ភូមា ៖ អ្នកកាសែតម្នាក់ជាប់ចោទពីបទបរិហារកេរ្ត៍ព្រះសង្ឃជ្រុលនិយម
តុលាការភូមានឹងកាត់ទោសនៅថ្ងៃចន្ទទី ៧ សីហា សប្តាហ៍ក្រោយលោក ស្វេ វីន Swe Winអ្នកកាសែតនិងជានិពន្ធនាយកទីភ្នាក់ងារសារព័ត៌មានភូមា ពីបទបានបង្ហោះផ្សាយតាមប្រព័ន្ធសង្គមពាក្យបរិហារកេរ្ត៍ប៉ះពាល់ដល់ព្រះសង្ឃពុទ្ធសាសនា ព្រះនាម អាស្ហ៊ីន វីរ៉ាធុ។ ព្រះសង្ឃជា មេដឹកនាំសង្ឃជ្រុលនិយមភូមា ដែលល្បីខ្លាំងមានសង្ឃដីកាប្រឆាំងអ៊ីស្លាម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៧
និពន្ធនាយកទីភ្នាក់ងារសារព័ត៌មានភូមាលោក ស្វេ វីន ត្រូវបានចាប់ខ្លួននៅល្ងាចថ្ងៃអាទិត្យទី ៣០កក្កដា នៅក្នុងខណៈដែលលោកហៀបនឹងចាកចេញពីប្រទេសទៅបំពេញបេសកកម្មការងារនៅក្រុងបាងកក។ នេះបើតាមប្រភពប៉ូលិសក្រុងរ៉ង់ហ្គូន ដែលបានទទួលបញ្ជាពីប៉ូលិសក្រុងម៉ង់ដាល័យថាលោកស្វេ វីន ប៉ុនប៉ងចាកចេញពីប្រទេស។ តាមការពិតបើតាមការពន្យល់របស់មេធាវី អាជ្ញាធរភូមាមិនបានផ្តល់ដំណឹងដល់អ្នកកាសែតថាគាត់គ្មានសិទ្ធិចាកចេញពីប្រទេសទេ។
ប៉ុន្តែនៅថ្ងៃចន្ទទី ៣១កក្កដានេះ តុលាការភូមាបានព្រមព្រៀងដោះលែងលោក ស្វេ វីន ឱ្យមានសេរីភាព ដោយមានលក្ខខណ្ឌ ក្នុងពេលរង់ចាំការបើកសវនការនៅសប្តាហ៍ក្រោយ។ លោកស្វេវីន នឹងត្រូវតុលាការបើកសវនការកាត់ទោសនៅថ្ងៃចន្ទទី ៧ សីហាសប្តាហ៍ក្រោយ ពីបទបានបង្ហោះសារក្នុងប្រព័ន្ធសង្គមហ្វេសប៊ូក កាលពីខែមីនា ថាព្រះសង្ឃវីរ៉ាធុ បានប្រព្រឹត្តកំហុស បំពានវិន័យវត្តពុទ្ធសាសនា។
សកម្មជនអ្នកគាំទ្រសង្ឃវីរ៉ាធុ បានដាក់ពាក្យបណ្តឹងប្រឆាំងនឹងអ្នកកាសែត ស្របតាមមាត្រា៦៦នៃច្បាប់ភូមា។ បើតាមច្បាប់គ្រប់បុគ្គលដែលផ្សព្វផ្សាយពាក្យបរិហារ ពាក្យញុះញង់ គំរាមកំហែង អូសទាញមតិសាធារណៈ តាមប្រព័ន្ធសង្គម អាចនឹងត្រូវទទួលទោស ជាប់ពន្ធនាគារដល់ទៅបីឆ្នាំ។
ថ្វីបើពេលនេះ ភូមាស្ថិតក្រោមការដឹកនាំរបស់លោកស្រី អ៊ុង សានស៊ូជី ជ័យលាភីរង្វាន់ណូបែលសន្តិភាពឆ្នាំ១៩៩១មែន ប៉ុន្តែ ស្វេ វីន ជាអ្នកកាសែតទី៥ហើយ ដែលត្រូវបានអាជ្ញាធរចាប់ខ្លួនបញ្ជូនទៅតុលាការ។ ទង្វើនេះបានបំផុសឱ្យមានការព្រួយបារម្ភយ៉ាងខ្លាំង ជុំវិញសិទ្ធិសេរីភាពនៃការបញ្ចេញមតិ នៅភូមា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ