គីម ជុងអ៊ុន គំរាមលោក ដូណាល់ ត្រាំ ចំៗ ដោយការបំផ្ទុះគ្រាប់បែកH
ចុះផ្សាយនៅថ្ងៃ៖
កូរ៉េខាងជើង និងសហរដ្ឋអាមេរិក កំពុងឆ្លើយឆ្លងសង្គ្រាមពាក្យសំដីគ្នា ! ក្រោមសម្ពាធដ៏ធ្ងន់ពីអង្គការសហប្រជាជាតិ និងក្រោយពីសហរដ្ឋអាមេរិកបានប្រកាសបន្ថែមទណ្ឌកម្មលើកូរ៉េខាងជើង លោក គីម ជុងអ៊ុន បានចេញថ្លែងការណ៍ឆ្លើយតប ដោយបុគ្គលផ្ទាល់ និងដោយចំៗ ហៅលោកដូណាល់ ត្រាំ ថាជាមនុស្សមានរោគចិត្ត និងបានសន្យាបន្តអភិវឌ្ឍន៍កម្មវិធីនុយក្លេអ៊ែររបស់ខ្លួន រហូតដល់ទីបំផុត ព្រមទាំងចាត់វិធានការជាប្រវត្តិសាស្ត្រសងសឹកអាមេរិកដែលចង់កម្ទេចកូរ៉េខាងជើងវិញ។ ការសងសឹកដែលទំនងជាការបាញ់សាកល្បងគ្រាប់បែកអ៊ីដ្រូហ្សែន ទៅក្នុងមហាសមុទ្ទប៉ាស៊ីហ្វិក។
ជាប្រតិកម្ម ឆ្លើយតបទៅនឹងប្រធានាធិបតីអាមេរិក លោក ដូណាល់ ត្រាំ ដែលទើបបានប្រកាសពីលើវេទិកាអង្គមហាសន្និបាតអង្គការសហប្រជាជាតិ “កម្ទេចកូរ៉េខាងជើងឱ្យខ្ទេច” នៅថ្ងៃសុក្រនេះ បុរសខ្លាំងរបស់ព្យុងយ៉ាង បានព្រមានលោកត្រាំ ថានឹងត្រូវទទួលសំណងយ៉ាងចាស់ដៃបំផុតពីកូរ៉េខាងជើង។
ពីមុនមករាល់ប្រតិកម្មរបស់ព្យុងយ៉ាងតែងធ្វើឡើងក្នុងនាមរបបកុម្មុនិស្ត ឬក្នុងនាមប្រទេសកូរ៉េខាងជើង តែនៅលើកនេះ ជាលើកទីដំបូងបង្អស់ ប្រមុខដឹកនាំកូរ៉េខាងជើង គីម ជុងអ៊ុន បានចេញសេចក្តីថ្លែងការណ៍ ដោយចំពោះ និងដោយចំៗ ទៅកាន់លោក ដូណាល់ ត្រាំ ជាលក្ខណៈបុគ្គល ដោយប្រើពាក្យថា « ខ្ញុំ» តែម្តង !
“ត្រាំ បានជេរខ្ញុំ! និងប្រទេសខ្ញុំ ! នៅចំពោះមុនពិភពលោកទាំងមូល! ពាក្យគំរាមរបស់លោកត្រាំ មិនបានធ្វើឱ្យខ្ញុំខ្លាច និងមិនអាចបញ្ឈប់ខ្ញុំទេ ! ផ្ទុយទៅវិញ ពាក្យនោះជាការបញ្ជាក់ថា ផ្លូវដែលលោកជ្រើសកន្លងជាផ្លូវត្រូវ ហើយខ្ញុំត្រូវបន្តក្នុងផ្លូវនេះរហូតដល់ទីដៅ។ ក្នុងនាមជាមេដឹកនាំប្រទេស និងដើម្បីភាពថ្លៃថ្នូរ និងកិត្តិយសរបស់ជាតិ របស់ប្រជាពលរដ្ឋ និងខ្លួនខ្ញុំផ្ទាល់ ខ្ញុំនឹងធ្វើឱ្យលោកត្រាំ សងកូរ៉េខាងជើងក្នុងតម្លៃដ៏ខ្ពស់បំផុត ចំពោះពាក្យប្រមាថចង់កម្ទេចកូរ៉េខាងជើង។ »
ក្រៅអំពីចាត់ទុកលោក ត្រាំ ជាមនុស្សចាស់ មានរោគចិត្ត គីមជុងអ៊ុន បានប្រកាស ថានឹងមានការសងសឹកយ៉ាងចាស់ដៃ ជាប្រវត្តិសាស្ត្រ តែម្តង !
ព្យុងយ៉ាងគ្រោងសងសឹកត្រាំ ដោយបំផ្ទុះគ្រាប់បែកអ៊ីដ្រូហ្សែន
វិធានការសងសឹក នោះ គឺទំនងជាការបាញ់សាកល្បងគ្រាប់បែកអ៊ីដ្រូសែន ដែលខ្លាំងបំផុតមិនធ្លាប់មានសាកល្បងពីមុនមកទេ។ គ្រាប់បែកអ៊ីដ្រូសែន ដ៏មហាគ្រោះថ្នាក់ នឹងអាចត្រូវបាញ់បំផ្ទុះនៅលើមហាសមុទ្ទប៉ាស៊ីហ្វិក។ នេះបើប្រសាសន៍របស់រដ្ឋមន្ត្រីការបរទេសកូរ៉េខាងជើង ដែលក៏កំពុងស្ថិតនៅក្នុងមហាសន្និបាតអង្គការសហប្រជាជាតិ នាក្រុងញូវយ៉កដែរ តែលោកមិនបានបញ្ជាក់ថា ជាបាញ់បង្ហោះ ឬបំផ្ទុះយ៉ាងដូចម្តេច និងនៅទីណាឱ្យប្រាកដទេ ព្រោះទាំងនេះជាសេចក្តីសម្រេច និងបញ្ជារបស់គីមជុងអ៊ុន។ តែកន្លងមក គេធ្លាប់ឮព្យុងយ៉ាងគំរាមចង់វាយប្រហារលើកោះហ្កាំ។
គ្រាប់បែកអ៊ីដ្រូហ្សែន អាចបង្កគ្រោះថ្នាក់ធ្ងន់ធ្ងរខ្លាំងមែនទែន គឺ បង្កមហន្តរាយខ្លាំង លើសគ្រាប់បែកនុយក្លេអ៊ែរ ប្រភេទ A ឆ្ងាយណាស់។ បារាំង អង់គ្លេស អាមេរិក រុស្ស៊ី ចិន សុទ្ធតែមានគ្រាប់បែកអ៊ីដ្រូហ្សែន ប៉ុន្តែគ្មាននរណាម្នាក់បានប្រើវា ក្រៅក្របខ័ណ្ឌសាកល្បងទេ។ ជាការប្រៀបធៀប កម្លាំងរបស់គ្រាប់បែកអ៊ីដ្រូហ្សែនរបស់រុស្ស៊ី សាកល្បងកាលពីឆ្នាំ១៩៦១ នៅលើមហាសមុទ្ទទឹកកកអង់តាកទិក ខ្លាំងលើសគ្រាប់បែកបរមាណូទម្លាក់ទៅលើហ៊ីរ៉ូស្ហ៊ីម៉ា ដល់ទៅ ៤ពាន់ដង។
មហាអំណាចបន្តប្រទាញប្រទង់គ្នា
សង្គ្រាមពាក្យសំដី និងការគំរាមកំហែងបញ្ចេញធ្មុងដាក់គ្នា ឈានដល់ដំណាក់កាលមួយ កាន់តែគ្រោះថ្នាក់ តែគ្មានទេដំណោះស្រាយ សម្រាប់ពេលនេះ ! គ្មានអ្វីជឿនលឿន និងទៅមុខ បន្តិចសោះ ! សំណុំរឿងនុយក្លេអ៊ែរកូរ៉េខាងជើងជាប្រធានបទស្នូលនៃមហាសន្និបាតអង្គការសហប្រជាជាតិ និងប្រធានបទនៃការជជែកគ្នាពិភាក្សា ក្រៅឆាកអង្គមហាសន្និបាត អស់ពេញមួយសប្តាហ៍ យ៉ាងតានតឹង។
សំណួរថាតើមានវិធីសាស្ត្រណាអាចដាក់គំនាបលើកូរ៉េខាងជើងឱ្យបញ្ឈប់កម្មវិធីនុយក្លេអ៊ែរ នៅតែគ្មានចម្លើយ ! ក្រុមអ្នកនយោបាយពាក់ព័ន្ធនឹងសំណុំរឿងនេះ នៅតែបន្តប្រេះឆា រវាងជំហរពីរ ម្ខាងប្រឆាំងដាច់ខាតដឹកនាំដោយអាមេរិក និងម្ខាងជាក្រុមស្និទ្ធជាមួយរបបព្យុងយ៉ាង ចិនរុស្ស៊ី។
សហរដ្ឋអាមេរិក តាមរយៈលោករដ្ឋមន្ត្រីការបរទេស Rex Tillerson បានបញ្ជាក់អំពីជំហរដាច់ខាតរបស់អាមេរិក ជាថ្មីម្តងទៀត នៅថ្ងៃព្រហស្បតិ៍ម្សិលមិញ ថាត្រូវតែប្រឆាំងដាច់ខាតនឹងមហិច្ឆតានុយក្លេអ៊ែរព្យុងយ៉ាង ព្រោះការគំរាមកំហែងមានញឹកញយពេកមកលើសហរដ្ឋនិងសហគមន៍អន្តរជាតិ។ ក្រោយការបានពង្រឹងទណ្ឌកម្មសេដ្ឋកិច្ចថ្មីបន្ថែមទៀតលើកូរ៉េខាងជើង ក្នុងវិស័យវាយនភណ្ឌ នេសាទ បច្ចេកវិទ្យាព័ត៌មានវិទ្យា ឧស្សាហកម្ម ប្រមុខការទូតអាមេរិក បានប្រកាសពីលើវេទិកាអង្គការសហប្រជាជាតិព្រមានទៀត ថា កូរ៉េខាងជើងច្រលំធំ ដែលអាងលើអាវុធនុយក្លេអ៊ែរដើម្បីបានរស់ តែតាមការពិត អាវុធនុយក្លេអ៊ែរកំពុងនាំរបបព្យុងយ៉ាងទៅរកភាពឯកោ និងទៅរកភាពទុយ៌ស។
តែខាងរុស្ស៊ី រុស្ស៊ីព្រមានអាមេរិកខ្លាំងចំពោះភាពច្រឡោងកាងចង់ប្រើកម្លាំងយោធារបស់អាមេរិក ដោយយល់ថាភាពប្រឈមក្នុងវិបត្តិកូរ៉េខាងជើង កំពុងវិលគួច ជក់ខ្លាំងទៅៗទៅរកគ្រោះថ្នាក់ ! មិនមែនត្រឹមតែដោះស្រាយមិនចេញទេ តែថែមទាំងនាំដល់ទៅមហន្តរាយតែម្តង។ សម្រាប់រុស្ស៊ី ច្រកចេញមានតែមួយ គឺតាមផ្លូវនយោបាយនិងការទូត តាមរយៈការចរចា ចូលរួមដោយគ្រប់ភាគី ដូចអ្វីដែលរុស្ស៊ីធ្លាប់បានស្នើឡើងជាមួយចិន កាលពីថ្ងៃទី៤ខែកក្កដា។
ក្រោយពីបានព្រមានកូរ៉េខាងជើងជាថ្មី លោករដ្ឋមន្ត្រីការបរទេសអាមេរិក ក៏បានងាកទៅឆ្កឹះជ្រលររដ្ឋមន្ត្រីការបរទេសចិនដែរ ថាបើចង់ឱ្យឧបទ្វីបកូរ៉េគ្មានអាវុធនុយក្លេអ៊ែរ មានស្ថិរភាព បញ្ជៀសវិបត្តិក្នុងតំបន់ ដល់វេលាដែលចិនត្រូវងាកមកសហការជាមួយអាមេរិក និងសហគមន៍អន្តរជាតិ ដើម្បីគាបកូរ៉េខាងជើង។ ចិនត្រូវតែប្តូរយុទ្ធសាស្ត្រ ដើម្បីកុំឱ្យហួសពេលទាន់។
ប៉ុន្តែចិនគ្មានរង្គើ ! ចិននៅតែរក្សាបន្ទាត់នយោបាយតែមួយគត់របស់ខ្លួនដដែល ដែលបានស្នើឡើងអស់ជាច្រើនសប្តាហ៍មកហើយ គឺ បញ្ឈប់ប្រតិបត្តិការយោធាអាមេរិក-កូរ៉េខាងត្បូង នៅក្នុងតំបន់ ជាថ្នូរនឹងការបង្កកកម្មវិធីនុយក្លេអ៊ែរព្យុងយ៉ាង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ