ចិនបង្ហាញកប៉ាល់សង់កោះ ដ៏ធំមិនធ្លាប់មាន នៅអាស៊ី
ប្រទេសចិន នៅថ្ងៃសុក្រម្សិលមិញ បានដាក់បណ្តែតទឹក កប៉ាល់ បូម បឺតដីខ្សាច់ដ៏ធំជាងគេបង្អស់នៅអាស៊ី។ វិទ្យាស្ថានស្រាវជ្រាវ និងរចនាកងម៉ារីន បានហៅកប៉ាល់យក្សនោះថា កប៉ាល់ផលិតកោះ ដ៏អស្ចារ្យ ដែលមិនធ្លាប់មាននៅអាស៊ី។ នេះបើតាមការចុះផ្សាយរបស់កាសែតរដ្ឋចិន China Daily នៅថ្ងៃសៅរ៍ទី៤ វិច្ឆិកា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
កប៉ាល់ដែលក្រុមហ៊ុនវិស្វកម្មជើងទឹកចិន ដាក់បណ្តែតចុះទឹក នៅខេត្តជៀនសូ នៅថ្ងៃសុក្រម្សិលមិញ មានឈ្មោះថា ធានឃុន ទម្ងន់ ១ម៉ឺន ៧ពាន់តោន និងប្រវែង ១៤០ម៉ែត្រ។ ធានឃុនជាប្រភេទកប៉ាល់កាត់ បឺត និងបូមខ្សាច់ ដែលក្រុងប៉េកាំង ធ្លាប់ប្រើសម្រាប់សាងសង់កោះសិប្បនិម្មិត ក្នុងតំបន់មានជម្លោះ នៅសមុទ្រចិនខាងត្បូង។
តាមកាសែតរដ្ឋចិន China Daily ធានឃុន អស្ចារ្យជាងកប៉ាល់មុនៗ ព្រោះថា វាផលិតឡើងដោយក្រុមហ៊ុនក្នុងស្រុកចិន មានសមត្ថភាព បូមដីខ្សាច់ ឬដីឥដ្ឋ បាន ដល់ទៅ ៦ពាន់ម៉ែត្រគូប ក្នុងមួយម៉ោង ក្នុងជម្រៅទឹក ៣៥ម៉ែត្រ គឺស្មើនឹងការជីកបង្កើតអាងហែលទឹក ដល់ទៅបី។ កាសែតរដ្ឋចិន នៅបានលើកសរសើរថា កប៉ាល់បូមខ្សាច់ ធានឃុន ដែលដំណើរការដោយស្វ័យប្រវត្តិ មិនចាំបាច់មានមនុស្ស បញ្ជារជាអចិន្រ្តៃយ៍ នៅមានសមត្ថភាព បាញ់បញ្ជូន ដីខ្សាច់ ដីឥដ្ឋ ដល់ទៅចម្ងាយ ១៥គីឡូម៉ែត្រ។
សម្រាប់ វិទ្យាស្ថានស្រាវជ្រាវ និងរចនាកងម៉ារីន ដែលជាម្ចាស់គូរប្លង់ កប៉ាល់ ជាមួយបច្ចេកវិទ្យាទំនើប កប៉ាល់ធានឃុន អាចបូមដីខ្សាច់ កាត់ផ្កាថ្ម ប៉ប្រះទឹក តាមមាត់សមុទ្រ ឬ សាងសង់កោះសិប្បនិម្មិត ទោះក្នុងកាលៈទេសៈ អាកាសធាតុមិនល្អក្តី។ កប៉ាល់ ធានឃុន ត្រូវបានចាប់សាងសង់តាំងពីដើមឆ្នាំ ២០១៦ នឹងអាចដាក់ឲ្យដំណើរការពេញលេញ ចាប់ពីខែ មិថុនាឆ្នាំក្រោយ។ ធានឃុននឹងក្លាយជាកប៉ាល់ធំជាងគេ នៅអាស៊ី ដែលមានសមត្ថភាព ប្រែក្លាយតំបន់ថ្មប៉ប្រះទឹក ឲ្យទៅជាកូនកោះសិប្បនិម្មិត។ រហូតមកដល់ពេលនេះ ចិនប្រើកប៉ាល់ឈ្មោះ ធានជីង ដែលផលិតរួមគ្នា ដោយចិន និងអាល្លឺម៉ង់ ដើម្បីបូមដីខ្សាច់ សាងសង់កោះសិប្បនិម្មិត នៅក្នុងសមុទ្រចិនខាងត្បូង ជាទីដែលចិនកំពុងជាប់មានជម្លោះជាមួយ ហ្វីលីពីន វៀតណាម ម៉ាឡេស៊ី ព្រុយណេ និងតៃវ៉ាន់។
ចិនដែលទាមទារ គ្រប់គ្រងធ្វើជាម្ចាស់តែម្នាក់ឯង លើសមុទ្រចិនខាងត្បូង (ជាទីដែលមានចរាចរណ៍ទំនិញតម្លៃ ៥ពាន់ ពាន់លានដុល្លារអាមេរិក) ទើបអះអាងថ្មីៗនេះថា ខ្លួនទើបបញ្ចប់ ការសាងសង់ ហេដ្ឋារចនាសម្ព័ន្ធលើកោះសិប្បនិម្មិត នៅប្រជុំកោះSpratley។ អាមេរិកវិញ បាននិយាយថា ចិនបានចាប់ផ្តើមសាងសង់កោះសិប្បនិម្មិតផ្សេងទៀត នៅប្រជុំកោះ ប៉ារ៉ាសែល Paracel ក្នុងសមុទ្រចិនខាងត្បូង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ