ចិនកំពុងពិចារណាផែនការហាមឃាត់ការផលិតរថយន្តប្រើប្រេងសាំងនិងម៉ាហ្ស៊ូត
ចិនកំពុងដេញឱ្យទាន់បារាំងនិងអង់គ្លេសឬ ? ចិន ទីផ្សាររថយន្តដ៏ធំបង្អស់នៅលើពិភពលោក បានប្រកាសថាកំពុងសិក្សាលើកាលបរិច្ឆេទ សម្រាប់ ហាមឃាត់ការផលិត និងលក់រថយន្ត ដើរដោយថាមពលផូស៊ីល (ប្រេងម៉ាហ្ស៊ូត និងប្រេងសាំង)។ នេះជាកម្មវត្ថុប្រកបដោយមហិច្ឆតា ក្នុងអត្ថន័យផ្តល់សន្ទុះដល់ការអភិវឌ្ឍន៍រថយន្តដើរដោយថាមពលអគ្គីសនី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៤
តើនរណានឹងសម្រេចកម្មវត្ថុបានលឿនជាង ?! មិនមែនមានតែអង់គ្លេសនិងបារាំងទេ ដែលចង់ហាមឃាត់ការលក់រថយន្តប្រើប្រេងម៉ាហ្ស៊ូត និងសាំង ចាប់ពីឆ្នាំ២០៤០នោះ ចិនពេលនេះក៏កំពុងពិចារណា និងធ្វើការស្រាវជ្រាវលើប្រធានបទនេះដែរ។ ហើយចិននឹងអាចផ្តល់កាលបរិច្ឆេទ ក្នុងពេលឆាប់ៗខាងមុខ។ នេះបើតាមសេចក្តីជូនដំណឹងរបស់អនុរដ្ឋមន្ត្រីក្រសួងឧស្សាហកម្មនិងបច្ចេកវិទ្យាព័ត៌មានវិទ្យា នៅចំពោះមុខវេទិការថយន្តក្រុងជៀនជិន Tianjin។
សម្រាប់លោករដ្ឋមន្ត្រី ជាមួយនឹងវិធានការនេះ ចិននឹងមានការប្តូរផ្លាស់ស៊ីជម្រៅខ្លាំង ក្នុងវិស័យបរិស្ថាន និងឧស្សាហកម្មរថយន្ត។ ក្រុមហ៊ុនទាំងឡាយត្រូវបង្ខំចិត្តគោរពតាមបទបញ្ជា ដោយធ្វើប្រឹងសន្សំសំចៃការប្រើរថយន្តដើរថោយថាមពលចាស់ (ប្រេង) និងងាកទៅអភិវឌ្ឍន៍រថយន្តប្រើថាមពលស្អាត។
ថ្វីបើចិនពុំទាន់កំណត់ពេលវេលាហាមឃាត់បានមែន ប៉ុន្តែដំណឹងនេះជាតំណាងមហិច្ឆតាដ៏ធំដែលរដ្ឋាភិបាលត្រូវជំនះឱ្យបាន ៖ ចិនជាទីផ្សាររថយន្តលំដាប់លេខមួយនៅលើពិភពលោក ដោយមានការលក់កើនឡើងដល់ទៅ១៤%នៅឆ្នាំកន្លងទៅ ពោលគឺ២៨លានគ្រឿង ក្នុងនោះ ជាង២៤លានគ្រឿងជាការទិញប្រើរបស់ឯកជន។ ការលក់រថយន្តប្រើថាមពលស្អាត តំណាងឱ្យតែ១,៧%ប៉ុណ្ណោះ។ ប៉ុន្តែទីផ្សារនេះមានភាពទាក់ទាញខ្លាំង និងមាននិន្នាការស្ទុះឡើងយ៉ាងគំហុក ដល់ទៅ ៥៣% នៅឆ្នាំ២០១៦ ដោយសារតែរដ្ឋាភិបាលមាននយោបាយផ្តល់ប្រាក់លើកទឹកចិត្តនិងសម្រួលការផ្តល់ផ្លាក់លេខ ចំពោះរថយន្តប្រើអគ្គីសនី។
របបកុម្មុយនិស្តចិន ដែលប្រទេសធ្លាប់ជាប់ឈ្មោះអាក្រក់ខាងផ្នែកបំពុលបរិស្ថាន បាន ជំរុញនិងលើកទឹកចិត្តពលរដ្ឋផង និងផ្តល់កម្លាំងដល់ក្រុមហ៊ុនឧស្សាហកម្មរថយន្ត ដោយបានលើកច្បាប់ដំឡើងកូតាកម្ចីហរិញ្ញវត្ថុទិញ រថយន្តស្អាត ចាប់ពីដើមឆ្នាំ២០១៨ទៅ។
ភាគហ៊ុនក្រុមហ៊ុនផលិតរថយន្តអគ្គីសនីចិនBYD បានស្ទុះឡើងដល់ទៅ៦%នៅព្រឹកមិញ។ ឯក្រុមហ៊ុនផលិតរថយន្តបរទេស ដូចយ៉ាងវ៉ុលវ៉ាហ្កែន កំពុងស្រក់ទឹកមាត់ ចង់បង្កើនផលិតផលរបស់ខ្លួនឱ្យបានកាន់តែឆាប់ដើម្បីឆ្លើយតបទៅនឹងសេចក្តីត្រូវការរបស់ទីផ្សារយក្សចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ