ចិន ផ្តល់ជំនួយឥតសំណងជិតបីពាន់លានអឺរ៉ូដល់អឺរ៉ុបកណ្តាលនិងអឺរ៉ុបខាងកើត
ក្នុងជំនួបកំពូល ចិន-អឺរ៉ុបកណ្តាលនិងខាងកើត China-CEEC នាទីក្រុងប៊ុយដាប៉ែស ប្រទេសហុងគ្រី នៅថ្ងៃចន្ទទី ២៧ វិច្ឆិកានេះ នាយករដ្ឋមន្ត្រីចិន លោក លី ខឺឈាំង បានប្រកាស ផ្តល់ជំនួយឥតសំណង ដល់ក្រុមប្រទេសនៅតំបន់នេះ ក្នុងតម្លៃទឹកប្រាក់ទំហំជិតបីពាន់លានអឺរ៉ូ។ ជាជំនួយឧបត្ថម្ភគម្រោងដែលជាចំណែកមួយនៃនយោបាយ ផ្លូវមួយខ្សែក្រវ៉ាត់មួយ របស់លោកស៊ី ជីនពីង។
ចុះផ្សាយនៅថ្ងៃ៖
គឺនៅក្នុងឱកាសជួបប្រជុំរវាងចិន និងក្រុមប្រទេសនៅតំបន់អឺរ៉ុបខាងកើត អឺរ៉ុបកណ្តាល និងតំបន់បាល់កង់ ជាសមាជិកនិងមិនមែនជាសមាជិកសហភាពអឺរ៉ុប ហៅកាត់ថា PECO ជាភាសាបារាំង ឬ CEEC ជាភាសាអង់គ្លេស ដែលនាយករដ្ឋមន្ត្រីចិន បានប្រកាសជូនដំណឹងអំពីការផ្តល់ជំនួយដោយឥតសំណង ដល់ទៅ ជិតបីពាន់លានអឺរ៉ូ។ ក្រុមប្រទេស¨Pecoទាំង១៦ រួមមាន ៖ អាល់បានី បូស្នី-អ៊ែរហ្សេហ្គោវីន ប៊ុលហ្ការី ក្រូអាស៊ី អេស្តូនី ហុងគ្រី ឡេតូនី លីទុយអានី ម៉ាសេដ្វាន ម៉ុងតេណេហ្គ្រោ ប៉ូឡូញ សាធារណរដ្ឋឆែក រ៉ូម៉ានី ស្លូវេនី ស្លូវ៉ាគី និងស៊ែរប៊ី។
ធនាគារអភិវឌ្ឍន៍ចិន នឹងបើកកញ្ចប់ថវិកាបំរ៉ុង ២ពាន់លានអឺរ៉ូ សម្រាប់ឱ្យក្រុមប្រទេស នៅតំបន់អឺរ៉ុបខាងកើត និងកណ្តាល ប្រើប្រាស់ក្នុងក្របខណ្ឌសមាគមអន្តរធនាគារ Peco ដែលទើបបង្កើតឡើងនៅថ្ងៃចន្ទនេះ។ ហើយ១ពាន់លានអឺរ៉ូទៀត ជាអំណោយរបស់ចិន សម្រាប់ប្រើជាមូលនិធិវិនិយោគ ដែលមួយភាគធំនឹងបានដល់ដៃPecoនេះឯង។ នេះបើតាមការលម្អិតរបស់លោក លី ខឺឈាំង។
លោកប្រមុខរដ្ឋាភិបាលចិនក៏បានធានាអះអាងប្រាប់ ក្រុមបណ្តាប្រទេសនៅអឺរ៉ុបខាងលិចទាំងអស់ដែរថា កុំឱ្យព្រួយបារម្ភចំពោះសកម្មភាពចិនដែលបង្កើនការវិនិយោគនៅអឺរ៉ុបខាងកើត ព្រោះរាល់កិច្ចសហប្រតិបត្តិការសុទ្ធតែមានតម្លាភាព និងការបើកចំហ ព្រមទាំងស្របតាមក្រមខណ្ឌនៃការពង្រីកទំនាក់ទំនងរវាងចិននិងសហភាពអឺរ៉ុបប៉ុណ្ណោះ។ ម្យ៉ាងវិញទៀត ជំនួយរបស់ចិន ចំពោះក្រុមប្រទេសPeco ក៏ជាចំណែកនៃមួយនៃនយោបាយ ផ្លូវមួយខ្សែក្រវ៉ាត់មួយ ផ្តួចផ្តើមឡើងដោយលោកស៊ី ជីនពីង ដើម្បីពង្រឹងហេដ្ឋារចនាសម្ព័ន្ធដឹកជញ្ជូនភ្ជាប់បីទ្វីប អាស៊ី-អឺរ៉ុប-អាហ្វ្រិក។
ឆ្លៀតក្នុងឱកាសនេះដែរ នាយករដ្ឋមន្ត្រីហុងគ្រី ដែលល្បីខ្លាំងខាងជាតិនិយម លោក វិចទ័រ អ័របង់ បានចាត់ទុកការវិនិយោគរបស់ចិន ថាជាឱកាសដ៏ប្រពៃរបស់អឺរ៉ុបទាំងមូល ដែលត្រូវឆក់យកឱ្យបាន។ សម្រាប់លោក អ័របង់ សហភាពអឺរ៉ុបមិនត្រូវទាញបិទទ្វារទេ ! ពិភពលោកមានការប្តូរផ្លាស់ ចិនមានប្រភពធនធានដែលអាចធានាការអភិវឌ្ឍន៍ណា ដែលមូលនិធិអឺរ៉ុបមិនអាចធ្វើបានតែម្នាក់ឯង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ