គ្រោះអគ្គីភ័យសម្លាប់មនុស្សនៅក្នុងផ្សារទំនើបមួយក្នុងទីក្រុងដាវ៉ាវស្ថិតប៉ែកខាងត្បូងហ្វីលីពីន
នៅក្នុងប្រទេសហ្វីលីពីន ទន្ទឹមគ្នានឹងខ្យល់ព្យុះសង្ឃរាសម្លាប់មនុស្សជាង ២០០នាក់ និងបន្សល់ទុកជនភៀសខ្លួនជាច្រើនម៉ឺននាក់នៅតំបន់ប៉ែកខាងជើង គ្រោះអគ្គីភ័យមួយបានឆាបឆេះនៅក្នុងផ្សរទំនើបនៃទីក្រុងដាវ៉ាវស្ថិតប៉ែកខាងជើងប្រទេសបានបណ្តាលឲ្យមានមនុស្សស្លាប់យ៉ាងតិច ៣៧នាក់ និងរបួសជាច្រើននាក់ផ្សេងទៀត។ លោកប្រធានាធិបតីហ្វីលីពីនឌុយទែរតេដែលមានដើមកំណើត និងធ្លាប់ធ្វើជាចៅហ្វាយក្រុងអស់ជាច្រើនទសវត្សរ៍បានធ្វើដំណើរទៅកាន់កន្លែងរងគ្រោះនាយប់ថ្ងៃសៅរ៍ឆ្លងចូលថ្ងៃអាទិត្យ ទី២៤ ធ្នូដើម្បីពិនិត្យស្ថានការណ៍ និងសួរសុខទុក្ខជនរងគ្រោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២២
ទីក្រុងដាវ៉ាវដែលមានចម្ងាយប្រមាណជា ១ ០០០គីឡូម៉ែត្រស្ថិតលើកោះមីនដាណាវ គឺជាទីក្រុងដ៏ធំជាងគេរបស់ហ្វីលីពីននៅប៉ែកខាងត្បូងដែលមានពលរដ្ឋរស់នៅប្រមាណជា ១លាន ៥សែននាក់។ ថ្លែងនៅចំពោះជនរងគ្រោះ លោកឌុយទែរតេបានបញ្ជាក់ពីក្តីអស់សង្ឃឹមក្នុងការរកឃើញអ្នករស់រានមានជីវិតពីគ្រោះអគ្គីភ័យដែលបានឆាបឆេះនៅក្នុងផ្សារទំនើបកាលពីព្រឹកថ្ងៃសៅរ៍ ទី២៣ ធ្នូនៅជាន់ទី៤ ដែលជាជាន់ចុងក្រោយ។ ចៅក្រុងដាវ៉ាវលោកស្រីសារ៉ា ឌុយទែរតេដែលជាកូនស្រីលោកឌុយទែរតេបានបញ្ជាក់នៅព្រឹកថ្ងៃអាទិត្យ ទី២៤ ធ្នូនេះថា ក្រុមអ្នកពន្លត់អគ្គីភ័យបានទាញយកសាកសពបណ្តើរៗ និងថា គ្រោះអគ្គីភ័យបានស្ថិតក្រោមការគ្រប់គ្រង។
តែទោះជាយ៉ាងនេះក្តី ក្រុមអ្នកពន្លត់ភ្លើងពិបាកនឹងចូលទៅខាងក្នុងដើម្បីពិនិត្យមើលឲ្យបានច្បាស់លាស់ដើម្បីចង់ដឹងពីចំនួនមនុស្សដែលជាប់កុនស្លាប់ក្នុងអណ្តាតភ្លើង ពិសេសចង់ដឹងថាតើអាចនៅសល់អ្នករស់រានមានជីវិតឬអត់។ លោកប៉ាវឡូ ឌុយទែរតេ ចៅហ្វាយក្រុងរង និងជាកូនប្រុសម្នាក់របស់លោកឌុយទែរតេបានសរសេរនៅលើបណ្តាញសង្គម Facebook ថា អាចមានមនុស្សស្លាប់ចំនួន ៣៧នាក់នៅក្នុងគ្រោះអគ្គីភ័យនោះ។ ខណៈនេះ គេនៅមិនទាន់ដឹងពីមូលហេតុពិតនៃការឆាបឆេះនោះនៅឡើយទេ តែអ្នកទទួលខុសត្រូវម្នាក់នៃក្រុមអ្នកពន្លត់អគ្គីភ័យបានអះអាងថា អណ្តាតភ្លើងអាចផ្តើមចេញពីជាន់ទី៣ ដែលសម្បូរផលិតផលវាយភ័ណ្ឌ គ្រឿងសង្ហារឹមធ្វើពីឈើ និងផលិផលប្លាស្ទិក។
សាក្សីម្នាក់ដែលជាបុគ្គលិកនៅក្នុងផ្សារទំនើបនោះបាននិយាយប្រាប់ប៉ូលិសថា ផ្សារទំនើបបានសង់ឡើងបិទជិតដោយគ្មានបង្អួច និងគ្មានបំពាក់ដោយប្រព័ន្ធខ្យល់ចេញ ចូលទេ ហើយនៅពេលដែលក្រុមអ្នកពន្លត់ភ្លើងព្យាយាមចូលទៅខាងក្នុង ពួកគេត្រូវបានរុញច្រានដោយអណ្តាតភ្លើង និងផ្សែងយ៉ាងក្រាស់ខ្មឹក។ នៅហ្វីលីពីន គ្រោះអគ្គីភ័យស្រដៀងគ្នានេះឧស្សាហ៍កើតមានញឹកញាប់ណាស់។ ក្នុងឆ្នាំ ១៩៩៦ ភ្លើងឆាបឆេះក្នុងរង្គសាលមួយនៅទីក្រុងម៉ានីលបានផ្តាច់ជីវិតមនុស្ស ១៦២នាក់។ ក្នុងឆ្នាំ ២០១៥ មានមនុស្សស្លាប់ ៧២នាក់នៅក្នុងគ្រោះអគ្គីភ័យនៅក្នុងរោងចក្រផលិតស្បែកជើងមួយក្នុងទីក្រុងម៉ានីល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ