ប្រទេសបង់ក្លាដែសព្រួយបារម្ភពីលំហូរជនជាតិភាគតិចរ៉ូហ៊ីងយ៉ាពីប្រទេសឥណ្ឌា
នៅថ្ងៃអាទិត្យ ទី១៥ តុលា ថ្នាក់ដឹកនាំក្នុងស្រុកមួយនៃប្រទេសបង់ក្លាដែសបានប្រកាសឲ្យដឹងពីការពង្រឹងសន្តិសុខនៅតាមបណ្តោយព្រំដែនជាមួយប្រទេសឥណ្ឌានៅប៉ែកខាងលិច។ គោលដៅ គឺដើម្បីទប់ស្កាត់លំហូរជាយថាហេតុនៃជនជាតិភាគតិចរ៉ូហ៊ីងយ៉ាពីប្រទេសឥណ្ឌា។ ឥណ្ឌាដែលបានប្រកាសឲ្យដឹងនាខែសីហាកន្លងទៅថ្មីៗនេះថា ខ្លួនត្រៀមខ្លួននឹងបញ្ជូនពួករ៉ូហ៊ីងយ៉ាទាំងអស់ទៅកាន់ប្រទេសបង់ក្លាដែស បូកទាំងពួករ៉ូហ៊ីងយ៉ាដែលឧត្តមស្នងការសហប្រជាជាតិទទួលបន្ទុកជនភៀសខ្លួនទើបបានចុះឈ្មោះទទួលស្គាល់ជាជនភៀសខ្លួនផង។
ចុះផ្សាយនៅថ្ងៃ៖
ស្តាប់ - ០២:១១
ការដើរល្បាត និងវិធានការរឹតបន្តឹងសន្តិសុខរបស់រដ្ឋអំណាចបង់ក្លាដែសត្រូវបានធ្វើឡើងនៅតាមបណ្តាយព្រំដែនជាមួយរដ្ឋឥណ្ឌាស្ថិតភាគឦសាន ហើយឆ្មាំព្រំដែនបានទទួលបញ្ជាឲ្យចាប់បញ្ជូនពួករ៉ូហ៊ីងយ៉ាចូលក្នុងទឹកដីឥណ្ឌាវិញ បើពួកនេះហ៊ានឆ្លងកាត់ខ្សែព្រំដែន។ វរសេនីយ៍ឯកហាគីម មេបញ្ជាការឆ្មាំព្រំដែនបង់ក្លាដែសប្រចាំតំបន់មួយបានបញ្ជាក់ប្រាប់ AFP ថា មានជនជាតិភាគតិចរ៉ូហ៊ីងយ៉ាជាច្រើននាក់កំពុងប្រមូលផ្តុំគ្នានៅត្រើយម្ខាងនៃទន្លេដែលខ័ណ្ឌចែកប្រទេសឥណ្ឌា និងបង់ក្លាដែស និងថា ពួកគេតែងព្យាយាមឆ្លងដែនទៅជួបជុំក្រុមគ្រួសាររបស់គេនៅបង់ក្លាដែស។
តាមតួលេខផ្លូវការ មានជនជាតិភាគតិចរ៉ូហ៊ីងយ៉ាចំនួន ១៦ ០០០នាក់កំពុងរស់នៅលើទឹកដីឥណ្ឌា តែតួលេខក្រៅផ្លូវការឲ្យដឹងថា មានរហូតដល់ទៅ ៤០ ០០០នាក់។ នៅក្នុងខែសីហាកន្លងទៅថ្មីៗនេះ រដ្ឋអំណាចឥណ្ឌាដែលលើកហេតុផលសន្តិសុខបានប្រកាសឲ្យដឹងថា ខ្លួនត្រៀមចាប់បញ្ជូនពួករ៉ូហ៊ីងយ៉ាទាំងអស់ដែលកំពុងមានវត្តមានលើទឹកដីឥណ្ឌាទៅកាន់បង់ក្លាដែស រាប់ទាំងពួករ៉ូហ៊ីងយ៉ាដែលឧត្តមស្នងការសហប្រជាជាតិទទួលបន្ទុកជនភៀសខ្លួនចុះឈ្មោះទទួលស្គាល់ជាជនភៀសខ្លួនផង។
ទង្វើរបស់ក្រុងញូដែលីកាលណោះបានទទួលរងការរិះគន់ ទិតៀនយ៉ាងចាស់ដៃពីសំណាក់ក្រុមអង្គការការពារសិទ្ធិមនុស្ស។ នៅខាងឥណ្ឌា ឆ្មាំព្រំដែនម្នាក់ដែលមិនព្រមបញ្ចេញឈ្មោះធ្លាប់បានបញ្ជាក់ប្រាប់ AFP ថា ពួករ៉ូហ៊ីងយ៉ានៅបង់ក្លាដែសក៏បានព្យាយាមឆ្លងដែនទៅឥណ្ឌា និងដែលក្រុមអ្នកល្បាតតាមព្រំដែនចាប់ប្រគល់ទៅឲ្យប៉ូលិស។ តែចាប់ពីពេលនេះតទៅ គឺត្រូវចាប់បញ្ជូនពួកគេឲ្យត្រឡប់ទៅបង់ក្លាដែសវិញ។ នៅខាងបង់ក្លាដែស អ្នកទទួលខុសត្រូវឆ្មាំព្រំដែនម្នាក់បានអះអាងថា អ្នកស្រុក អ្នកភូមិបានចូលរួមសហការណ៍ជាមួយកងល្បាត និងឆ្មាំព្រំដែនដើម្បីទប់ស្កាត់ការរត់ឆ្លងដែនរបស់ពួករ៉ូហ៊ីងយ៉ាពីប្រទេសឥណ្ឌា។
សូមជម្រាបជូនថាសព្វថ្ងៃ មានជនជាតិភាគតិចរ៉ូហ៊ីងយ៉ារត់ពីភូមាជាងកន្លះលាននាក់កំពុងជ្រកកោណលើទឹកដីបង់ក្លាដែស។ តែរដ្ឋាភិបាលទីក្រុងដាកាមានការស្ទាក់ស្ទើរទទួលបន្ថែមទៀតដោយសារតែប្រឈមនឹងបញ្ហាមនុស្សធម៌៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ