវិធីកីឡាអូឡាំពិករដូវរងារនៅកូរ៉េខាងត្បូង អនុប្រធានាធិបតីអាមេរិក លោក បានត្រៀម មានជំនួបជាមួយកូរ៉េខាងជើង ដើម្បីបានបញ្ជាក់អំពីភាពចាំបាច់នៃការបោះបង់កម្មវិធីមីស៊ីលបាលីស្ទិក និងនុយក្លេអ៊ែរហើយ តែអ្នកទទួលខុសត្រូវនៃរបបសាធារណរដ្ឋប្រជាមានិតប្រជាធិបតេយ្យកូរ៉េខាងជើង បែរប្តូរចិត្តនៅនាទីចុងក្រោយ លុបចោលគម្រោងជំនួបដ៏ខ្លីនោះទៅវិញ។ នេះបើសេចក្តីថ្លែងការណ៍របស់អ្នកនាំពាក្យក្រសួងការបរទេសអាមេរិក ដែលបានបន្ថែមទៀតថា អាមេរិកសោកស្តាយដែលកូរ៉េខាងជើងមិនចេះឆក់ឱកាស តែអាមេរិកមិនឈប់ធ្វើការរិះគន់ រំលឹកអំពីការគោរពសិទ្ធិមនុស្សទេ។
នៅមុននេះបន្តិច អគ្គលេខារបស់លោកអនុប្រធានាធិបតីក៏បានចេញថ្លែងការណ៍ស្តីអំពី ការខកខានជំនួបនេះដែរ ដោយបានអះអាងថា កូរ៉េខាងជើងចង់មានជំនួប ដោយសង្ឃឹមថាលោកអនុប្រធានាធិបតីអាចបន្ទន់សារ ដើម្បីព្យុងយ៉ាងបានឱកាសប្រើឆាកអូឡាំពិកសម្រាប់បំបោងឃោសនានយោបាយ។ ប៉ុន្តែ លោក Mike Pence មិនត្រឹមតែមិនបន្ទន់ឥរិយាបថទេ តែថែមទាំងបានបន្តការរិះគន់សកម្មភាពរំលោភសិទ្ធិមនុស្សដ៏ធ្ងន់ធ្ងរគ្មានដូច ដោយចាត់ទុករបបព្យុងយ៉ាង ថាជារបបឃាតករ និងប្រកាសកម្មវិធីដាក់ទណ្ឌកម្មមួយខ្សែទៀត។ គឺទំនងដោយសារមូលហេតុនេះហើយ បានជាកូរ៉េខាងជើងដកថយ ឬក៏ទំនងមកពីពួកគេគ្មានភាពស្មោះត្រង់នឹងបើកជំនួប។ នេះបើតាមអគ្គលេខារបស់លោកអនុប្រធានាធិបតីដដែល។
រដ្ឋបាលលោកត្រាំ មានជំហរយ៉ាងច្បាស់លាស់ ប្រឆាំងដាច់ខាតនឹងគំនិតរបស់គីមជុងអ៊ុនដែលចង់ប្រើកីឡាអូឡាំពិកសម្រាប់មកលុបលាងខ្លួនបានឡើយ។ ក្នុងអំឡុងពេលបើកប្រកួតកីឡាអូឡាំពិកនៅព្យុងឆាង កូរ៉េខាងជើងបានបើកប្រតិបត្តិការចែចង់ បញ្ជូនកីឡាករ សិល្បករ អ្នករាំ និងប្រតិភូជាន់ខ្ពស់បានទៅកូរ៉េខាងត្បូង ក្នុងនោះម្នាក់ជាប្អូនស្រីបង្កើតលោកគីមជុងអ៊ុនផង។ ប្រធានាធិបតីកូរ៉េខាងត្បូង បានចាប់ដៃ លោកស្រី គីម ជុងយ៉ូ និងប្រតិភូផ្សេងៗទៀត ជាសាធារណៈ។ ឯលោកអនុប្រធានាធិបតីអាមេរិកដែលអង្គុយក្បែរនោះ គ្មានបញ្ចេញប្រតិកម្មអ្វីជាមួយប្រតិភូកូរ៉េខាងជើងនេះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ