បាត់ខ្លួនកាលពីឆ្នាំ២០១៥ អ្នករោងពុម្ពហុងកុងម្នាក់ ទំនងជាបានទទួលសេរីភាពវិញ
មានដើមកំណើតចិន សញ្ជាតិស៊ុយអែត លោក ហ្គី មិនហៃ Gui Minhai បុគ្គលិករោងពុម្ព Mighty Current នៅហុងកុង ដែលបានបាត់ខ្លួនរួមគ្នាជាមួយបុគ្គលិករោងពុម្ពបួននាក់ផ្សេងទៀត កាលពីចុងឆ្នាំ២០១៥ បានរួចទោសចេញពីពន្ធនាគារ និងអាចទាក់ទងមកគ្រួសារបានហើយ។ នេះបើតាមប្រភពព័ត៌មានទទួលបាន នៅថ្ងៃសុក្រទី ២៧តុលា២០១៧។ ប៉ុន្តែស្ថានការណ៍នៅច្របូកច្របល់ខ្លាំងនៅឡើយទាក់ទងនឹងសេរីភាពរបស់គេ។
ចុះផ្សាយនៅថ្ងៃ៖
ស្តាប់ - ០១:៤៤
លោក ហ្គី បានជួបនិយាយជាមួយកូនស្រី តាមទូរស័ព្ទរយៈពេល៤០នាទី កាលពីថ្ងៃព្រហស្បតិ៍ និង បានជួបម្តាយនិងបងប្អូន ព្រមទាំងភរិយា នៅនិងបូ Ningbo ក្នុងខេត្តស្ហេជាន Zhejiang ! នេះបើតាមការអះអាងរបស់លោក Jojje Olsson អ្នកកាសែតនិងអ្នកនិពន្ធស៊ុយអែត ដែលកំពុងស្ថិតនៅកោះតៃវ៉ាន់ ដើម្បីត្រៀមចេញសៀវភៅនិយាយអំពីប្រវត្តិរបស់លោក ហ្គី មិនហៃ។
ហើយនៅថ្ងៃសុក្រ នាងជាកូនស្រី ក៏បានអះអាងប្រាប់ភ្នាក់ងារសារព័ត៌មានបារាំងថា ពិតជាបានទទួលទូរស័ព្ទឪពុកមែន ប៉ុន្តែនាងបានព្រលយពាក្យថាមានរឿងច្រើនទៀតត្រូវបំភ្លឺ និងកុំអាលធ្វើសេចក្តីសន្និដ្ឋានអ្វីលឿនពេក។ តាមការពិតក្រុមគ្រួសារអ្នករោងពុម្ព រង់ចាំឃើញលោក ហ្គី បានទទួលសិទ្ធិចាកចេញពីទឹកដីចិនសិន។
អ្នកនាំពាក្យក្រសួងការបរទេសស៊ុយអែត បានគូសបញ្ជាក់ព័ត៌មានក្នុងន័យនេះដែរ តែមិនធ្វើអត្ថាធិប្បាយនិងមិនលម្អិតព័ត៌មានអ្វីទាំងអស់ ព្រោះត្រូវការពិគ្រោះជាមួយអាជ្ញាធរចិនលើចំណុចចោទជាច្រើន។
ហុងកុង៖ បាត់ខ្លួនអ្នកទទួលខុសត្រូវរោងពុម្ពម្នាក់ទៀត
សូមបញ្ជាក់ថា លោក ហ្គី មិនហៃ ជាអ្នករោងពុម្ព Mighty Current នៅ ហុងកុង ដែលមានឯកទេសខាងបោះសៀវភៅរិះគន់ទិតៀនរបបកុម្មុយនិស្តចិនដីគោក។ លោកបានបាត់ខ្លួនជាមួយមិត្តរួមការងារបួននាក់ផ្សេងទៀត ដោយចម្លែកបំផុត កាលពីចុងឆ្នាំ២០១៥។ មួយរយៈក្រោមមក ស្រាប់លោកបានលេចមុខនៅក្នុងពន្ធនាគារចិន ដោយអះអាងថាបានត្រលប់ទៅប្រទេសកមណើតដើម្បីទទួលទោសជាប់ឃុំឃាំងរាប់ឆ្នាំពីបទបើកបរបុកនិស្សិតម្នាក់ស្លាប់ក្នុងពេលស្រវឹង។ ប៉ុន្តែគ្មានអង្គការការពារសិទ្ធិមនុស្សណាជឿលើពាក្យសារភាពនោះទេ។
នៅឆ្នាំ២០១៥ លោកបានបាត់ខ្លួន ជាមួយអ្នករោងពុម្ព៤នាក់ផ្សេងទៀត ក្នុងពេល ចេញទៅវិស្សមកាលនៅប្រទេសថៃ។ គ្មាននរណាម្នាក់ដឹងអ្នកទាំង៥បាត់ទៅណា និង ត្រូវអាជ្ញាធរចិនយកទៅឃុំឃាំងនៅទីណាទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ