កូរ៉េខាងត្បូង-អាមេរិក ធ្វើសមយុទ្ធផ្លូវអាកាស ទម្រង់ធំបំផុតមិនធ្លាប់មាន
ចុះផ្សាយនៅថ្ងៃ៖
ស្តាប់ - ០៥:៣១
បន្ទាប់ពីស្ងប់ស្ងាត់បានមួយរយៈខ្លី ឧបទ្វីបកូរ៉េកំពុងធ្លាក់ក្នុងភាពភាពតានតឹងជាថ្មី ! កូរ៉េខាងត្បូង និងសហរដ្ឋអាមេរិក បានចាប់ផ្តើម នៅថ្ងៃចន្ទទី ៤ ធ្នូនេះ សមយុទ្ធផ្លូវអាកាសទ្រង់ទ្រាយធំ ដែលប្រទេសទាំងពីរមិនធ្លាប់សហការគ្នាធ្វើពីមុនមកទេ។ សមយុទ្ធរយៈពេល៥ថ្ងៃ ប្រព្រឹត្តទៅតែ៥ថ្ងៃក្រោយការបាញ់សាកល្បងមីស៊ីលអន្តរទ្វីប និងត្រូវបានព្យុងយ៉ាងចាត់ទុកថាទង្វើបង្កហេតុយ៉ាងពិតៗ។
សមយុទ្ធទ្វេភាគី កូរ៉េខាងត្បូង និងសហរដ្ឋអាមេរិកដែលចាប់ផ្តើមនៅថ្ងៃនេះ ត្រូវបានគ្រោងរៀបចំមកតាំងពីយូរហើយ។ ជាលំហាត់យោធាប្រចាំឆ្នាំ ដែលគេប្រសិទ្ធនាមថា "Vigilant Ace » គ្រាន់តែថាឆ្នាំនេះ សមយុទ្ធមានទ្រង់ទ្រាយធំខ្លាំងជាពិសេស មិនធ្លាប់មានពីមុនទេ ! មានទាហានកូរ៉េខាងត្បូងនិងអាមេរិករាប់សិបពាន់នាក់ ចូលរួម ក្នុងនោះ ១២០០០នាក់ ជាទាហានអាមេរិក យន្តហោះជាង២៣០គ្រឿង និងការពង្រាយយន្តហោះប្រយុទ្ធ មានសមត្ថភាពកំបាំងខ្លួនខ្ពស់ F-២២ Raptor ៦គ្រឿងផង។ នៅក្នុងកម្មវិធីសមយុទ្ធ អាមេរិក-កូរ៉េខាងត្បូងក៏មានគម្រោងហាត់សមវាយលុកចូលទីតាំងនុយក្លេអ៊ែរ ឬកម្ទេចម៉ាស៊ីនបាញ់បង្ហោះ មីស៊ីលរបស់កូរ៉េខាងជើងទៀត។
សម្រាប់កូរ៉េខាងត្បូងនិងអាមេរិក នេះជាលំហាត់សម “ការពារខ្លួន” សុទ្ធសាធ ក្នុងក្របខ័ណ្ឌនៃកិច្ចសហប្រតិបត្តិការយោធារវាងប្រទេសសម្ព័ន្ធមិត្តទាំងពីរ។ ប៉ុន្តែ ជារៀងរាល់ឆ្នាំ និងរាល់លើក សមយុទ្ធបែបនេះ តែងតែបង្កភាពក្តៅក្រហាយខ្លាំងដល់របបព្យុងយ៉ាង ដែលយល់ថា អាមេរិកហាត់ត្រៀមចូលឈ្លានពានទឹកដីរបស់គេ។ ជាចម្លើយតប កូរ៉េខាងជើង តែងបានបាញ់សាកល្បងមីស៊ីលតបវិញ។ នៅលើកនេះ ព្យុងយ៉ាងធ្វើការបរិហារ តាំងពីម្សិលមិញមកម្ល៉េះ ថាលោក ដូណាល់ ត្រាំ ចង់តែធ្វើសង្គ្រាមនុយក្លេអ៊ែរ និងបានព្រមានថាសមយុទ្ធអាមេរិក-កូរ៉េខាងត្បូង កំពុងរុញច្រានស្ថានភាពក្នុងឧបទ្វីបដែលតានតឹងស្រាប់ ឱ្យកាន់មាត់ច្រាំងនៃសង្គ្រាមនុយក្លេអ៊ែរ។
ហានិភ័យនៃការផ្ទុះសង្គ្រាមនុយក្លេអ៊ែរ
ល្បែងបែបនេះ ងាយធ្លាក់ផុងទៅជាសង្គ្រាមខ្លាំងណាស់។ នៅកណ្តាលក្រុងសេអ៊ូល ដែលនៅកៀកខ្លាំងនឹងកូរ៉េខាងជើងស្រាប់ផង ប្រជាពលរដ្ឋកូរ៉េខាងត្បូង បានប្រមូលផ្តុំគ្នាជាក្រុមតូចៗ ធ្វើបាតុកម្ម ដោយសន្តិវិធី ដើម្បីប្រឆាំងនិងរិះគន់សមយុទ្ធអាមេរិក-កូរ៉េខាងត្បូងនេះ។
ចំណែកខាងចិន លោក វង់ យី រដ្ឋមន្ត្រីការបរទេសចិន បានធ្វើសន្និសីទកាសែត សម្តែងការសោកស្តាយ នៅពេលឃើញឧបទ្វីបកូរ៉េធ្លាក់ក្នុងស្ថានភាពដុនដាបជាថ្មី បន្ទាប់ពីស្ងប់ស្ងាត់បានមួយរយៈខ្លី។ បើតាមលោកប្រមុខការទូត ប៉េកាំង បានប្រឹងប្រែងខ្លាំងវែកផ្លូវ រកច្រកដោះស្រាយវិបត្តិកូរ៉េខាងជើងតាមផ្លូវចរចា តែអាមេរិកបែរជាបំផុសភាពតានតឹងឡើងវិញទៅវិញ។
នៅឯវ៉ាស៊ីនតោនឯណោះ ក្រុមជំនិតជុំវិញលោកដូណាល់ ត្រាំ កំពុងគោះធុង គោះប៉ោត ទូងស្គរចេញធ្វើសង្គ្រាម។ អគ្គមេបញ្ជាការកងទ័ពអាមេរិក លោក McMaster បានប្រកាសក្តែងៗថាលទ្ធភាពនៃការផ្ទុះសង្គ្រាមជាមួយកូរ៉េខាងជើង កើនឡើងជារៀងរាល់ថ្ងៃ។ លោក Lindsy Graham សមាជិកព្រឹទ្ធសភា ដែលមានបទពិសោធន៍ខ្លាំងផ្នែកនយោបាយការបរទេស បានស្នើសុំឱ្យមានជម្លៀសក្រុមគ្រួសារទាហានអាមេរិកនៅកូរ៉េខាងត្បូង ឱ្យត្រលប់ចូលស្រុកវិញ។ បើតាមសមាជិកព្រឹទ្ធសភារូបនេះ រដ្ឋបាលរបស់លោកត្រាំ មានយុទ្ធសាស្ត្រ ទប់ស្កាត់របបព្យុងយ៉ាងមិនមានសមត្ថភាពនុយក្លេអ៊ែរអាចវាយប្រហារដល់អាមេរិកបាន។ ហើយពាក្យថា ទប់ស្កាត់ គឺមានន័យថាធ្វើសង្គ្រាមជាកិច្ចការពារ នេះឯង។
តើនេះជាព័ត៌មានបំផ្លើស បំភ័យកូរ៉េខាងជើងឬយ៉ាងណា ?! តែសម្រាប់អ្នកវិភាគ ពេលនេះលោកត្រាំ កំពុងលេងល្បែងមួយដ៏គ្រោះថ្នាក់ ៖ បើហ៊ានគ្រវីទង់ធ្វើសង្គ្រាមជាកិច្ចការពារ សហរដ្ឋអាមេរិកអាចនឹងធ្វើឱ្យកូរ៉េខាងជើងបកប្រែខុស ហើយអាចនឹងជួបគ្រោះ កូរ៉េខាងជើងចេញទ័ពចល័តមែន។
ជប៉ុន ៖ ការចរចាជាមួយកូរ៉េខាងជើងគ្មានន័យ
លោកនាយករដ្ឋមន្ត្រីជប៉ុន ស៊ីនហ្សូ អាបេ បានអះអាងនៅចំពោះមុខសភាជាតិជប៉ុន នាថ្ងៃចន្ទនេះថា កម្មវិធីនុយក្លេអ៊ែររបស់កូរ៉េខាងជើង ជាការគំរាមកំហែងសន្តិសុខតំបន់ និងជប៉ុន យ៉ាងពិតៗ ក្នុងពេលដ៏ឆាប់ៗនេះតែម្តង។ ដូច្នេះវាគ្មានប្រយោជន៍អ្វីដែលត្រូវការចរចាជាមួយកូរ៉េខាងជើងទៀតទេ។
ជាមួយនឹងការអនុម័តជាឯកច្ឆ័ន្ទ លើសេចក្តីសម្រេចប្រឆាំងនឹងការសាកល្បងមីស៊ីលអន្តរទ្វីបរបស់ព្យុងយ៉ាង កាលពីថ្ងៃពុធមុន លោកនាយករដ្ឋមន្ត្រីជប៉ុន បានរំលឹកឡើងវិញនៅថ្ងៃនេះ ថាចង់ឃើញពិភពលោកដាក់គំនាបលើកូរ៉េខាងជើង រហូតប្រទេសនេះព្រមបោះបង់កម្មវិធីនុយក្លេអ៊ែរ ជារៀងរហូត និងគ្មានថ្ងៃត្រលប់បាន។ បើចង់បង្ក្រាបប្រទេសមួយ ហើយ លែងត្រូវការដំណោះស្រាយនយោបាយ តើនៅសល់ច្រកចេញប៉ុន្មានទៀត?!
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ