អាមេរិក-កូរ៉េខាងត្បូង ធ្វើសមយុទ្ធ មិនធ្លាប់មាន កំញើញកូរ៉េខាងជើង
នាវាយោធាកូរ៉េខាងត្បូងជាច្រើនគ្រឿង និងនាវាផ្ទុកយន្តហោះគ្រាក់ៗរបស់អាមេរិកចំនួនបីគ្រឿង បានជួបជុំគ្នានៅក្នុងមហាសមុទ្ទប៉ាស៊ីហ្វិកខាងលិច ដើម្បីធ្វើសមយុទ្ធ ទ្រង់ទ្រាយធំ មួយ។ កម្មវត្ថុនៃសមយុទ្ធ គឺសំដៅព្រមាននិងកំញើញកូរ៉េខាងជើង ឱ្យបោះបង់មហិច្ឆតានុយក្លេអ៊េរ ដែលជាប្រធានបទស្នូលនៃដំណើរទស្សនកិច្ចមួយជុំរបស់លោកត្រាំនៅអាស៊ី។
ចុះផ្សាយនៅថ្ងៃ៖
នេះជាលើកទីមួយ គិតចាប់ពី១០ឆ្នាំមក ដែលកូរ៉េខាងត្បូងនិងសហរដ្ឋអាមេរិកបានបើកធ្វើសមយុទ្ធក្នុងទ្រង់ទ្រាយបែបនេះ។ ចាប់ពីថ្ងៃនេះ និងសម្រាប់រយៈពេលបួនថ្ងៃ នាវាចម្បាំងកូរ៉េខាងត្បូងចំនួន៧គ្រឿង ក្នុងនោះបីជានាវាយោធាផ្នែកកម្ទេច បានទៅចូលរួមជាមួយនឹងក្រុមនាវាផ្ទុកយន្តហោះដ៏ធំរបស់អាមេរិកចំនួនបីគ្រឿង គឺ USS Ronal Reagan USS Nimitz និង USS Therodore Roosvelt ដើម្បីធ្វើសមយុទ្ធរួមគ្នា។
សមយុទ្ធមានទ្រង់ទ្រាយជាការធ្វើលំហាត់ការពារខ្លួន ល្បាតក្នុងដែនសមុទ្ទ តបតតាមផ្លូវអាកាស និងប្រតិបត្តិការផ្សេងទៀតជាច្រើន។ នេះបើតាមការគូសបញ្ជាក់របស់កងទ័ពអាមេរិក។
បើតាមប្រភពព័ត៌មានផ្តល់ដោយក្រសួងការពារជាតិកូរ៉េខាងត្បូងវិញ សមយុទ្ធនេះ គឺជាការពង្រឹងកម្លាំងកំញើញកូរ៉េខាងជើងដែលសាបព្រួសទង្វើគំរាមកំហែងនុយក្លេអ៊ែរនិងមីស៊ីលផង និងជាការបង្ហាញឱ្យឃើញអំពីសកម្មភាពត្រៀមរៀបជើងព្រួលជាស្រេចចាំសង្គ្រប់ លើគ្រប់ទង្វើបង្កហេតុរបស់ព្យុងយ៉ាង។
ប៉ុន្តែកូរ៉េខាងជើងមិនយល់ដូច្នេះទេ។ កន្លងមករបបព្យុងយ៉ាង តែងធ្វើការបរិហារ ជារហូតមកនូវរាល់គ្រប់សមយុទ្ធអាមេរិកកូរ៉េខាងត្បូងទាំងអស់ ថាជាសកម្មភាពត្រៀមវាយចូលឈ្លានពានដែនដីខ្លួន និងបានបញ្ចេញសកម្មភាពតបតវិញ តាមរយៈការធ្វើរៀបចំធ្វើសមយុទ្ធដែរ ឬក៏ជាបាញ់មីស៊ីលផង។
សមយុទ្ធអាមេរិក-កូរ៉េខាងត្បូងលើកនេះ ប្រព្រឹត្តនៅក្នុងខណៈដែលលោកដូណាល់ ត្រាំ ទើបបញ្ចប់ទស្សនកិច្ច នៅសេអ៊ូលនិងប៉េកាំង។ ជាទស្សនកិច្ចដែលគ្របដណ្តប់ស្ទើរតែស្រុងដោយសំណុំរឿងនុយក្លេអ៊ែរកូរ៉េខាងជើង។ នៅចំពោះមុខសភាជាតិកូរ៉េខាងត្បូង កាលពីថ្ងៃពុធ លោកត្រាំ បានព្រមានគីមជុងអ៊ុន កុំឱ្យមើលស្រាលសមត្ថភាពអាមេរិក ប៉ុន្តែ លោកត្រាំ ក៏បានបង្ហាញជំហរផ្សះផ្សា លាដៃហៅព្យុងយ៉ាងចូលចរចាដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ