ភូមាទើបភ្ញាក់រលឹក សង់ជំរំសម្រាប់ជនជាតិរ៉ូហ៊ីងយ៉ា
ចុះផ្សាយនៅថ្ងៃ៖
ស្តាប់ - ០៦:៥៥
រដ្ឋាភិបាលភូមានឹងបង្កើតជំរំជនភៀសខ្លួនបីកន្លែង នៅក្នុងរដ្ឋរ៉ាឃីន ដើម្បីទទួលប្រជាជនដែលបានរត់គេចខ្លួនចេញពីអំពើហិង្សា នៅក្នុងរដ្ឋរ៉ាឃីន។ នេះបើតាមការចុះផ្សាយរបស់កាសែតផ្លូវរដ្ឋភូមា Global New Light of Myanmar នៅថ្ងៃសៅរ៍ទី ៩ កញ្ញា។ តាមសេចក្តីថ្លែងការណ៍របស់ឧត្តមស្នងការណ៍ទទួលបន្ទុកជនភៀសខ្លួនរបស់អង្គការសហប្រជាជាតិ ចាប់តាំងមានការផ្ទុះអាវុធដ៏ហិង្សា រវាងកងទ័ពភូមា ហើយនិងពួកឧទ្ទាមទ័ពព្រៃ ដើម្បីរ៉ូហ៊ីងយ៉ា នៅរដ្ឋរ៉ាឃីន មានប្រជាជនរ៉ូហ៊ីងយ៉ា ប្រមាណ ២សែន ៧ម៉ឺននាក់ បានរត់ភៀសខ្លួនចេញពីភូមា ទៅប្រទេសបង់ក្លាដែស។
រដ្ឋាភិបាលភូមានឹងបង្កើតជំរំសម្រាប់ទទួលប្រជាជនដែលរត់គេចចេញពីអំពើហិង្សា នៅរដ្ឋរ៉ាឃីន។ នេះបើតាមការចុះផ្សាយ របស់កាសែតរដ្ឋភូមា Global New Light of Myanmar។ អំពើហិង្សាដែលបានបង្ខំឲ្យប្រជាជនរ៉ូហ៊ីងយ៉ា រត់ភៀសគេចខ្លួនពីផ្ទះសម្បែងរាប់សែននាក់ ទៅកាន់ទឹកដីបង់ក្លាដែស បានកើតឡើង ១៦ថ្ងៃមកហើយ ប៉ុន្តែ ទើបតែនៅថ្ងៃសៅរ៍ ដែលគេលឺថា រដ្ឋាភិបាលភូមាចង់បង្កើតជំរំសម្រាប់ជនភៀសខ្លួន។
ដំណឹងនេះ កើតមាន នៅចំពេលដែលឧត្តមស្នងការទទួលបន្ទុកជនភៀសខ្លួន របស់អង្គការសហប្រជាជាតិចេញសេចក្តីថ្លែងការណ៍ទាញសញ្ញាអាសន្ន ពីវិបត្តិខ្វះជំរក ជំរំសមរម្យ សម្រាប់ទទួលជនភៀសខ្លួន រ៉ូហ៊ីងយ៉ា។ តាមអង្គការសហប្រជាជាតិ ជំរំពីរដែលទទួលជនភៀសខ្លួន រ៉ូហ៊ីងយ៉ារាប់ម៉ឺននាក់ តាំងពីខែតុលាឆ្នាំមុន លែងមានសមត្ថភាពទទួលយកជនភៀសខ្លួនរ៉ូហ៊ីងយ៉ា ទៀតហើយ។ ក្នុង រយៈពេលតែពីរសប្តាហ៍ចុងក្រោយនេះ ចំនួនជនភៀសខ្លួនរ៉ូហ៊ីងយ៉ា ដែលបានរត់ទៅទឹកដីបង់ក្លាដែស បានកើនឡើងដល់ជិត៣សែននាក់ គឺប្រមាណ ១ភាគ៣នៃជនជាតិរ៉ូហ៊ីងយ៉ាសរុប ១លាន នាក់ ដែលរស់នៅភូមា។
តាមការចុះផ្សាយរបស់កាសែតរដ្ឋភូមា អាជ្ញាធរភូមាគ្រោងនឹងសាងសង់ជំរំបីកន្លែងផ្សេងគ្នា នៅក្នុងរដ្ឋរ៉ាឃីន ដើម្បីទទួលប្រជាជនដែលកំពុងរត់ខ្ចាត់ព្រាត់ ដោយសារអំពើហិង្សា។ តាមកាសែត Global New Light of Myanmar ជនភៀសខ្លួនទាំងនោះនឹងទទួលបានជំនួយ ជាស្បៀងអាហារ ទឹក និងការព្យាបាលពីក្រុមកាកបាទក្រហមភូមា។
នៅក្នុងការចុះផ្សាយរបស់កាសែត គេមិនបានបញ្ជាក់ចំៗថា ជំនួយ និងជំរំនឹងធ្វើឡើងសម្រាប់ជនជាតិរ៉ូហ៊ីងយ៉ាទេ។ នៅរដ្ឋរ៉ាឃីន ក្រៅតែពីជនជាតិភាគតិចរ៉ូហ៊ីងយ៉ា រាប់សែននាក់ រត់គេចពីអំពើហិង្សានៅរដ្ឋរ៉ាឃីន នៅមានប្រជាជនភូមា ដែលកាន់សាសនាព្រះពុទ្ធ និងហិណ្ឌូ ជិត៣ម៉ឺននាក់ ផ្សេងទៀត ដែលរត់ភៀសខ្លួន ដោយសារការប្រយុទ្ធគ្នា រវាងកងទ័ពភូមា និងក្រុមឧទ្ទាមការពារជនជាតិរ៉ូហ៊ីងយ៉ា។ រហូតមកដល់ពេលនេះ ប្រជាជនដែលមិនមែនរ៉ូហ៊ីងយ៉ាបាន ទទួលជំនួយពីរដ្ឋាភិបាល និងរស់ជ្រកកោន តាមវត្តអារ៉ាម គឺផ្ទុយស្រឡះពីប្រជាជនរ៉ូហ៊ីងយ៉ា ដែលត្រូវលើកគ្នាទាំងគ្រួសារ រត់ចេញពីដីភូមិ ដែលបើតាមការអះអាងរបស់ពួកគេ គឺត្រូវបានដុតបំផ្លាញដោយទាហានភូមា ឬ ក្រុមអ្នកកាន់ពុទ្ធសាសនាភូមា។
ញត្តិទាមទារឲ្យដកលោកស្រីស៊ូជីពីជ័យលាភី ណូបែលសន្តិភាព
រដ្ឋាភិបាលភូមា ជាពិសេស លោកស្រីអ៊ុងសាន ស៊ូជីផ្ទាល់តែម្តង ដែលជាក្បាលម៉ាស៊ីនដឹកនាំភូមា បច្ចុប្បន្ន កំពុងរងការរិះគន់ខ្លាំងពីគ្រប់មជ្ឈដ្ឋាន។ សូម្បីតែអ្នកដែលធ្លាប់គោរពកោតសរសើរសេចក្តីក្លាហានរបស់លោកស្រីកន្លងមក ក៏បានសំដែងការខកចិត្ត ដោយសារលោកស្រី មិនបានអើពើ ចាត់វិធានការការពារជនជាតិរ៉ូហ៊ីងយ៉ា។ រហូតមកដល់ពេលនេះ បុប្ផា គេនៅតែមិនទាន់យល់ថា ហេតុអ្វីបានជាស្រ្តីគំរូភូមា ដែលតំណាងឲ្យសិទ្ធិសេរីភាព និងប្រជាធិបតេយ្យ និងជាជ័យលាភី ណូបែលសន្តិភាព នៅស្ងៀម គ្មានចេញមុខជួយការពារប្រជាជនរ៉ូហ៊ីងយ៉ាទាល់តែសោះ យ៉ាងដូច្នេះ។
នៅតាមប្រទេសកាន់សាសនាអ៊ីស្លាម ដូចជាឥណ្ឌូណេស៊ី ប៉ាគីស្ថាន អាហ្វហ្កានីស្ថាន និងនៅបង់ក្លាដែស បាតុកម្ម ដុតរូបភាពលោកស្រីអ៊ុងសាន ស៊ូជី ដែលធ្លាប់ជាស្រ្តី គំរូ តំណាងឲ្យសេរីភាព កើតមានជាបន្តបន្ទាប់គ្នា។ ញត្តិទាមទារឲ្យគេដករង្វាន់ណូបែលសន្តិភាពពីលោកស្រី ដែលផ្តើមគំនិតដោយប្រជាជនឥណ្ឌូណេស៊ី បានទទួលការចុះហត្ថលេខាពីមនុស្សជាង ២សែននាក់។
នៅចុងសប្តាហ៍នេះ ជ័យលាភីណូបែលសន្តិភាព ពីររូប បានចេញមុខ រិះគន់ និងបានទាមទារឲ្យលោកស្រីអ៊ុងសាន ស៊ូជី ចាត់វិធានការឲ្យសក្តិសមទៅនឹងកិត្តិនាម របស់លោកស្រី ក្នុងនាមជាមាតាអ្នកស្នេហាសេរីភាព និងប្រជាធិបតេយ្យ។ កញ្ញាម៉ាឡាឡា និងអាចារ្យអាហ្វ្រិកខាងត្បូង ដែលទាំងរូប ជាជ័យលាភី ណូបែលសន្តិភាព បានទាមទារឲ្យលោកស្រី ស៊ូជី ជួយសង្រ្គោះ ជនជាតិរ៉ូហ៊ីងយ៉ា ដែលកំពុងរស់រងទុក្ខ ដោយសារការធ្វើទុក្ខបុកម្នេញ នៅភូមា។
នៅក្នុងបទសម្ភាសន៍ជាមួយទូរទស្សន៍ ឥណ្ឌា នៅថ្ងៃព្រហស្បតិ៍ លោកស្រី អ៊ុងសាន ស៊ូជី ដែលទើបតែចេញមុខជាសាធារណៈ ចំនួន ពីរដង នៅក្រោយមានវិបត្តិផ្ទុះឡើងនៅ រដ្ឋរ៉ាឃីន បាននិយាយថា ការទន្ទឹងរង់ចាំឲ្យរដ្ឋាភិបាលភូមាដោះស្រាយបញ្ហាទាំងស្រុង ក្នុងរយៈពេល ១៨ខែ គឺជាការទាមទារដែលគ្មានហេតុផល ត្រឹមត្រូវនោះទេ។
តើជនជាតិរ៉ូហ៊ីងយ៉ាអាចដុតផ្ទះសម្បែងរបស់ខ្លួនបានយ៉ាងម៉េច?
នៅដើមសប្តាហ៍នេះ នៅក្នុងប្រតិកម្មជាលើកទី១ ចាប់តាំងពីមានផ្ទុះវិបត្តិរ៉ូហ៊ីងយ៉ា លោកស្រីស៊ូជីបានចោទប្រកាន់ការចុះផ្សាយព័ត៌មាន មិនត្រឹមត្រូវ របស់កាសែតបរទេស និងថា ភូមាគ្មាននយោបាយ បោសសម្អាតជនជាតិរ៉ូហ៊ីងយ៉ានោះទេ។
រដ្ឋាភិបាលភូមារបស់លោកស្រីអ៊ុងសានស៊ូជីធ្លាប់បានអះអាង គឺពួកឧទ្ទាម ហើយនិងប្រជាជនរ៉ូហ៊ីងយ៉ា កាន់សាសនាអ៊ីស្លាមដែលបានដុតផ្ទះសម្បែងរបស់ខ្លួនឯងផ្ទាល់។ ប៉ុន្តែ អ្នកយកព័ត៌មានរបស់ទូរទស្សន៍ អង់គ្លេស BBC ដែលបានទៅដល់ភូមិនៅរដ្ឋរ៉ាឃីនផ្ទាល់ បានលើកឡើងផ្ទុយពីនេះ ដោយថា តាមពិតគឺក្រុមយុវជនភូមា កាន់សាសនាព្រះពុទ្ធ ដែលជាអ្នកដុត បំផ្លាញផ្ទះសម្បែង ភូមិរបស់ជនជាតិរ៉ូហ៊ីងយ៉ា។ អ្នកតំណាងរបស់អង្គការសហប្រជាជាតិ សម្រាប់ភូមា លោកស្រី លី យ៉ាងហេ ក៏បានរុញច្រាន ចោលនូវការលើកឡើងរបស់ភាគីភូមា ដែលបើតាមលោកស្រី គឺមិនសមហេតុផលនោះទេ។ លោកស្រីលី យ៉ាងហេបានលើកឡើងផងដែរ អំពើហិង្សា នៅរដ្ឋរ៉ាឃីន បានសម្លាប់ប្រជាជនរ៉ូហ៊ីងយ៉ាយ៉ាងតិច ១០០នាក់ តាំងពីចុងខែសីហាមុននេះ។
អ្នករាយការណ៍ពិសេសរបស់អង្គការសហប្រជាជាតិ បានសំដែងការសោកស្តាយផងដែរ ដែលឃើញលោកស្រីអ៊ុងសាន ស៊ូជី អសកម្ម ឈរអោបដៃ មិនជួយជនជាតិរ៉ូហ៊ីងយ៉ា។ សម្រាប់លោកស្រី លី យ៉ាងហេ គេត្រូវបំភ្លេចចោលទៅរូបភាពលោកស្រីអ៊ុងសាន ស៊ូជី ក្នុងនាមជាស្រ្តីគំរូ ដែលធ្លាប់ជាប់ឃុំ និងតវ៉ាដើម្បីលទ្ធិប្រជាធិបតេយ្យ។ “អ្វីដែលគេភ្លេច គឺថា លោកស្រីស៊ូជី ជាអ្នកនយោបាយ។ ប្រជាជនទន្ទឹងចង់ឲ្យលោកស្រី ចូលរួម លើកស្ទួយមនសិការ សេរីភាព ប៉ុន្តែ លោកស្រីជាអ្នកនយោបាយ។ គោលដៅ របស់អ្នកនយោបាយ គឺ អ្វីៗ គឺ ត្រូវការសំឡេងឆ្នោតពីប្រជាជន។ ជិត៩០ភាគរយនៃប្រជាជនភូមា គឺកាន់សាសនាព្រះពុទ្ធ មិនមែនអ៊ីស្លាមដូចជនជាតិរ៉ូហ៊ីងយ៉ានោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ