ចិននឹងបញ្ជូនប្រេសិតពិសេសទៅកូរ៉េខាងជើង
ថ្ងៃសុក្រ១៧វិច្ឆិកាខានស្អែកនេះ លោក សុង តៅ Song Tao ជាបេសកជនពិសេសរបស់ចិន នឹងទស្សនកិច្ចនៅកូរ៉េខាងជើង។ ទិសដៅគឺដើម្បីផ្តល់ដំណឹងដល់ក្រុងព្យុងយ៉ាង ពីដំណើរការទាក់ទងសមាជបក្សកុម្មុយនិស្តចិន ដែលបានប្រព្រឹត្តទៅកាលពីពាក់កណ្តាលខែតុលា។ សារព័ត៌មានរដ្ឋកូរ៉េខាងជើងក៏បានគូសបញ្ជាក់ពីទស្សនកិច្ចរបស់លោកសុង តៅ ដែរ។
ចុះផ្សាយនៅថ្ងៃ៖ កែប្រែថ្ងៃទី៖
ដ្បិតថា ទស្សនកិច្ចរបស់តំណាងពិសេសចិននៅកូរ៉េខាងជើងផ្តោតលើការផ្តល់ដំណឹងពីសមាជបក្សកុម្មុយនិស្តចិន ទៅអោយកូរ៉េខាងជើងក៏ដោយចុះ ក៏គេមើលឃើញថា តំណាងពិសេសចិន លោកសុង តៅ ក៏អាចនឹងលើកឡើងពីបញ្ហានុយក្លេអ៊ែរកូរ៉េខាងជើង ជាមួយថ្នាក់ដឺកនាំកូរ៉េខាងជើងដែរ។
ដោយសាររឿងនុយក្លេអ៊ែរនេះ សប្តាហ៍មុន ប្រធានាធិបតីអាមេរិក លោកដូណាល់ ត្រាំ ទើបតែស្នើអោយលោកស៊ី ជីនពីង បន្ថែមសម្ពាធទៅលើក្រុងព្យុងយ៉ាងប៉ុណ្ណោះ។ ម្សិលមិញ លោកត្រាំបានបញ្ចប់ទស្សនកិច្ចរបស់លោកនៅអាស៊ី ជាទស្សនកិច្ចជំរុញអោយរកដំណោះស្រាយប្រឈមនឹងមហិច្ឆតាយោធាក្រុងព្យុងយ៉ាង។
ថ្ងៃសុក្រខាងមុខ តំណាងពិសេសចិនប្រហែលជាអាចជំរុញអោយកូរ៉េខាងជើងចូលតុចរចាឡើងវិញ។ ទស្សនកិច្ចរបស់លោកសុង តៅ ជាទស្សនកិច្ចលើកដំបូងរបស់មន្ត្រីជាន់ខ្ពស់ចិននៅកូរ៉េខាងជើង គិតតាំងពីទស្សនកិច្ចរបស់អនុរដ្ឋមន្ត្រីការបរទេសចិន លោកលីវ ហ្សិនមីង នៅកូរ៉េខាងជើងកាលពីខែតុលាឆ្នាំ២០១៦។ ទំនាក់ទំនងរវាងចិននិងកូរ៉េខាងជើងធ្លាក់ចុះដោយសារតែបញ្ហានុយក្លេអ៊ែររបស់ក្រុងព្យុងយ៉ាង។ ប្រធានាធិបតីចិន លោកស៊ី ជីនពីង មិនទាន់បានជួបផ្ទាល់ជាមួយលោកគឹម ជុងអ៊ុន ទេ គិតតាំងពីលោកគឹម ជុងអ៊ុន ឡើងដឹកនាំកូរ៉េខាងជើងនៅចុងឆ្នាំ២០១១មក។
ដោយឡែក ទោះបីជាលោកដូណាល់ ត្រាំ ប្រាប់ថា ចិនព្រមពង្រឹងទណ្ឌកម្មប្រឆាំងលោកគឹម ជុងអ៊ុន ក៏ថ្មីៗនេះ គេមិនទាន់ឃើញចិនបញ្ចេញទណ្ឌកម្មអ្វីថ្មីទៀតដែរ ក្រៅតែពីទណ្ឌកម្មកន្លងមក ដែលស្ថិតក្នុងក្របខណ្ឌនៃសេចក្តីសម្រេចរបស់អង្គការសហប្រជាជាតិ។
កន្លងមក ស្របតាមសេចក្តីសម្រេចអង្គការសហប្រជាជាតិ ចិនបានចេញទណ្ឌកម្មទាក់ទងនឹងការទិញរ៉ែនិងធ្យូងថ្មកូរ៉េខាងជើងរួចហើយដែរ។ ចិននៅតែប្រកាន់ជំហរការទូត និងភាពអត់ធ្មត់ ក្នុងការដោះស្រាយបញ្ហាកូរ៉េខាងជើង។ ដោយឡែក លោកដូណាល់ ត្រាំ និងលោកគឺម ជុងអ៊ុន នៅតែបន្តត្មះតិះដៀលគ្នាទៅវិញទៅមកដូចកូនក្មេង។ កាលពីពេលទស្សនកិច្ចនៅសេអ៊ូល សប្តាហ៍មុននេះ លោកត្រាំ ចោទលោកគឺម ថាជាមេដឹកនាំផ្តាច់ការ។ ខាងសារព័ត៌មានកូរ៉េខាងជើងវិញ បានតបថា លោកត្រាំ សមតែនឹងស្លាប់ដែលហ៊ានប្រមាថលោកគឹម ជុងអ៊ុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ