ម៉ូស្គូនិងប៉េកាំងបិទបញ្ចប់លំហាត់សឹករួមគ្នាអស់ពេញមួយសប្តាហ៏ នៅសមុទ្របាល់ទិក
ចុះផ្សាយនៅថ្ងៃ៖
ថ្ងៃសុក្រនេះ ជាថ្ងៃចុងក្រោយនៃលំហាត់សឹកធ្វើរួមគ្នា ដោយក្រុមកប៉ាល់ចំបាំងចិននិងរុស្ស៊ី តាំងពីថ្ងៃសុក្រមុនមក ហើយវាប្រព្រឹត្តទៅជាលើកទី១ គឺ នៅសមុទ្របាល់ទិក។ លំហាត់បែបនេះ ក្រោមឈ្មោះថា“ការសហការគ្នានៅសមុទ្រ“ ត្រូវម៉ូស្គូនិងប៉េកាំងធ្វើតាំងពីឆ្នាំ២០១២មក។ ប៉ុន្តែដោយហេតុថា លើកនេះវាប្រព្រឹត្តទៅ នៅត្រង់លំហទឹកដែលតែងអាងយ៉ាងដោយសមយុទ្ធជារឿយៗនៃពួកប្រទេសបក្សសម្ព័ន្អអូតង់ បានជាវាហែហមទៅដោយសំដីឌឺដងនិងដៀមដាមគ្ន រវាងម្ខាងគឺរុស្ស៊ីនិងចិនជាដៃគូ យុទ្ធសាស្ត្រនឹងគ្នាតាមគ្រប់មុខព្រួញ និងម្ខាងទៀតគឺបស្ចិមលោក ដែលការពារទង្វើអូតង់នាំមុខដោយសរអា។
លំហាត់សឹកចិន-រុស្ស៊ី ប្រព្រឹត្តទៅ រៀងរាល់ឆ្នាំ ក្រោមឈ្មោះជាផ្លូវការថា “ការសហការគ្នានៅសមុទ្រ” លើកដំបូងបង្អស់ គឺក្នុងឆ្នាំ២០១២ នៅសមុទ្រលឿងប្រទេសចិន។ កាលណោះ មានដាក់ឲ្យសកម្មពីទាំងសងខាង គឺនាវាលើផ្ទៃទឹកនិងនាវាមុជទឹក សរុបទៅ២៥គ្រឿង និងយន្តហោះចំបាំង១៣គ្រឿង, ឧទ្ធម្ភាគចក្រយោធា៩គ្រឿង, ទ័ពពិសេស២អង្គភាព។
បន្ទាប់មក លំហាត់នេះបានប្រព្រឹត្តទៅនៅសមុទ្រជប៉ុន នៅសមុទ្រតំបន់ក្រុងផែ Vladivostok ចុងបូព៌ារុស្ស៊ីនៅសមុទ្រម៉េឌីទែរ៉ាណេ នៅសមុទ្រចិនខាងត្បូង ហើយឥឡូវ នៅសមុទ្របាល់ទិក។ ទាក់ទងនឹង រឿងនេះ គួរនិយាយថា ក្រុមកប៉ាល់ចំបាំងចិន ក្នុងឆ្នាំ ២០១៥ នៅតាមផ្លូវឆ្ពោះទៅកាន់សមុទ្រមេឌីទែរ៉ាណេ បានឈៀងចូលសមុទ្រខ្មៅ ប៉ុន្តែ មិនប្រថុយចូលចតនៅតាមផែនៃទៀបកោះគ្រីមេទេ ដើម្បីចៀសវាង ការទិតៀនជាយថាហេតុ ហើយបានចូលចតគឺនៅផែជាមូលដ្ឋានកងនាវារុស្ស៊ីមាត់សមុទ្រនោះ ឈ្មោះ Novorossisk លើដែនដីសហព័ន្ធរុស្ស៊ីពេញទី។
លំហាត់សឹក “ការសហការគ្នានៅសមុទ្រ- ឆ្នាំ២០១៧ “ ធ្វើនៅសមុទ្របាល់ទិក ពីថ្ងៃ២១ ដល់ ២៨កក្កដា ហើយដែលវគ្គសកម្មរបស់វាគឺចាប់ពីថ្ងៃ២៤កក្កដាមក។ ចូលរួម ពីខាងចិននិងរុស្ស៊ី សរុបទៅ គឺ នាវាតែ១០ គ្រឿង , យន្តហោះចំបាំង និងឧទ្ធម្ភាគចក្រយោធា តែ ១២គ្រឿងប៉ុណ្ណោះ។ ម៉្លោះហើយ បានជាកាណាល់ទូរទស្សន៍រដ្ឋរុស្ស៊ី ដោយធ្វើការប្រៀបធៀប បានរំលឹកទាំងឌឺដងថា ក្នុងលំហាត់សឹកអន្តរជាតិ ធ្វើជាលើកទី៤៥ ទៅហើយ នៅសមុទ្របាល់ទិក ដោយបក្សសម្ព័ន្ធអូតង់ កាលពីខែមិថុនាកន្លងទៅ ក្រោម ឈ្មោះថាBaltic Operations ហៅកាត់ថា Baltops មិនឆ្ងាយប៉ុន្មានពីឆ្នេរប្រទេសរុស្ស៊ី ពីក្នុងចំណោម២៩ប្រទេសសមាជិកអូតង់ មានដល់ទៅ១៤ប្រទេស បានចូលរួមព្រមទាំងរដ្ឋជាដៃគូអូតង់ បែបយ៉ាងហ្វាំងឡង់ និងស៊ុយអែតជាដើម។
កាលណោះ មានដាក់ឲ្យសកម្មគឺ នាវាលើផ្ទៃទឹក និងនាវាមុជទឹកដល់ទៅ៥០គ្រឿង, យន្ដហោះចំបាំងដល់ទៅ៥៥គ្រឿង។ ពេលនោះ មេបញ្ជាការកងនាវាទី៦របស់សរអា ឧត្តមនាវីទោ លោកChristopher Grady បានអះអាងថា សមយុទ្ធBaltops “ឥតតម្រង់ប្រឆាំងនឹងប្រទេសណាឡើយ” ហើយ“មិនត្រូវចាត់ទុកវាជាចម្លើយតបនឹង ការគម្រាមណាមួយដ៏ជាក់លាក់ឡើយ”។ គប្បីពិនិត្យមើលសមយុទ្ធនេះ តែជាលទ្ធភាពសំដែង“ សាមគ្គីភាព ធ្លុងមួយ“ហើយ“ រួមគ្នាត្រៀមប្រយុទ្ធ” ដើម្បីបង្ហាញសមត្ថភាពបក្សសម្ព័ន្ធអូតង់ទ្រទ្រង់សន្តិសុខ និងស្ថិរភាពនៅតំបន់បាល់ទិក។ ការនេះ តាមសំដី លោកឧត្តមនាវីទោ Grady គឺស្រដីឲ្យឃើញពីភាពត្រៀមខ្លួនសមាជិកនិមួយៗរបស់អូតង់ បំពេញនូវកាតព្វកិច្ចរៀងៗខ្លួន។
ប៉ុន្តែ អាជ្ញាធររុស្ស៊ីមិនយល់ឃើញយ៉ាងនេះឡើយ។ “ រុស្ស៊ីតែងព្រួយបារម្ភ កាលណាបរទេសធ្វើលំហាត់សឹកនៅក្បែរព្រំប្រទល់ខ្លួនតែម្តង។ លំហាត់យ៉ាងគគ្រឹកគគ្រេង ធ្វើដោយអូតង់ នៅតំបន់បាល់ទិក ក្នុងខែមិថុនានោះ គឺជាភាគមួយ នៃ ផែនការបក្សសម្ព័ន្ធនេះ ដើម្បីទប់អានុភាពរុស្ស៊ី ប៉ុន្តែ រុស្ស៊ីផ្ទាល់គ្មានសោះឡើយគម្រោងអ្វីណា ដើម្បីសង្គ្រប់យក ៣ប្រទេសបាល់ទិក រឺប៉ូឡូញ រឺរដ្ឋណាមួយនៅអឺរ៉ុប “សេចក្តីនេះ ថ្លែងដោយអនុប្រធានគណៈកម្មាធិការសភាឌូម៉ាខាងការពារប្រទេស លោក Andrei Krassov។
ពេលដែលរុស្ស៊ីនិងចិន ធ្វើសមយុទ្ធនៅសមុទ្របាល់ទិក ប្រព័ន្ធផ្សព្វផ្សាយបស្ចិមលោក នាំគ្នាចេញបទអត្ថាធិប្បាយ ក្នុងន័យឈ្នានីសរហូតដល់ប្រកាសភាពអាសន្នទៅផង ក្រោមចំណងជើងបែបយ៉ាង ៖
-ចិននិងរុស្ស៊ីគ្រវែងនៅសមុទ្របាល់ទិក ទៅកាន់អូតង់នូវសូរប្រកូកប្រកាស បបួលឲ្យប្រកួតជាមួយខ្លួន
-ក្នុងល្បែងយោធារវាងរុស្ស៊ីនិងអូតង់នៅទ្វីបអឺរ៉ុប មានលេចចេញមកតួអង្គថ្មី គឺចិនឫ?
-លំហាត់សឹករួមគ្នាចិន-រុស្ស៊ី នៅមាត់ទ្វារអឺរ៉ុប ជាសារនយោបាយផ្ញើទៅលោកត្រាំ និងអូតង់
-រុស្ស៊ិនិងចិនប្តេជ្ញាគាំទ្រនិងការពារគ្នាទៅវិញទៅមក។ល។
ជាចម្លើយតបវិញ ប្រព័ន្ធផ្សព្វផ្សាយរុស្ស៊ី នាំគ្នាដៀមដាមឲ្យក្នុងទម្រង់ថា សរអានិង អូតង់ បំពាក់លើខ្លួននូវសិទ្ធិធ្វើសមយុទ្ធត្រង់ចំណុចណាក៏ដោយនៃផែនដី តែក្រោមលេសមួយគត់ គឺដើម្បីពង្រឹងប្រជាធិបតេយ្យ ហើយមិនបង្ករឿងដល់ ប្រទេសជិតខាងទេ។ នាវាចំបាំងអាមេរិកាំង យាត្រាស្រេចតែក្បាលចិត្ត ក្នុងលំហសមុទ្របាល់ទិក ដូចក្នុងផ្ទះខ្លួនអញ្ចឹង។ នាវាបាញ់គ្រាប់បែកបុករបស់អាមេរិក បើកចូលចត កំពង់ផែលីទុយអានីយ៉ាងសំញែង ប៉ុន្តែ រដ្ឋមន្ត្រីការពារជាតិប្រទេសនេះខំដោះសាថា ការនេះបញ្ជាក់ពីភាពប្តេជ្ញារបស់សរអា តទៅថ្ងៃមុខ ពង្រឹងសហប្រតិបត្តិការ ជាមួយបណ្តាសម្ព័ន្ធមិត្ត ក្នុងបក្សអូតង់នៅតំបន់បាល់ទិកទេតើ។
តាមប្រព័ន្ធផ្សព្វផ្សាយរុស្ស៊ី ម៉ូស្គូ និងប៉េកាំង មានរៀងៗខ្លួនគឺ មូលដ្ឋានយោធាតែមួយគត់នៅបរទេស ៖ ចិនមានមូលដ្ឋានបែបនេះ នៅDjibouti, រុស្ស៊ីមាននៅ Syrie ។ តួលេខនេះខុសគ្នាដូចមេឃ និងដីបើប្រៀបទៅនឹងចំនួនមូលដ្ឋានដល់ទៅ៨០០កន្លែង ដែលសរអាពង្រាយជាបណ្តាញក្តោបភពផែនដីតែម្តង ហើយនេះ ដោយមិនទាន់រាប់ បន្ទាយទាហានចំនួន រាប់រយ រាយនៅតាម ៨០ប្រទេសទៅផង។
ទីភ្នាក់ងារពត៌មានចិន Sinhua ពីចំណែកខ្លួនសង្កត់ធ្ងន់ថា សមយុទ្ធនៅសមុទ្របាល់ទិក រំលេចឲ្យឃើញពី “ការពង្រឹងនិងពង្រីកភាពជាដៃគូយុទ្ធសាស្ត្រ និង ការសម្របសម្រួលសកម្មភាពរវាងចិននិងរុស្ស៊ី ឆ្ពោះទៅស៊ីជម្រៅមិត្តភាព និង សហប្រតិបត្តិការតាមមុខព្រួញជាក់លាក់រវាងកងនាវាប្រទេសទាំងពីរ។
ទាំងម៉ូស្គូ ទាំងប៉េកាំង សុទ្ធតែគូសបញ្ជាក់ថា លំហាត់សឹករួមគ្នានេះ តតម្រង់ប្រឆាំងនឹងនរណាឡើយ។ គោលដៅចម្បងរបស់វា គឺ បង្កើនប្រសិទ្ធភាពនៃការសម្របសកម្មភាពពួកនាវិកចិននិងរុស្ស៊ី ដើម្បីប្រឈមរួមគ្នាទល់នឹងការគម្រាមណាក៏ដោយ ដល់ សន្តិសុខនាវាចរណ៍ និងដល់សកម្មភាពសេដ្ឋកិច្ចប្រទេសទាំងពីរនៅលំហសមុទ្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ