សមាជលើកទី ១៩ ៖លោកស៊ីជិនពីង បង្ហាញឆន្ទៈបើកចំហចិនទៅរកពិភពលោក
ចុះផ្សាយនៅថ្ងៃ៖
ស្តាប់ - ០៦:៤១
ក្រោយស្នូរទះដៃដ៏យូរ លោក ស៊ី ជីនពីង ប្រធានាធិបតីចិន បានបើកសមាជបក្ស លើកទី ១៩ នៅថ្ងៃពុធទី ១៨ តុលានេះ។ ប្រមុខដឹកនាំរបបក្រុងប៉េកាំង ដែលនឹងត្រូវសមាជជ្រើសរើសឱ្យបន្តតំណែង នៅអាណត្តិទីពីរ តាមច្បាប់ទម្លាប់ប្រទេស បានថ្លែងសុន្ទរកថា ផ្តោតខ្លាំងទៅលើការប្រយុទ្ធប្រឆាំងនឹងអំពើពុករលួយ និងការបើកចំហសេដ្ឋកិច្ចចិនទៅរកពិភពលោក។ តែសុន្ទរកថាលោក ក៏មានបង្កប់ខ្លឹមសារ ជាតិនិយម ខ្លាំងណាស់ដែរ ដោយប្តេជ្ញាអភិវឌ្ឍន៍ចិនឱ្យក្លាយជាប្រទេសសង្គមនិយមថ្មីទំនើប។
អ្វីៗសឹងត្រូវផ្អាកទាំងអស់នៅចិន សហគ្រាសក្រុមហ៊ុនឯកជនត្រូវបានសម្រាក ការប្រកួតកីឡាត្រូវហាមឃាត់ ក្លឹបកំសាន្តរាត្រីត្រូវបិទទ្វារសិននៅថ្ងៃនេះ មានតែប៉ូលិសទេដែលបង្ហាញវត្តមានស្ទើរគ្រប់ទិសទី ... ទាំងនេះគឺ ដើម្បីភាពរលូននៃសមាជបក្សកុម្មុយនិស្តចិន ដែលតែងតែណាត់ជួបគ្នាជារៀងរាល់៥ឆ្នាំម្តង។
អមដោយវត្តមានអតីតប្រធានាធិបតីចិនពីររូប លោក ស៊ីជីនពីង បានដើរចូលក្នុងសាលសមាជ ក្នុងទឹកមុខញញឹមពព្រាយ និងក្រោមស្នូរដៃទះស្ទើរកក្រើកសាល។ លោក បានផ្តើមបើកកម្មវិធី ជាមួយនឹងសុន្ទរកថាដ៏វែងអន្លាយ ប្រកបដោយអត្ថន័យជាតិនិយម និងជួនបែបសំឡុតគំរាមផង។
សូមអាន ៖ សមាជបក្សកុម្មុយនិស្តចិន ឱកាសពង្រឹងអំណាចរបស់លោកស៊ីជីនពីង
បើកចំហរកពិភពលោក
នៅចំពោះមុខប្រតិភូ ចំនួន២២៨០នាក់ ក្នុងរយៈពេលបីម៉ោងកន្លះ បុរសខ្លាំងរបស់សាធារណរដ្ឋប្រជាមានិតចិន បានបង្ហាញតុល្យការដឹកនាំប្រទេសរយៈពេល៥ឆ្នាំ របស់លោក ! ៥ឆ្នាំប្រកបដោយភាពជឿនលឿនដែលកំពុងនាំចិនឱ្យសម្រេចក្តីស្រមៃរបស់ខ្លួន គឺចិនជាជាតិដ៏ធំ។ សុបិនរបស់លោក ស៊ីជីនពីងដែលចង់ឃើញចិនជាមហាអំណាច និងកំពុងប្រយុទ្ធតស៊ូ ដណ្តើមយកឈ្មោះជាមហាអំណាចលំដាប់លេខមួយលើពិភពលោក។ ដើម្បីសម្រេចគោលដៅនេះ លោក ស៊ី ជីនពីងបានតាំងខ្លួនជាអ្នកការពារសេដ្ឋកិច្ចពិភពលោកបែបបើកចំហ ! ដោយអំពាវនាវឱ្យចិនបើកចំហសេដ្ឋកិច្ច សម្រួលការវិនិយោគបរទេស ដោយទីផ្សារជាអ្នកដើរតួសម្រេចក្នុងសេដ្ឋកិច្ច ហើយការអភិវឌ្ឍរបស់ចិនមិនមែនជាការគំរាមកំហែងនរណាម្នាក់ឡើយ។ លោកស៊ីជីនពីង បានសន្យាថា ចិននឹងរក្សាការធ្វើកំណែទម្រង់រចនាសម្ព័ន្ធរបស់ខ្លួន កាត់បន្ថយការសមត្ថភាពខ្លាំងជ្រុលផ្នែកផលិតផលជ្រុ និងបន្តប្រឹងប្រែងដោះបំណុល។
ជាសរុបទៅ លោកស៊ីជីនពីងចង់ធានារ៉ាប់រងប្រាប់ពិភពលោកថាចិននឹងកាន់តែបើកចំហ ហើយសន្យាផ្តល់សមភាពដល់ក្រុមហ៊ុនបរទេស ! បន្តធ្វើទំនើបកម្មយោធា ដើម្បីឱ្យកងទ័ពចិនក្លាយជាកម្លាំងធំជាងគេនៅលើពិភពលោក នៅឆ្នាំ២០៥០។ ប្រធានាធិបតីចិន ការពារយ៉ាងមុះមុត នយោបាយការពារបូរណភាពដែនដី និងគោលការណ៍ចិនតែមួយ ដោយបានទប់ស្កាត់តៃវ៉ាន់ មិនឱ្យទាមទារឯករាជ្យបានទេ នារយៈពេល៥ឆ្នាំកន្លងមកនេះ។
ប្រយុទ្ធប្រឆាំងនឹងអំពើពុករលួយ
បើតាមប្រសាសន៍របស់លោកស៊ីជីនពីង អំពើពុករលួយជាតំណាងនៃការគំរាមកំហែងខ្លាំងសម្រាប់បក្ស លំដាប់លេខមួយ។ លោកប្រធានាធិបតីមានមោទនភាពណាស់ ក្នុងយុទ្ធនាការប្រយុទ្ធប្រឆាំងនឹងអំពើពុករលួយនេះ ព្រោះក្នុងរយៈពេល៥ឆ្នាំកន្លងមកនេះ មានជនកុម្មុនិសជាង១លាន៤សែននាក់បានជាប់សំណាញ់ច្បាប់។ លោកបានព្រមានថា សំណាញ់បង់ចាប់ជនពុករលួយនឹងកាន់តែល្អិត ប្រតិបត្តិការនេះគ្មានថ្ងៃបិទបញ្ចប់ទេ ហើយកំពុងបន្តសកម្មភាពអត់ដាច់។
នៅក្នុងសុន្ទរកថាដែលក៏ជាឱកាសបង្ហាញទស្សនៈវិស័យដឹកនាំចិន រហូតដល់ឆ្នាំ២០៥០ ប្រធានាធិបតីចិន បានសន្យាបើកសករាជថ្មីឱ្យរបបសង្គមនិយមចិន ! ថ្វីបើលោកមានរសនិយមផ្នែកបើកចំហសេដ្ឋកិច្ចមែន ប៉ុន្តែខាងផ្នែកនយោបាយ លោកបានចាក់សោរការពារ មិនឱ្យមានការប៉ុនប៉ង បើកចំហរបបកុម្មុយនិស្តឡើយ។ ប្រព័ន្ធនយោបាយចិន ត្រូវតែមានលក្ខណៈពិសេសជារបស់ចិន គ្មានការចម្លងពីប្រទេសណាទេ។
លោកបានអំពាវនាវឱ្យសមាជិកទាំងអស់ការពារអំណាចរបស់បក្ស និងប្រព័ន្ធសង្គមនិយមរបស់ចិន ហើយត្រូវប្រឆាំងដាច់ខាតរាល់គ្រប់ពាក្យ គ្រប់សកម្មភាពដែលនាំឱ្យមានការប៉ះពាល់ តែត្រូវហ៊ានចេះសំឡឹងឆ្ងាយ បើកចិត្តទទួលការធ្វើកំណែទម្រង់ និងទំនើបកម្ម។ ភាពសុខដុម ស្ថិរភាព និងពិសេស ស្មោះត្រង់នឹងលទ្ធិសង្គមនិយម គឺពាក្យគន្លឹះ របស់សុន្ទរកថា។
ត្រៀមជើងព្រួលអំណាច ?
សមាជនេះជាឱកាសបក្សកុម្មុយនិស្តចិន ត្រូវធ្វើការជ្រើសរើសសមាជិកស្ថាប័នដឹកនាំរបស់ខ្លួន។ មានកៅអីទំនេរក្នុងស្ថាប័នកំពូលៗរបស់ជាច្រើន នៅទំនេរ ត្រូវរកឥស្សរជនថ្មីមកជំនួស។ ព្រោះថ្នាក់ដឹកនាំចាស់ខ្លះ ត្រូវចូលនិវត្តន៍ ខ្លះត្រូវផ្តួលកម្ចាត់ចេញ ៖ សមាជិកគណៈកម្មការអចិន្ត្រៃយ៍៥រូបក្នុងចំណោម៧រូប សមាជិកការិយាល័នយោបាយ១២ក្នុងចំណោម២៥ និងសមាជិកគណៈកម្មាធិការមជ្ឈិមយោធា៥ក្នុងចំណោម១១រូប ត្រូវប្តូរ។ សមាជក៏នឹងត្រូវជើសតាំងគណៈកម្មការវិន័យមជ្ឈិមបក្ស ដែលលោកស៊ីជីនពីងផ្តល់តម្លៃឱ្យខ្លាំងណាស់។
ប៉ុន្តែ តាមការពិតទៅ កម្មវត្ថុគោលចុងក្រោយនៃសមាជនេះ គឺការរៀបជើងព្រួល “ស្ថិរភាពនៃអន្តរកាលនយោបាយ” ! សមាជត្រូវរៀបចំឡើង ទៅតាមក្បួនច្បាប់ តែជាផ្លូវការ ឬមិនផ្លូវការ ដើម្បីបញ្ចៀសកុំឱ្យមានហេតុការណ៍អ្វីមួយកើតឡើងបានដោយឥតគ្រោងទុក ដោយតក់ក្រហល់ ឬដោយផែនការសម្ងាត់ ព្រោះវាជិតដល់ពេល ដែលចិនត្រូវគិតគូរស្វែងរកអ្នកបន្តតំណែងថ្មីហើយ។ ម្យ៉ាងវិញទៀត នាឱកាសសមាជនេះ បក្សគ្រោងនឹងវិសោធនកម្មរដ្ឋធម្មនុញ្ញ ស្តីអំពីការបញ្ចូលគោលគំនិតនយោបាយបែបស៊ីជីនពីង ពោលគឺការលើកកិត្តិយសឱ្យលោកស៊ីជីនពីង ឱ្យស្មើនឹងប្រមុខមៅសេទុង និងតេង ស៊ាវពីង ដែលពុំធ្លាប់ផ្តល់ឱ្យប្រធានាធិបតីចិនផ្សេងណាទៀតឡើយ។
ឯការកំរិតអាយុឥស្សរជនអាចចូលក្នុងគណៈកម្មការនយោបាយត្រឹម៦៨ឆ្នាំ ទំនងជាត្រូវរលុបបាត់ផង ក្រោយការបិទបញ្ចប់សមាជលើកទី១៩នេះផង។ នេះតាមការកាត់យល់អំពីបំណងរបស់លោកស៊ីជីនពីង ព្រោះ នៅឆ្នាំ២០២២ លោកនឹងមានអាយុ៦៩ឆ្នាំ ដូច្នេះលោកមិនអាចក្លាយជាសមាជិកគណៈកម្មការការិយាល័យនយោបាយទេ។ អញ្ចឹងគឺមានតែដើរតាមក្បួនលោកពូទីន អស់តំណែងប្រធានាធិបតីមែន តែត្រូវរិះរកវិធីចូលក្នុងស្ថាប័នបក្សដែលមានអំណាចពិតខាងនាំប្រទេស ទើបរក្សាអំណាចបានយូរអង្វែង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ