ចិនបានជាប់ចោទពីបទប្រើយន្តការណ៍អង្គការអាំងទែប៉ូលដើម្បីប្រយោជន៍នយោបាយ
ចុះផ្សាយនៅថ្ងៃ៖
ស្តាប់ - ០៥:២១
នៅថ្ងៃអង្គារ ទី២៦ កញ្ញានេះ អង្គការអាំងទែប៉ូល (Interpol) បានផ្តើមកិច្ចប្រជុំរយៈពេល ៤ថ្ងៃនៅក្នុងទីក្រុងប៉េកាំង ប្រទេសចិន។ គឺជាកិច្ចប្រជុំបិទទ្វារដោយមានការចូលរួមពីថ្នាក់ដឹកនាំប៉ូលិស និងថ្នាក់ដឹកនយោបាយក្នុងលោកសរុបប្រមាណជា ១ ០០០នាក់។ កម្មវត្ថុនៃកិច្ចប្រជុំ គឺដើម្បីនិយាយពីភេរវនិយមអន្តរជាតិ ឧក្រិដ្ឋកម្មរៀបចំទុកមុន ឬមួយក៏ការវាយប្រហារតាមអ៊ីនធឺណែតជាដើម។ អ្វីជាការកត់សម្គាល់ ចិនក្នុងនាមជាម្ចាស់ផ្ទះរៀបចំកិច្ចប្រជុំអង្គការអាំងទែប៉ូលបានជាប់ចោទពីបទប្រើយន្តការណ៍របស់អង្គការអន្តរជាតិមួយនេះដើម្បីប្រយោជន៍នយោបាយ។
អាំងទែប៉ូល ឬអាចហៅម្យ៉ាងទៀតថា អង្គការប៉ូលិសព្រហ្មទ័ណ្ឌអន្តរជាតិ គឺជាអង្គការអន្តរជាតិមួយដែលបានចាប់កំណើតឡើងក្នុងថ្ងៃទី៧ កញ្ញា ឆ្នាំ ១៩២៣ និងមានគោលដៅដោះដូរព័ត៌មាន និងលើកកម្ពស់កិច្ចសហប្រតិបត្តិការរវាងកម្លាំងប៉ូលិសនៅក្នុងប្រទេសសមាជិកទាំង ១៩០ប្រទេសក្នុងលោក។ បច្ចុប្បន្ន អង្គការអន្តរជាតិមួយនេះមានទីស្នាក់ការកណ្តាលនៅក្នុងខេត្តលីយ៉ុង (Lyon) ប្រទេសបារាំង។ តួនាទីរបស់កម្លាំងប៉ូលិសអន្តរជាតិអាំងទែប៉ូល គឺតាមស្វែងរក និងចាប់ខ្លួនឧក្រិដ្ឋជនដែលបានប្រព្រឹត្តបទល្មើសព្រហ្មទ័ណ្ឌនៅក្នុងប្រទេសសមាជិកណាមួយ និងដែលប្រទេសនោះបានចេញដីការអន្តរជាតិស្វែងរកចាប់ខ្លួន។
ជាទូទៅ ព័ត៌មានទាក់ទងនឹងឧក្រិដ្ឋជនតាមចាប់ខ្លួនផ្តល់ដោយប្រទេសសមាជិកណាមួយមានភ្ជាប់ដោយប្រវត្តិ និងអត្តសញ្ញាណរបស់រូបឧក្រិដ្ឋជន ហើយដែលព័ត៌មានទាំងអស់នេះត្រូវបានផ្សព្វផ្សាយនៅក្នុងប្រទេសសមាជិកទាំង ១៩០ប្រទេស។ តែនៅពេលដែលឧក្រិដ្ឋជនតាមចាប់ខ្លួនត្រូវបានឃាត់ខ្លួនដោយកម្លាំងប៉ូលិសនៅក្នុងប្រទេសណាមួយ ប្រទេសនោះត្រូវបញ្ជូន ឬមិនបញ្ជូនរូបឧក្រិដ្ឋជនទៅឲ្យប្រទេសដែលសុំអន្តរាគមន៍ពីអាំងទែប៉ូល គឺវាអាស្រ័យទាំងស្រុងលើកិច្ចព្រមព្រៀងរវាងប្រទេសទាំងពីរ ពោលថាតើប្រទេសទាំងពីរមានកិច្ចព្រមព្រៀងបត្យាប័នរវាងគ្នា ឬអត់?។
មានជនជាតិយ៉ាងតិច ២ ៥០០នាក់ត្រូវបានបញ្ជូនទៅឲ្យរដ្ឋអំណាចចិន
សម្រាប់ប្រទេសចិន និងក្នុងពេលដែលលោកប្រធានាធិបតីចិនស៊ី ជីនពីងកំពុងបន្តយុទ្ធនាការកំចាត់ជនពុករលួយគ្រប់ជាន់ថ្នាក់នៅក្នុងជួរថ្នាក់ដឹកនាំ អង្គការអាំងទែប៉ូលជាឧបករណ៍មួយយ៉ាងសំខាន់មិនអាចខ្វះបានសម្រាប់តាមប្រម៉ាញ់ឧក្រិដ្ឋជនចិនដែលកំពុងភៀសខ្លួនពួនសំងំនៅឯបរទេស។
តួលេខផ្តល់ដោយរដ្ឋអំណាចចិនឲ្យដឹងថា មានជនជាតិចិនរស់នៅបរទេសមិនតិចជាង ២ ៥០០នាក់ទេត្រូវបានចាប់បញ្ជូនទៅចិនវិញក្នុងបទជាប់សង្ស័យនឹងឧក្រិដ្ឋកម្មសេដ្ឋកិច្ច។ ទន្ទឹមគ្នានេះ ចិនក៏បានប្រើយន្តការណ៍អាំងទែប៉ូលដើម្បីតាមចាប់ឧក្រិដ្ឋជនជនជាតិចិននៅបរទេសដែលបានចាប់ជំរិតជនជាតិចិនគ្នាឯងនៅបរទេសដើម្បីបង្ខំឲ្យក្រុមគ្រួសារក្នុងស្រុកបង់លុយ។
វាពិតជារឿងល្អដែលចិនបានប្រើយន្តការណ៍អាំងទែប៉ូលដើម្បីប្រឆាំងនឹងឧក្រិដ្ឋកម្មផ្សេងៗប្រព្រឹត្តិដោយជនជាតិចិននៅបរទេស ឬមួយដោយជនជាតិចិនក្នុងស្រុក រួចគេចខ្លួនទៅពួនសំងំនៅបរទេស។ ម្យ៉ាងទៀត ទង្វើរបស់ចិនរបៀបនេះក៏មានគោលដៅការពារជនជាតិខ្លួនដែលបាន និងកំពុងបោះទុនរកស៊ីនៅបរទេសកាន់តែច្រើនឡើងៗ។ តែអ្វីដែលជាក្តីបារម្ភរបស់បស្ចិមលោកក៏ដូចជាក្រុមអង្គការការពារសិទ្ធិមនុស្ស គឺការដែលចិនបានប្រើយន្តការណ៍អន្តរជាតិមួយនេះដើម្បីជំរះបញ្ជីជាមួយក្រុមប្រឆាំងខ្លួនដែលកំពុងភៀសខ្លួនជ្រកកោននៅបរទេស។
លោក Wei JingCheng សកម្មជនប្រឆាំងរដ្ឋអំណាចចិនដែលបានភៀសខ្លួនទៅអាមេរិកតាំងពីឆ្នាំ ១៩៩៧ បានថ្លែងថា លោកបារម្ភខ្លាចរដ្ឋាភិបាលចិនប្រើយន្តការណ៍អាំងទែប៉ូលដើម្បីទាមទារឲ្យមានការចាប់បញ្ជូនសកម្មជនប្រឆាំងចិនទាំងអស់ទៅឲ្យរដ្ឋអំណាចចិន។ ក្តីបារម្ភនេះបានកើតមានឡើង ចំពេលដែលរដ្ឋអំណាចចិនបានចេញដីការអន្តរជាតិចាប់ខ្លួនមហាសេដ្ឋីចិនម្នាក់ឈ្មោះ Guo Wengui តាំងពីខែមេសា។ លោក Guo ដែលកំពុងរស់នៅសហរដ្ឋអាមេរិកបានអះអាងថា លោកមានភស្តុតាងគ្រប់គ្រាន់ដែលបញ្ជាក់ពីអំពើពុករលួយរបស់ថ្នាក់ដឹកនាំកំពូលរបស់ចិន។ តែអាមេរិកកំពុងពិចារណាពីការបញ្ជូន ឬមិនបញ្ជូនលោក Guo ទៅឲ្យចិនវិញ។
ចិនបានច្រានចោលការចោទប្រកាន់លើខ្លួន
ក្រសួងការបរទេសចិនតាមរយៈអ្នកនាំពាក្យបានបញ្ជាក់តាំងពីសប្តាហ៍កន្លងទៅថា ការបារម្ភលើចិនពីបទបានប្រើយន្តការណ៍អាំងទែប៉ូលដើម្បីប្រយោជន៍នយោបាយជារឿងយល់ច្រឡំ និងគ្មានភស្តុតាងជាក់ស្តែង។ រូបអ្នកនាំពាក្យដដែលបានបន្ថែមថា កិច្ចសហប្រតិបត្តិការរបស់ចិននៅក្នុងអង្គការអាំងទែប៉ូលមានគោលដៅកាត់បន្ថយទង្វើឧក្រិដ្ឋកម្មរបស់ជនជាតិចិនដែលបានប្រព្រឹត្តបទល្មើសក្នុងស្រុក និងបែរជាបានរត់ទៅពួកសំងំនៅបរទេស។ ក្រៅពីការចោទលើចិន អង្គការអាំងទែប៉ូលខ្លួនឯងក៏បានទទួលការចោទប្រកាន់ពីភាពលំអៀងនៅក្នុងកិច្ចការរបស់ខ្លួនដែរ។
នៅត្រង់ចំណុចនេះ អង្គការអាំងទែប៉ូលបានបដិសេធ និងរម្លឹកពីមាត្រាទី៣ នៃលក្ខន្តិកៈរបស់ខ្លួនថា អាំងទែប៉ូលមិនអាចចូលខ្លួនទៅអន្តរាគមន៍លើសកម្មភាពណាដែលមានចរិកនយោបាយ យោធា សាសនា ឬការប្រកាន់ពូជសាសន៍ទេ។ តែទោះជាយ៉ាងនេះក្តី ការប្រើយន្តការណ៍អាំងទែប៉ូលពីសំណាក់មហាអំណាចចិនដើម្បីកេងចំណេញសេដ្ឋកិច្ច និងនយោបាយពិតជាមានតិច ឬច្រើនក្តី នេះបើតាមយល់ឃើញរបស់ក្រុមអ្នកជំនាញរបស់ប្រទេសចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ