ពួកតាលីបង់ ធ្វើការវាយប្រហារប្រឆាំងក្បួនយានយន្តរបស់អង្គការអូតង់
នៅអាហ្វហ្កានីស្ថាន ពួកឧទ្ទាមអ៊ីស្លាមជ្រុលនិយមតាលីបង់ នៅថ្ងៃពុធម្សិលមិញ បានបើកការវាយប្រហារដោយប្រើរថយន្តបង្កប់គ្រាប់បែកមួយគ្រឿងប្រឆាំងទៅលើក្បួនដំណើររបស់កងទ័ពអង្គការអូតង់នៅជិតក្រុងកង់ដាហា(KANDAHAR) ភាគខាងត្បូងប្រទេសនិងបានបណ្តាលឲ្យមានជនរងគ្រោះ-នេះបើយោងតាមអ្នកនាំពាក្យម្នាក់របស់កងទ័ពសម្ព័ន្ធ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៤
នៅក្នុងការវាយប្រហារនាថ្ងៃពុធម្សិលមិញវេលាម៉ោង១២ថ្ងៃត្រង់ម៉ោងក្នុងស្រុក សាក្ស៊ីម្នាក់ដែលជាអ្នកជំនួញនៅក្រុងកង់ដាហា (KANDAHAR) ជិតទីកន្លែងវាយប្រហារ បានថ្លែងប្រាប់ដល់ទីភា្នក់ងារព័ត៌មាន AFP ថាគាត់បានឃើញសាកសពមនុស្សចំនួន៣នាក់ដែលត្រូវបានគេយកចេញពីរថពាសដែកមួយគ្រឿងរបស់កងទ័ពសម្ព័ន្ធ។ សាកសីនេះ បានបញ្ជាក់បន្ថែមទៀតថា ក្បួនដំណើររបស់កងទ័ពសម្ព័ន្ធ មានយានយន្តទាំងអស់ចំនួន៣គ្រឿងនៅខណៈពេលរងការវាយប្រហារ។
គួរបញ្ជាក់ថា ការវាយប្រហារម្សិលមិញនេះ ត្រូវបានប្រព្រឹត្តទៅនៅពេលដែលប្រទេសអាហ្វហ្កានីស្ថានកំពុងស្ថិតនៅក្នុងស្ថានភាពដុនដាបដោយសារតែអំពើភេរវកម្មអត្តឃាតបានកើនឡើងជាទ្វេគុណ។ អំពើភេរវកម្មនាពេលថ្មីៗចុងក្រោយគេ គឹនៅយប់ថ្ងៃអង្គារមុននៅស្រុក Herat ភាគខាងលិចប្រទេសនិងបានសម្លាប់មនុស្សជាង៣០នាក់និងរងរបួសជនជាង៦០នាក់នៅក្នុងទីព្រះវិហារអ៊ីស្លាមមួយដែលកាន់និកាយស៊ីអីត។
ចំណែកប្រតិបត្តិការពិសេសរបស់អង្គការអូតង់នៅក្នុងតំបន់វិញ បានគូសបញ្ជាក់ប្រាប់ថា ការវាយប្រហារនៅថ្ងៃពុធនោះ គឺពិតជាការវាយប្រហារមួយដែលប្រឆាំងនឹងក្បួនយាន្តយន្តរបស់អូតង់មែននៅម្តុំជិតក្រុងកង់ដាហា។ តែប្រតិបត្តិការពិសេសរបស់អូតង់នេះ ពុំបានលំអិតព័ត៌មានអ្វីទៀតទេដោយគ្រាន់តែបានសន្យាថានឹងជូនព័ត៌មានលំអិតផ្សេងៗទៀតឲ្យបានយ៉ាងឆាប់រហ័សបើគេអាចធ្វើទៅបាន។ ក៏ប៉ុន្តែរយៈពេលជិត ៣ម៉ោងកន្លងផុតទៅបន្ទាប់ពីការវាយប្រហារនេះ គេនៅតែពុំទាន់មានតួលេខណាមួយពីប្រភពផ្លូវការនៅឡើយដែរ។
ក៏ប៉ុន្តែអ្នកនាំពាក្យរបស់ប៉ូលីសអាហ្វាហ្កានីស្ថាននៅខេត្ត Zia Durrani វិញ គ្រាន់តែបានជូនដំណឹងថា ភេរវជន បានបើករថយន្តបង្កប់គ្រាប់បែកមួយគ្រឿង បរសំដៅយ៉ាងលឿនស្លេវទៅបុកក្បួនដំណើរយាន្តយន្តមួយរបស់កងទ័ពបរទេសនៅពេលថ្ងៃត្រង់ម្សិលមិញជិតទីមូលដ្ឋានយោធាមួយរបស់អង្គការអូតង់ ដែលស្ថិតនៅក្បែរព្រលានយន្តហោះក្រុងកង់ដាហា ភាគខាងត្បូងប្រទេសតែប៉ុណ្ណោះ។
ស្របគ្នានេះ ពួកឧទ្ទាមតាលីបង់វិញ បានផ្ញើសារតាមទូរស័ព្ទដៃ ចេញមុខអះអាងថា ថាការវាយប្រហារនៅជិតក្រុងកង់ដាហារនៅថ្ងៃពុធម្សិលមិញនោះ គឺជាស្នាដៃរបស់ក្រុមខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ