រដ្ឋអាជ្ញាទាមទារអោយដាក់ពន្ធនាគារប្រមុខដឹកនាំក្រុមហ៊ុន Samsung ចំនួន១២ឆ្នាំ
រដ្ឋអាជ្ញាកូរ៉េខាងត្បូង នៅថ្ងៃចន្ទទី៧សីហាម្សិលមិញ បានទាមទារឲ្យតុលាការដាក់ពន្ធនាគារប្រមុខដឹកនាំក្រុមហ៊ុន Samsung ចំនួន១២ឆ្នាំ នៅក្នុងសំណុំរឿងអាស្រូវពុករលួយថ្នាក់ជាតិមួយដែលរហូតដល់បណ្តាលឲ្យលោកស្រីប៉ាក គុនហេ អតីតប្រធានាធិបតីកូរ៉េខាងត្បូងត្រូវធ្លាក់ចេញពីមុខតំណែង។
ចុះផ្សាយនៅថ្ងៃ៖ កែប្រែថ្ងៃទី៖
លោក Lee Jae-Yong ដែលជាប្រមុខដឹកនាំក្រុមហ៊ុន Samsung ត្រូវបានជាប់ចោទ ថា"ជាអ្នកទទួលផលចុងក្រោយនៃការប្រព្រឹត្តបទល្មើសនៅក្នុងសំណុំរឿងអាស្រូវពុករលួយនេះ"។ ហើយប្រសិនបើចៅក្រម អនុវត្តទៅតាមសំណើរបស់រដ្ឋអាជ្ញា នោះប្រមុខដឹកនាំក្រុមហ៊ុន Samsung ពិតជានឹងត្រូវទទួលរងនូវការផ្តន្ទាទោសមួយដ៏ធ្ងន់ធ្ងរបំផុត"។
លោក Lee Jae-Yong និងថ្នាក់ដឹកនាំរបស់ក្រុមហ៊ុន Samsung ចំនួន៤នាក់ផ្សេងទៀតត្រូវបានចោទប្រកាន់ពីបទធ្វើការសួកប៉ាន់ ដល់មនុស្សជំនិតរបស់លោកស្រីអតីតប្រធានាធិបតីប៉ាក គុនហេ ជាច្រើនលានដុល្លារ ដើម្បីប្តូរជាមួយនឹងផលប្រយោជន៍នយោបាយពីរដ្ឋាភិបាលជាអាទិ៍ នៅក្នុងការទទួលបាននូវការអនុម័តពីអាជ្ញាធរកូរ៉េខាងត្បូងនៅក្នុងសំណុំរឿងនៃការដាក់បញ្ចូលគ្នារវាងសាខាចំនួនពីររបស់ក្រុមហ៊ុន Sumsugដ៏ចម្រូងចម្រាសនេះ។
ក្រៅពីនេះ លោក Lee Jae-Yong ត្រូវបានជាប់ចោទផងដែរពីបទបានរំលោភលើទ្រព្យសម្បត្តិក្រុមហ៊ុននិងបានលាក់ទ្រព្យសកម្មនៅក្រៅប្រទេសផង។ ចំណែក ជនជាប់ចោទរួមគ្នាទាំង៤នាក់ទៀតនោះ ជន៣នាក់ ត្រូវបានរដ្ឋអាជ្ញាទាមទារឲ្យដាក់ពន្ធនាគារចំនួន១០ឆ្នាំ រីឯអ្នកទី៤ ជាប់គុកចំនួន៧ឆ្នាំ។
សូមបញ្ជាក់ថា នៅក្នុងសំណុំរឿងអាស្រូវពុករលួយដ៏ចម្រូងចម្រាសនៃក្រុមហ៊ុនSumsung នេះ ប្រមុខដឹកនាំក្រុមហ៊ុន Sumsung លោក Lee Jae-Yong ធ្លាប់បានថ្លែងសារភាពការពារខ្លួនលោកដែរកាលពីសប្តាហ៍មុនថា លោកពុំ បានលូកដៃអ្វីសោះឡើយនៅក្នុងសេចក្តីសម្រេចចិត្តនានារបស់ក្រុមហ៊ុន Sumsung ហើយការងាររបស់លោកមួយភាគធំ គឺគ្រាន់តែអង្គុយស្តាប់សេចក្តីរាយការណ៍របស់ថ្នាក់ដឹកនាំផ្សេងៗទៀតរបស់ក្រុមហ៊ុនតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ