តុលាការព្រហ្មទណ្ឌអន្តរជាតិបើកការស៊ើបអង្កេតបឋមលើសំណុំរឿងចោទលោកប្រមុខរដ្ឋហ្វីលីពីនឌុយទែរតេ
នៅក្នុងប្រទេសហ្វីលីពីន លោកហារី រ៉ុក អ្នកនំាពាក្យរបស់លោកប្រធានាធិបតីឌុយទែរតេបានប្រកាសឲ្យដឹងនាថ្ងៃព្រហស្បតិ៍ ទី៨ កុម្ភៈថា តុលាការព្រហ្មទណ្ឌអន្តរជាតិក្រុងឡាអេបានសម្រេចបើកការស៊ើបអង្កេតបឋមលើសំណុំរឿងចោទលោកឌុយទែរតេពីបទបានធ្វើមានមនុស្សស្លាប់ជាច្រើនពាន់នាក់នៅក្នុងនយោបាយប្រឆាំងគ្រឿងញៀនរបស់លោក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
លោកហារី រ៉ុកបានថ្លែងយ៉ាងដូចនេះនៅចំពោះមុខហ្វូងអ្នកកាសែតក្នុងទីក្រុងម៉ានីលដោយបន្ថែមថា ការសម្រេចបើកការស៊ើបអង្កេតបឋមពីសំណាក់តុលាការព្រហ្មទណ្ឌអន្តរជាតិក្រុងឡាអេពេលនេះត្រូវបានរដ្ឋអាជ្ញារបស់តុលាការអន្តរជាតិមួយនេះប្រាប់ទៅស្ថានទូតហ្វីលីពីនប្រចាំប្រទេសហូឡង់ថ្មីៗកន្លងទៅ។ សូមជម្រាបជូនថា សំណុំរឿងចោទប្រកាន់លោកប្រមុខរដ្ឋហ្វីលីពីនឌុយទែរតេត្រូវបានមេធាវីជនជាតិហ្វីលីពីនលោក Jude Sabio ប្តឹងទៅតុលាការព្រហ្មទណ្ឌអន្តរជាតិក្រុងឡាអេកាលពី ១០ខែមុន និងដែលនៅក្នុងបណ្តឹងកាលណោះ មេធាវីហ្វីលីពីនបានចោទលោកឌុយទែរតេពីបទបានធ្វើឲ្យមានមនុស្សស្លាប់ប្រមាណជា ៨ ០០០នាក់នៅក្នុងនយោបាយប្រឆាំងគ្រឿងញៀន។
តែលោកហារី រ៉ុក អ្នកនំាពាក្យរបស់លោកឌុយទែរតេបានចាត់ទុកការសម្រេចរបស់តុលាការព្រហ្មទណ្ឌអន្តរជាតិពេលនេះថា ជាការខាតបង់ពេលវេលា និងចំណាយលុយកាក់ឥតប្រយោជន៍។ តាមលោកហារី រ៉ុក លោកឌុយទែរតេបានប្រើកម្លាំងស្របច្បាប់ដើម្បីប្រឆាំងនឹងអ្នករត់ពន្ធ និងអ្នកប្រើប្រាស់គ្រឿងញៀនដែលបានគំរាមកំហែងប្រទេសជាតិ និងប្រជាពលរដ្ឋ។ គួររម្លឹកជូនឡើងបន្តិចថា តាំងពីបានជាប់ឆ្នោតជាប្រធានាធិបតីក្នុងឆ្នាំ ២០១៦ មក ប៉ូលិសបានសម្លាប់អ្នករត់ពន្ធ និងអ្នកប្រើប្រាស់គ្រឿងញៀនប្រមាណជា ៤ ០០០នាក់ រួមទាំង ២ ០០០នាក់ផ្សេងទៀតដែលត្រូវបានជនមិនស្គាល់មុខសម្លាប់។
តែក្រុមអ្នកការពារសិទ្ធិមនុស្សបានអះអាងថា ចំនួនអ្នកស្លាប់ពិតប្រាកដអាចមាន ២ដងច្រើនជាងតួលេខផ្លូវការផ្តល់ដោយរដ្ឋាភិបាល។ យ៉ាងណាក៏ដោយ លោកមេធាវី Jude Sabio បានត្រេកត្រអាល និងចាត់ទុកសេចក្តីសម្រេចរបស់តុលាការព្រហ្មទណ្ឌអន្តរជាតិថា ជាការបោះមួយជំហានទៅមុខដោយសង្ឃឹមអាចឈានទៅចាប់ខ្លួនលោកឌុយទែរតេ ឬយ៉ាងហោចណាស់ ក៏ធ្វើឲ្យលោកឌុយទែរតេអាម៉ាស់មុខដែរ។ តែលោកហារី រ៉ុកបានគូសបញ្ជាក់ថា បេសកកម្មរបស់រដ្ឋាភិបាលហ្វីលីពីនគឺបង្ហាញពីអសមត្ថភាពរបស់តុលាការព្រហ្មទណ្ឌអន្តរជាតិ និងពីដំណើរការស្របច្បាប់ ត្រឹមត្រូវរបស់តុលាការហ្វីលីពីន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ