បង់ក្លាដែសទៅប្តឹងអង្គការសហប្រជាជាតិសុំជំនួយសាមគ្គីភាពដោះស្រាយវិបត្តិរ៉ូហ៊ីងយ៉ា
នៅថ្ងៃសៅរ៍នេះ បង់ក្លាដែស ក៏បានប្រកាសសាងសង់ជម្រកថ្មីចំនួន១៤០០០ជម្រក សម្រាប់ជនភៀសខ្លួនរ៉ូហ៊ីងយ៉ាងប្រមាណដល់ជិតទៅ៤សែន ដែលរត់មកពីភូមា។ ឯនាយករដ្ឋមន្ត្រីបង់ក្លាដែស បានធ្វើដំណើរទៅអង្គការសហប្រជាជាតិ ដើម្បីស្វែងរកជំនួយសាមគ្គីភាពជួយជនភៀសខ្លួនរ៉ូហ៊ីងយ៉ា។ ហើយក្នុងបរិបទដ៏តានតឹងនៃវិបត្តិរ៉ូហ៊ីងយ៉ានេះ បង់ក្លាដែសបានធ្វើការបរិហារភូមាអំពីទង្វើរំលោភបំពានដែនអាកាស ជាញឹកញយពីសំណាក់យោធាភូមា។
ចុះផ្សាយនៅថ្ងៃ៖
ស្តាប់ - ០២:០៣
វិបត្តិរ៉ូហ៊ីងយ៉ានឹងបានក្លាយជាប្រធានបទស្នូលមួយនៃមហាសន្និបាតអង្គការសហប្រជាជាតិ ឆ្នាំនេះ។ ក្នុងពេលចាកចេញពីប្រទេស ឆ្ពោះទៅកាន់ក្រុងញូវយ៉ក លោកនាយករដ្ឋមន្ត្រីបង់ក្លាដែល បានប្រកាសនៅថ្ងៃនេះ ថានឹងទៅអំពាវនាវស្វែងរកជំនួយសាមគ្គីភាពពីអន្តរជាតិ ដើម្បីប្រឈមនឹងលំហូរជនភៀសខ្លួនរ៉ូហ៊ីងយ៉ាប្រមាណជិត៤សែននាក់ មកពីភូមា។
ក្នុងរយៈពេលតែបីសប្តាហ៍ តំបន់ភាគខាងត្បូងបង់ក្លាដែស ជាប់ព្រំដែនភូមា បានក្លាយជាជំរំជនភៀសខ្លួនដ៏រខេករខាកនិងធំជាងគេបង្អស់នៅលើពិភពលោក ស្ថានភាពមនុស្សធម៌ដុនដាបបំផុត និងការផ្តល់ជំនួយប្រព្រឹត្តទៅដោយត្រដាបត្រដួស។
នាយករដ្ឋមន្ត្រីបង់ក្លាដែស ក៏នឹងស្នើសុំសហគមន៍អន្តរជាតិ និងអង្គការសហប្រជាជាតិ ឱ្យដាក់សម្ពាធលើរដ្ឋាភិបាលភូមា ឱ្យព្រមទទួលយកជនភៀសខ្លួនទាំងនោះត្រលប់ទៅភូមិកំណើតរបស់ពួកគេវិញ។ នេះបើតាមសេចក្តីប្រកាសរបស់ការិយាល័យនាយករដ្ឋមន្ត្រី។ ក្នុងពេលរង់ចាំ អាជ្ញាធរបង់ក្លាដែស បានបញ្ជាឱ្យយោធាជាអ្នកចាត់ចែងផ្តល់ជំនួយ និងក៏បានប្រកាសសាងសង់ជំរំជនភៀសខ្លួនថ្មី ដែលមាន១៤០០០ជម្រក ក្នុងដីប្រមាណ៨០០ហិចតារ សម្រាប់ជនភៀសខ្លួនទាំង៤សែននាក់។
ការផ្តល់ជម្រកនិងបង្កើតជំរំប្រមូលផ្តុំ ឱ្យលេចជារូបរាង ក្នុងរយៈពេល១០ថ្ងៃ មិនមែនសម្រួលតែការផ្តល់ជំនួយទេ តែក៏ជាឱកាសមួយសម្រាប់រាប់កត់ត្រាចំនួនពិតប្រាកដនៃជនភៀសខ្លួនទាំងនោះ ដែលរហូតមកពេលនេះ បង់ក្លាដែសប៉ាន់ស្មានថាបានឡើងលើសចំនួន៤សែននាក់។
វិបត្តិរ៉ូហ៊ីងយ៉ាដ៏តានតឹងនេះ កំពុងរាលដាលដល់វិបត្តិការទូត។ ក្រសួងការបរទេសបង់ក្លាដែស បានកោះហៅតំណាងស្ថានទូតភូមាប្រចាំក្រុងដាកាជាថ្មីទៀត ដើម្បីសម្តែងការប្រឆាំងនិងព្រមាន អំពីផលវិបាកនៃទង្វើបង្កហេតុរបស់ភូមា ជាញឹកញយ។ បើតាមបង់ក្លាដែស ឧទ្ធម្ភាចក្រ និងដ្រូនរបស់ភូមា បានហោះឆ្លង រំលោភចូលដែនអាកាសបង់ក្លាដែស ចំនួនដល់ទៅបីដងហើយ ៖ ១០ -១២ និង១៤ កញ្ញា។ រដ្ឋាភិបាលក្រុងដាកា បានទាមទារឱ្យភូមាចាត់វិធានការជាបន្ទាន់កុំឱ្យហេតុការណ៍រំលោភបូរណភាពដែនអាកាសអាចកើតឡើងជាថ្មីទៀតបាន និងបានប្រកាសចាប់ខ្លួនអ្នកកាសែតភូមានផ្នែកតាមដានស្ថានការណ៍មនុស្សធម៌ពីរនាក់ ពីបទចារកិច្ច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ