នុយក្លេអ៊ែរកូរ៉េខាងជើង៖លោកស៊ី ជីនពីង និងលោកដូណាល់ ត្រាំបន្តមិនចុះសម្រុងគ្នាក្នុងចំណាត់ការលើលោកគីម ជុងអ៊ុន
ចុះផ្សាយនៅថ្ងៃ៖
ស្តាប់ - ០៧:២១
សំណុំរឿងនុយក្លេអ៊ែរកូរ៉េខាងជើងកំពុងបន្តជាបច្ចុប្បន្នភាពយ៉ាងក្តៅគគុក។ រឿងរ៉ាវមួយនេះបានក្លាយជាប្រធានបទនៃកិច្ចសន្ទនាតាមទូរស័ព្ទរយៈពេល ៤៥នាទីរវាងលោកប្រធានាធិបតីចិនស៊ី ជីនពីង និងសមភាគីអាមេរិកលោកដូណាល់នាថ្ងៃពុធ ទី៦ កញ្ញា។ នៅឯវេទិកាសេដ្ឋកិច្ចរៀបចំនៅទីក្រុងវ៉្លាឌីវ៉ូស្តុកក្នុងទឹកដីរុស្ស៊ី លោកនាយករដ្ឋមន្រ្តីជប៉ុនស្ហ៊ីនហ្សូ អាបេ និងលោកប្រធានាធិបតីកូរ៉េខាងត្បូងមូន ចៃអ៊ីនបានអំពាវនាវឲ្យមានការដាក់ទណ្ឌកម្មចាស់ដៃលើរបបក្រុងព្យុងយ៉ាងដោយប្រើយន្តការក្រុមប្រឹក្សាសន្តិសុខ។ ចំណែកសហភាពអឺរ៉ុបបានប្រាប់ពីការរៀបចំទណ្ឌកម្មដាច់ដោយឡែករបស់ខ្លួន។ តែចិន និងរស្ស៊ីបានបញ្ជាក់ជាថ្មីពីការចង់បានដំណោះស្រាយតាមសន្តិវិធីដោយគេយល់ថា ទណ្ឌកម្មគ្រាន់ជាដំណោះស្រាយមួយចំណែកប៉ុណ្ណោះ។
នេះជាលើកទី១ គិតតាំងពីថ្ងៃទី១២ សីហាដែលលោកស៊ី ជីនពីង និងលោកដូណាល់ ត្រាំបានជួបសន្ទនាគ្នាតាមទូរស័ព្ទ។ តែខ្លឹមសារនៃកិច្ចសន្ទនាលើកនេះក៏មិនខុសពីលើកមុន គឺបានផ្តោតទាំងស្រុងលើបញ្ហាកូរ៉េខាងជើង។ ថ្លែងនៅចំពោះមុខហ្វូងអ្នកកាសែតនៅសេតវិមាន លោកត្រាំបានចាត់ទុកកិច្ចសន្ទនារយៈពេល ៤៥នាទីជាមួយលោកស៊ី ជីនពីនថា ជាការនិយាយត្រង់ទៅ ត្រង់មក មានលក្ខណៈម៉ឺងម៉ាត់ និងថា លោកជីនពីងបានយល់ព្រមដូចលោក ១០០%។ តែយល់ព្រម ១០០% លើចំណុចអ្វីខ្លះនោះ លោកត្រាំមិនបានលំអិតទេ។
ទោះជាបីជាលោកត្រាំមិនបានបញ្ជាក់ក៏ដោយក៏គេដឹងថា អ្វីដែលលោកត្រាំបានថ្លែងនោះហាក់ដូចជាអួតអាងជ្រុលបន្តិចព្រោះរហូតមកទល់ពេលនេះ ឥស្សរជនទាំងពីរបន្តខ្វែងគំនិតគ្នា និងមានដំណោះស្រាយខុសគ្នានៅក្នុងចំណាត់ការលើកូរ៉េខាងជើង។ លោកស៊ី ជីនពីងនៅតែទទូចឲ្យដោះស្រាយបញ្ហាតាមផ្លូវចរចាជាមួយរបបក្រុងព្យុងយ៉ាង តែលោកដូណាល់ ត្រាំនៅបន្តរម្លឹកម្តងជាពីរដងថា ការចរចាជាមួយរបបក្រុងព្យុងយ៉ាងជារឿងអត់ប្រយោជន៍។ នៅក្នុងកិច្ចសន្ទនាតាមទូរស័ព្ទពេលនេះទៀត លោកស៊ី ជីនពីងបានរម្លឹកប្រាប់លោកត្រាំជាថ្មីថា វិបត្តិកូរ៉េត្រូវតែដោះស្រាយតាមផ្លូវចរចា និងការពិគ្រោះយោបល់។
នៅពេលដែលអ្នកកាសែតសួរលោកត្រាំរឿងអន្តរាគមន៍យោធាលើកូរ៉េខាងជើង លោកត្រាំបានឆ្លើយយ៉ាងខ្លីថា មិនមែនជាជម្រើសទី១ ទេ និងនិយាយដូចលើកមុនៗថា អាមេរិកនឹងបន្តតាមដានលើសភាពការណ៍នៅឧបទ្វីបកូរ៉េ។ សូមជម្រាបជូនថាកន្លងមក លោកត្រាំតែងស្តីបន្ទោសចិនពីបទមិនសូវបានដាក់គំនាបសេដ្ឋកិច្ចឲ្យចាស់ដៃលើកូរ៉េខាងជើង ព្រមទាំងព្រមានចិនថា បើចិនមិនធ្វើអ្វីទាំងអស់ អាមេរិកនឹងផ្តាច់ទំនាក់ទំនងពាណិជ្ជកម្មជាមួយចិន។ តែឃ្លាឃ្លោងទាំងនេះមិនត្រូវបានទីក្រុងវ៉ាស៊ីតោន និងទីក្រុងប៉េកាំងសរសេរនៅក្នុងសេចក្តីប្រកាសព័ត៌មានដាច់ដោយឡែកពីគ្នានាក្រោយកិច្ចសន្ទនារវាងលោកដូណាល់ ត្រាំ និងលោកស៊ី ជីនពីងទេ។
រដ្ឋបាលអាមេរិកដាក់សំណើទណ្ឌកម្មថ្មីទៅក្រុមប្រឹក្សាសន្តិសុខ
នៅក្នុងថ្ងៃនៃកិច្ចសន្ទនាតាមទូរស័ព្ទរវាងលោកដូណាល់ ត្រាំ និងលោកស៊ី ជីនពីង រដ្ឋបាលអាមេរិកបានប្រាប់ឲ្យដឹងពីការបញ្ជូននូវវិធានការទណ្ឌកម្មថ្មីមួយចំនួនទៅកាន់ក្រុមប្រឹក្សាសន្តិសុខ។ សេចក្តីព្រាងទណ្ឌកម្មថ្មីរបស់អាមេរិករួមមាន ទី១ ហាមលក់ប្រេងឥន្ធនៈឲ្យកូរ៉េខាងជើង។ តាមស្ថិតិរបស់កូរ៉េខាងត្បូង ចិនបានលក់ប្រេងឆៅឲ្យកូរ៉េខាងជើងប្រមាណជា ៥០០ ០០០តោនក្នុងមួយឆ្នាំៗ និងផលិតផលប្រេងឥន្ធនៈផ្សេងៗទៀតចំនួន ២០០ ០០០តោន។ ចំណែករុស្ស៊ីបានលក់ប្រេងឆៅឲ្យកូរ៉េខាងជើងចំនួន ៤០ ០០០តោនក្នុងមួយឆ្នាំៗ។
ទី២ ហាមយកពលករកូរ៉េខាងជើងឲ្យធ្វើការងារនៅក្រៅប្រទេស។ ប្រភពទូតបានឲ្យដឹងថា មានពលករកូរ៉េខាងជើងពី ៦០ ០០០ ទៅ ១០០ ០០០នាក់កំពុងធ្វើការនៅបរទេស។ របាយការណ៍ស៊ើបអង្កេតរបស់អង្គការសហប្រជាជាតិចេញផ្សាយឆ្នាំ ២០១៥ បានចោទក្រុងព្យុងយ៉ាងពីបទបង្ខំពលរដ្ឋខ្លួនចំនួន ៥០ ០០០នាក់ឲ្យធ្វើការនៅបរទេស ពិសេសនៅចិន និងរុស្ស៊ីដើម្បីយកលុយជួយរដ្ឋ។ ក្នុងមួយឆ្នាំៗ ពលករកូរ៉េខាងជើងនៅបរទេសទាំងអស់បានជួយរដ្ឋពី ១ ២០០ ទៅ ២ ៣០០លានដុល្លារ។
ទី៣ ហាមទិញផលិតផលវាយនភ័ណ្ឌផលិតនៅកូរ៉េខាងជើង។ វិធានការមួយនេះអាចនឹងត្រូវធ្វើឡើងបន្ថែមលើទណ្ឌកម្មដែលមានស្រាប់ទាក់ទងនឹងការហាមទិញធ្យូងថ្ម ផលិតផលលោហៈធាតុគ្រប់ប្រភេទពីកូរ៉េខាងជើង។ សូមជម្រាបជូនថា ការនាំចេញផលិតផលវាយនភ័ណ្ឌជាប្រភពចំណូលទី២ របស់របបក្រុងព្យុងយ៉ាក្នុងឆ្នាំ ២០១៦ ក្នុងនោះ ៨០% បាននាំទៅកាន់ប្រទេសចិន។ ចំណែកសេចក្តីព្រាងទណ្ឌកម្មទី៤ រដ្ឋបាលអាមេរិកស្នើឲ្យផ្អាប់ទ្រព្យសម្បតិទាំងអស់របស់មនុស្សខ្លាំងគីម ជុងអ៊ុន ព្រមទាំងហាមមិនឲ្យលោកគីម ជុងអ៊ុន រួមទាំងអ្នកទទួលខុសត្រូវជាន់ខ្ពស់កូរ៉េខាងជើង ៤នាក់ទៀតមិនឲ្យធ្វើដំណើរទៅបរទេស។
អឺរ៉ុបព្រាងទណ្ឌកម្មផ្សេងទន្ទឹមនឹងទណ្ឌកម្មអនុម័តដោយក្រុមប្រឹក្សាសន្តិសុខ
សហភាពអឺរ៉ុបបានប្រកាសឲ្យដឹងនៅថ្ងៃព្រហស្បតិ៍ ទី៧ កញ្ញាពីការត្រៀមទណ្ឌកម្មដាច់ដោយឡែករបស់ខ្លួនលើកូរ៉េខាងជើង។ សេចក្តីប្រកាសនេះបានធ្វើឡើងដោយលោកស្រីប្រមុខការទូតអឺរ៉ុប Federica Mogherini នៅក្នុងកិច្ចប្រជុំថ្នាក់រដ្ឋមន្រ្តីការពារជាតិ និងរដ្ឋមន្រ្តីការបរទេសអឺរ៉ុបក្នុងទីក្រុងតាលីន ប្រទេសអេស្តូនី។ សំណើទណ្ឌកម្មដាច់ដោយឡែករបស់សហភាពអឺរ៉ុប គឺស្រដៀងគ្នានឹងសេចក្តីព្រាងទណ្ឌកម្មរបស់រដ្ឋបាលអាមេរិក។ លោកស្រី Mogherini បានពន្យល់ថា ទន្ទឹមនឹងវិធានការដាច់ដោយឡែករបស់សហភាពអឺរ៉ុប អឺរ៉ុបក៏នឹងគាំទ្រសេចក្តីសម្រេចថ្មីរបស់ក្រុមប្រឹក្សាសន្តិសុខនាពេលខាងមុខដែរ។
តាមលោកស្រី Mogherini គេត្រូវតែបង្កើនគំនាបលើកូរ៉េខាងជើងតាមរយៈទណ្ឌកម្មថ្មីនៅក្នុងវិស័យណាដែលជាប្រភពចំណូលរបស់របបក្រុងព្យុងយ៉ាង។ ក្រៅពីនោះ លោកស្រី Mogherini ក៏បានបញ្ជាក់ពីគម្រោងដាក់លោកគីម ជុងអ៊ុនទៅក្នុងបញ្ជីខ្មៅដោយហាមមិនឲ្យមនុស្សខ្លាំងកូរ៉េខាងជើងរូបនេះធ្វើដំណើរមកកាន់អឺរ៉ុប ឬមួយក៏ខ្ចីទឹកដីអឺរ៉ុបដើម្បីឆ្លងកាត់ រួមទាំងផ្អាប់ទ្រព្យសម្បត្តិទាំងអស់ដែលលោកគីម ជុងអ៊ុនដែលមាននៅអឺរ៉ុប។ តែទន្ទឹមគ្នានេះ ប្រមុខការទូតអឺរ៉ុបបានអំពាវនាវឲ្យចៀសវាងការប្រឈមមុខដាក់គ្នាតាមផ្លូវអាវុធដែលលោកស្រីយល់ថា នឹងបង្កឲ្យមានគ្រោះថ្នាក់យ៉ាងខ្លាំងនៅក្នុងតំបន់ និងនៅលើពិភពលោក។
សំណើសុំឲ្យដាក់គំនាបបន្ថែមលើកូរ៉េខាងជើងក៏មានពីលោកប្រធានាធិបតីកូរ៉េខាងត្បូងមូ ចៃអ៊ីន និងលោកនាយករដ្ឋមន្រ្តីជប៉ុនស្ហ៊ីនហ្សូ អាបេដែលកំពុងចូលរួមនៅក្នុងវេទិកាសេដ្ឋកិច្ចក្នុងទីក្រុងវ៉្លាឌីវ៉ូស្តុក ប្រទេសរុស្ស៊ី។ លោកអាបេ និងលោកចៃអ៊ីនបានធ្វើសំណើនេះទៅកាន់លោកប្រធានាធិបតីរុស្ស៊ីពូទីន តែលោកពូទីននៅតែបន្តបញ្ជាក់ពីភាពចាំបាច់ក្នុងការចរចាជាមួយកូរ៉េខាងជើង។ មនុស្សខ្លាំងនៅរុស្ស៊ីរូបនេះបានទទួលស្គាល់ថា ពិភពលោកពិតជាខ្វាយខ្វល់ និងបារម្ភពីស្ថានការណ៍នៅកូរ៉េ តែគេគួរតែចាប់ដៃធ្វើការរួមគ្នាដើម្បីដោះស្រាយបញ្ហា។ លោកពូទីនបានយល់ដូចសមភាគីចិនលោកជីនពីងដែលថា ដំណោះស្រាយតាមផ្លូវទណ្ឌកម្មជារឿងឥតប្រយោជន៍ និងគ្មានប្រសិទ្ធិភាព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ