ជប៉ុន ៖ នាយករដ្ឋមន្ត្រីជំរុញឱ្យក្រុមហ៊ុនដំឡើងប្រាក់ខែ៣%ដល់បុគ្គលិក
នាយករដ្ឋមន្ត្រីជប៉ុន លោក ស្ហ៊ីនហ្សូ អាបេ បានជំរុញក្រុមហ៊ុនសហគ្រាសជប៉ុនទូទាំងប្រទេសទាំងអស់ឱ្យដំឡើងប្រាក់បៀរវត្ស៣%ឬច្រើនជាងនេះក៏បាន ដល់បុគ្គលិក នៅឆ្នាំក្រោយ។ នេះជាសេចក្តីអំពាវនាវរបស់លោកនាយករដ្ឋមន្ត្រី ដែលចង់ឱ្យក្រុមហ៊ុនសហគ្រាសប្រឹងប្រែងចូលចំណែកជាថ្មីទៀត ជួយស្រោចស្រង់ប្រទេសឱ្យសម្រេចកម្មវត្ថុដើរចេញផុតពីវិបត្តិបរិត្តផរណា។ វិបត្តិផរណាដែលបានញាំញីនិង អូសបន្លាយអស់ជាច្រើនឆ្នាំមកហើយ។
ចុះផ្សាយនៅថ្ងៃ៖
សេដ្ឋកិច្ចជប៉ុនកំពុងប្រែពណ៌ មានសញ្ញាវិជ្ជមានច្រើន គួរឱ្យភ្ញាក់ផ្អើល ៖ អត្រាអ្នកឥតការងារធ្វើបានធ្លាក់ចុះដល់កំរិតទាបបំផុត ២,៧% ចំណែកសកម្មភាពចាយវាយរបស់ពលរដ្ឋបានស្ទុះឡើងខ្លាំង អតិផរណាបានចាប់កំរើកយ៉ាងលឿន ហួសពីការគ្រោងទុក។ ប៉ុន្តែ ធនាគារជាតិជប៉ុនមិនទាន់ស្រែកជ័យឃោសបាននៅឡើយទេ ព្រោះដំណើរផ្លូវនៅវែងឆ្ងាយទៀត ដោយចាំបាច់ត្រូវដោះស្រាយ មានអាទិ៍បញ្ហាប្រាក់ខែមួយទៀត។
“យើងត្រូវពង្រឹងនិងពង្រីកវដ្តសេដ្ឋកិច្ចវិជ្ជមានរបស់ជប៉ុនបន្ថែមទៀត នៅឆ្នាំក្រោយ ដើម្បីនាំប្រទេសដើរចេញពីវិបត្តិបរិត្តផរណា ដែលជាកម្មវត្ថុប៉ងប្រាថ្នាតាំងពីជាច្រើនឆ្នាំមកហើយ » ! ហេតុដូច្នេះ បានជារដ្ឋាភិបាលសុំស្នើឱ្យក្រុមហ៊ុនសហគ្រាសជប៉ុនទាំងអស់ ដំឡើងប្រាក់ខែជូនបុគ្គិលិក ឱ្យបាន៣% ឬច្រើនជាងនេះក៏កាន់តែប្រសើរ ! នេះជាប្រសាសន៍របស់លោក ស្ហ៊ីនហ្សូ អាបេ ទៅកាន់អង្គប្រជុំសហព័ន្ធនិយោជកជប៉ុន។
កាលពីពីរសប្តាហ៍មុន រដ្ឋាភិបាលចម្រុះរបស់លោក អាបេ បានអនុម័តរួចមកហើយគម្រោងបញ្ចុះពន្ធលើប្រាក់ចំណេញរបស់ក្រុមហ៊ុន ពី៣០មក២០% ជាថ្នូរនឹងការដំឡើងប្រាក់បៀរវត្ស និងការវិនិយោគ។
បើតាមទិន្នន័យរបស់រដ្ឋាភិបាល ក្រុមហ៊ុនសហគ្រាសធំៗជប៉ុន តែងតែដំឡើងប្រាក់ខែ ក្នុងមួយឆ្នាំៗចំនួន ២% គិតចាប់ពីឆ្នាំ២០១៤មក។ ហើយបើចាប់ពីថ្ងៃទី ១មេសា ឆ្នាំ២០១៨ ការដំឡើងប្រាក់ខែឡើងដល់ឬច្រើនជាង៣% នោះធនាគារជាតិជប៉ុននឹងអាចសម្រេចកម្មវត្ថុ មានអតិផរណា ២%។
ប៉ុន្តែបើតាមប្រធានធនាគារជាតិ ក្រុមនិយោជកជប៉ុន ហាក់ដូចជាមិនសូវអើពើនឹងសេចក្តីអំពាវនាវរបស់រដ្ឋាភិបាលសុំដំឡើងប្រាក់បៀរវត្សបុគ្គលិកឡើយ។ ក្រុមហ៊ុនសហគ្រាសមានទម្លាប់ ជាង១៥ឆ្នាំមក គិតគូរផ្តល់អាទិភាពដល់សន្តិសុខការងារច្រើនជាងប្រាក់ខែ។ ម្យ៉ាងវិញទៀត ជប៉ុនហាក់បានដើរចេញពីវិបត្តិបរិត្តផរណា បាតុភូតដែលទំនិញធ្លាក់ថ្លៃរយៈពេលអូសបន្លាយវែង យូរមកហើយ។ នេះបើតាមប្រធានធនាគារជាតិជប៉ុនដដែល។ នៅក្នុងសុន្ទរកថា ប្រធានសហព័ន្ធនិយោជក បានសង្កត់ធ្ងន់តែលើភាពចាំបាច់របស់ប្រទេសក្នុងការលើកស្ទួយគណនីសាធារណៈ គ្មានប៉ះពាល់សោះដល់បញ្ហាប្រាក់ខែបុគ្គលិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ