ប៉ាគីស្ថាន ៖ ប៉ូលិសនិងបាតុករអ៊ីស្លាមជ្រុលនិយមប្រឈមមុខដាក់គ្នាយ៉ាងហិង្សាដល់មានស្លាប់
ការគាស់បំបែកហ្វូងបាតុករ ដោយសន្តិវិធី កំពុងរាលដាលក្លាយជាការប៉ះទង្គិចគ្នាដ៏ហិង្សាមរណៈ។ មានប៉ូលិសម្នាក់បានស្លាប់ និងមនុស្សជាច្រើននាក់បានរងរបួស នៅថ្ងៃសៅរ៍ទី ២៥ វិច្ឆិកា នេះ នៅក្នុងការប្រឈមមុខដាក់គ្នារវាងកម្លាំងប៉ូលិស និងក្រុមបាតុករអ៊ីស្លាមជ្រុលនិយមរាប់រយនាក់ ដែលបានប្រមូលផ្តុំគ្នាបិទខ្ទប់ច្រកផ្លូវចូលរដ្ឋធានីអ៊ីស្លាម៉ាបាដ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
ប៉ូលិសនិងកងស្វ័យត្រានប្រមាណជាង៨៥០០នាក់ បានដាក់ពង្រាយនៅតាំងពីព្រលឹម និងបានទទួលបញ្ជាឱ្យធ្វើប្រតិបត្តិជម្លៀសហ្វូងបាតុករ ដោយសន្តិវិធី។ ប៉ុន្តែគ្រាន់តែប៉ូលិសគប់គ្រាប់បែកផ្សែង និងបាញ់គ្រាប់កៅស៊ូសំដៅហ្វូងបាតុករភ្លាម ពួកគេបាននាំគ្នាគប់ដុំថ្ម និងវត្ថុផ្សេងៗមកលើប៉ូលិសវិញ។ ជាលទ្ធផល ប៉ូលិសម្នាក់បានស្លាប់ដោយសារដុំគប់ត្រូវចំក្បាល និងមនុស្ស១៣៩នាក់រងរបួស ក្នុងនោះ៩៣នាក់ជាប៉ូលិស ព្រមទាំងចាប់ខ្លួនជាច្រើននាក់ផ្សេងទៀត។ នេះបើតាមសំដីរបស់អ្នកនាំពាក្យប៉ូលិស។
សូមបញ្ជាក់ថា តាំងពីថ្ងៃទី ៦ វិច្ឆិកាមក បាតុករដែលជាសកម្មជនអ៊ីស្លាមជ្រុលនិយម នៃចលនាTehreek-i-Laback Yah Rassool Allah Pakistan បានប្រមូលផ្តុំគ្នាបិទខ្ទប់ផ្លូវ ជាច្រកចូលដ៏សំខាន់មកកាន់រដ្ឋធានី អ៊ីស្លាម៉ាបាដ ដើម្បីទាមទាររដ្ឋមន្ត្រីក្រសួងយុត្តិធម៌ចុះចេញពីតំណែងបន្ទាប់ពីមានរឿងអាស្រូវចង់ធ្វើវិសោធនកម្មច្បាប់ប៉ះពាល់ដល់សាសនាអ៊ីស្លាម។ ការបិទខ្ទប់នេះបានធ្វើឱ្យរំខានជីវិតរស់នៅរបស់ប្រជាពលរដ្ឋរាប់ពាន់នាក់ និងបានធ្វើកុមារម្នាក់ស្លាប់ព្រោះដឹកទៅពេទ្យមិនទាន់។ មិនតែប៉ុណ្ណោះ ចលនាបាតុកម្មនេះបានទទួលការគាំទ្រច្រើនឡើងៗ និងបន្តរីករាលដាល ជារៀងរាល់ថ្ងៃ នៅតាមបណ្តាក្រុងសំខាន់ៗ និងធំៗរបស់ប៉ាគីស្ថាន ដូចជាក្រុងសេដ្ឋកិច្ចការ៉ាឈី ឡាអ័រ ជាច្រើន ។ល។ ក្រុមបាតុកររាប់រយនាក់ បាននាំដាក់របាំង ឃាំងផ្លូវចូលក្រុង ផ្លូវនាំទៅកាន់កំពង់ផែ ដែលសុទ្ធជាច្រកយុទ្ធសាស្ត្ររបស់ប្រទេស។ ហេតុដូច្នេះហើយបានជាប៉ូលិសសម្រេចចិត្តចេញធ្វើប្រតិបត្តិការបំបែក។
តាមការពិត តុលាការប៉ាគីស្ថាន បានបញ្ជាជាច្រើនលើកច្រើនសាមកហើយ ឱ្យប៉ូលិស គាស់រំលើងបញ្ចេញពួកបាតុករមិនឱ្យកាន់កាប់បិទខ្ទប់ផ្លូវ តាំងពីដំបូងភ្លាមម៉្លេះ ប៉ុន្តែរដ្ឋាភិបាលចង់ចៀសមិនប្រើកម្លាំង ព្រោះខ្លាចខាតប្រយោជន៍នយោបាយ ដោយការបោះឆ្នោតសភាកាន់តែខិតជិតចូលមកដល់។ រដ្ឋាភិបាលសុខចិត្តទៅនិយាយចរចា អស់រយៈពេលបីសប្តាហ៍ នៅតែមិនបានសម្រេច។
អ្នកវិភាគជាច្រើនយល់ថា ទង្វើឆ្គាំឆ្គង និងទន់ទ្រាយរបស់រដ្ឋាភិបាល ពីដំបូងនេះ អាចជាគ្រោះថ្នាក់ នាំឱ្យពួកអ្នកប្រឆាំងកាន់តែឡើងដៃចង់ផ្ចាញ់អាជ្ញាធរវិញទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ