ជប៉ុន៖លោកនាយករដ្ឋមន្រ្តីស្ហ៊ីនហ្សូ អាបេសន្យាដាក់គំនាបខ្លាំងលើកូរ៉េខាងជើង
នៅក្នុងប្រទេសជប៉ុន លោកនាយករដ្ឋមន្រ្តីស្ហ៊ីនហ្សូ អាបេបានសន្យានាថ្ងៃអាទិត្យ ទី៨ តុលាថា នឹងដាក់គំនាបលើកូរ៉េខាងជើងឲ្យខ្លាំងដែលអាចធ្វើបាន និងការពាររក្សាសន្តិសុខជាតិ។ លោកអាបេបាននិយាយយ៉ាងដូច្នេះនៅក្នុងកម្មវិធីតស៊ូមតិតាមទូរទស្សន៍រវាងលោកអាបេ និងចៅក្រុងតូក្យូសម្រាប់ការបោះឆ្នោតសភាមុនកាលកំណត់ដែលគ្រោងរៀបចំនៅថ្ងៃទី២២ តុលាខាងមុខ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥២
« ការដាក់គំនាបខ្លាំងលើកូរ៉េខាងជើងនឹងអាចបង្កើតឲ្យមានស្ថានការណ៍មួយដែលបង្ខំរបបក្រុងព្យុងយ៉ាងឲ្យចូលតុចរចាក៏ដូចជាការផ្លាស់ប្តូរនយោបាយ » នេះជាការថ្លែងរបស់លោកស្ហ៊ីនហ្សូ អាបេនៅក្នុងកម្មវិធីតស៊ូមតិតាមទូរទស្សន៍ជាមួយលោកយូរីកូ ចៅហ្វាយក្រុងតូក្យូ និងជាប្រធានគណបក្សនយោបាយទើបបង្កើតថ្មីឈ្មោះគណបក្សនៃក្តីសង្ឃឹម។ កម្មវិធីតស៊ូមតិរវាងលោកអាបេ និងលោកស្រីយូរីកូបានធ្វើឡើងនៅក្នុងក្របខណ្ឌនៃយុទ្ធនាការឃោសនាបោះឆ្នោតសភាមុនកាលកំណត់ដែលគ្រោងរៀបចំនៅថ្ងៃទី២២ តុលាខាងមុខ។
គួររម្លឹកជូនថា លោកនាយករដ្ឋមន្រ្តីអាបេខ្លួនឯងបានប្រកាសក្នុងខែកញ្ញាកន្លងទៅពីការរៀបចំបោះឆ្នោតសភាមុនកាលកំណត់ដោយសង្ឃឹមថា នឹងអាចបន្តអាណត្តិរបស់លោកក្នុងពេលដែលភាពតានតឹងជាមួយកូរ៉េខាងជើងកំពុងឡើងខ្លាំង បន្ទាប់ពីរបបក្រុងព្យុងយ៉ាងបានសាកល្បងគ្រាប់បែកនុយក្លេអ៊ែរ និងបាញ់គ្រាប់មីស៊ីលបាលីស្ទិកចំនួនពីរគ្រាប់ហោះឆ្លងកាត់ទឹកដីជប៉ុន។ នៅក្នុងការបោះឆ្នោតសភាខាងមុខ គណបក្សសេរីប្រជាធិបតេយ្យរបស់លោកអាបេដែលធ្លាប់បានកាន់អំណាចច្រើនដងក្នុងសម័យក្រោយសង្រ្គាមបាននាំមុខគេ តែមិនអាចធានាថានឹងទទួលបានអសនៈ ២ភាគ៣ នៃ ៤៦៥អសនៈនៅក្នុងសភាទេ។
អ្វីដែលលោកអាបេសង្ឃឹម គឺទទួលបានអសនៈ ២ភាគ៣ ដើម្បីអនុញ្ញាតឲ្យលោកកែប្រែរដ្ឋធម្មនុញ្ញសន្តិភាពនិយមរបស់ជប៉ុនសព្វថ្ងៃ។ មានគណបក្សធំៗចំនួន ៣ ដែលកំពុងប្រជែងគ្នាខ្លាំងនាការបោះឆ្នោតសភាខាងមុខ គឺគណបក្សសេរីប្រជាធិបតេយ្យរបស់លោកអាបេ គណបក្សប្រជាធិបតេយ្យ និងគណបក្សនៃក្តីសង្ឃឹមដែលទើបបង្កើតថ្មីរបស់លោកចៅក្រុងតូក្យូយូរីកូ។ លោកយូរីកូដែលកំពុងមានប្រជាប្រិយភាពខ្លាំងបានបញ្ជាក់ថា លោកនឹងបិទបញ្ចប់ទំព័រសករាជនៃនយោបាយចាស់គំរិលរបស់គណបក្សសេរីប្រជាធិបតេយ្យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ