ប៉ាគីស្ថាន ៖ តុលាការកំពូលសម្រេចដកនាយករដ្ឋមន្ត្រី ចេញពីតំណែងពីបទពុករលួយ
ចុះផ្សាយនៅថ្ងៃ៖
ស្តាប់ - ០៥:៥៤
លោក ណាវ៉ា ស្ហារីហ្វ Nawaz Sharif មិនអាចបញ្ចប់អាណត្តិជាប្រមុខរដ្ឋាភិបាលទៀតទេ ! តុលាការកំពូលប៉ាគីស្ថាន ទើបបានប្រកាសសេចក្តីសម្រេចនៅថ្ងៃសុក្រនេះ ដកទំនុកចិត្តពីលោក ណាវ៉ា ស្ហារីហ្វ ជានាយករដ្ឋមន្ត្រី និងបានបញ្ជាឱ្យអាជ្ញាធរទទួលបន្ទុកប្រយុទ្ធប្រឆាំងនឹងអំពើពុករលួយ បើកអង្កេតលើបទសង្ស័យពាក់ព័ន្ធនឹងរូបលោក ណាវ៉ា ស្ហារីហ្វ ព្រមទាំងគ្រួសារ។ លោក ណាវ៉ា ស្ហារីហ្វ ជាអ្នកនយោបាយប៉ាគីស្ថានតាំងតែពីយូរយារមកហើយ តែក៏មានប្រវត្តិចម្រូងចម្រាសខ្លាំងណាស់ដែរ។
នេះជាគឺជាលើកពីរហើយក្នុងប្រវត្តិសាស្ត្រប៉ាគីស្ថាន ដែលតុលាការកំពូលលូកដៃធ្វើអន្តរាគមន៍ទម្លាក់នាយករដ្ឋមន្ត្រី។ លើកទីមួយនៅឆ្នាំ ២០១២ តុលាការបានកាត់ទោសទម្លាក់នាយករដ្ឋមន្ត្រី Raza Gilani ពីបទរារាំងការងារតុលាការដោយបដិសេធមិនព្រមឱ្យអាជ្ញាធរមានសមត្ថកិច្ចបើកអង្កេតប្រឆាំងនឹងប្រធានាធិបតី Asif Zardari ពីបទពុករលួយ។
នៅថ្ងៃនេះ តុលាការកំពូលប៉ាគីស្ថានដដែល បានសម្រេចដកទំនុកចិត្តពីលោក ណាវ៉ា ស្ហារីហ្វ ហើយបញ្ជាឱ្យបើកអង្កេតពុករលួយប្រឆាំងនឹងលោកនាយករដ្ឋមន្ត្រីទៀត។ សាលក្រមបានប្រកាស ក្នុងបរិបទដ៏តានតឹងនិងប្រុងប្រយ័ត្នខ្លាំង។ តាំងពីព្រហាមមក ប៉ាគីស្ថានបានពង្រឹងសន្តិសុខ ពង្រាយកម្លាំងប៉ូលិស និងកងស្វ័យត្រាន ប្រមាណ៣ពាន់នាក់ នៅជុំវិញតុលាការកំពូល។
នាយករដ្ឋមន្ត្រីប៉ាគីស្ថានជនរងគ្រោះម្នាក់នៃរឿងអាស្រូវពុករលួយនៅប៉ាណាម៉ា
តាមការពិតរឿងអាស្រូវពុករលួយនៅប៉ាគីស្ថាននេះ វាបានផ្ទុះឡើងដំណាលគ្នានឹងរឿងអាស្រូវពុករលួយពិភពលោកនៅប៉ាណាម៉ា Panama papers កាលពីឆ្នាំទៅ។ គណៈកម្មការអង្កេតដែលមានសមាសភាគជាជនស៊ីវិលនិងយោធាត្រូវបានបង្កើតឡើង។
កាលពីខែមេសា តុលាការបានអះអាងថាគ្មានភស្តុតាងគ្រប់គ្រាន់សម្រាប់ចាប់កំហុសលោកណាវ៉ា ស្ហារីហ្វទេ ប៉ុន្តែលទ្ធផលការងាររបស់គណៈកម្មការអង្កេត ដែលទើបបញ្ចប់សេចក្តីសន្និដ្ឋានរបស់ខ្លួនកាលពីដើមខែ បានបំភ្លឺភាពសង្ស័យបានច្រើន។
គេសង្ស័យថាលោកនាយករដ្ឋមន្ត្រី ណាវ៉ា ស្ហារីហ្វ មានលាក់ក្រុមហ៊ុន និងទ្រព្យសម្បត្តិ នៅបរទេស ដោយប្រើឈ្មោះកូនៗ។ ក្នុងចំណោមកូនទាំងបួនរបស់លោក មានកូនប្រុសពីរនាក់ និងកូនស្រីម្នាក់ដែលគេគិតថាអាចជាអ្នកស្នងតំណែងនយោបាយបន្តពីឪពុកផង ត្រូវបានគណៈកម្មការកោះហៅមកឆ្លើយបំភ្លឺ។
ប្រវត្តិនយោបាយច្រំដែលរបស់លោកណាវ៉ា ស្ហារីហ្វ
លោក ណាវ៉ា ស្ហារីហ្វ ជាអ្នកនយោបាយដ៏មានឈ្មោះម្នាក់ នៅក្នុងប្រទេស ជាតំណាងអ្នកឈ្មុះឈ្មុលតស៊ូនយោបាយម្នាក់ បើទោះបីនៅលោកមិនសូវចេញមុខចេញមាត់ខ្លាំងលើឆាកអន្តរជាតិក៏ដោយ។ លោកមានទម្លាប់ស្លៀកពាក់បែបប្រពៃណីជានិច្ច។ កើតនៅថ្ងៃទី ២៥ ធ្នូ ឆ្នាំ១៩៤៩ ក្នុងត្រកូលអ្នកមានខ្លាំងនៅ Pendjab ជាត្រកូលអ្នកឧស្សាហកម្ម ដ៏ល្បីល្បាញនៅប៉ាគីស្ថាន ដែលអាចចាត់ទុកបានថាជាស្នូលនៃនយោបាយនិងសេដ្ឋកិច្ចរបស់ប្រទេស លោក ណាវ៉ា ស្ហារីហ្វ មានសញ្ញាប័ត្រផ្នែកច្បាប់ មុននឹងចូលមកធ្វើការជាមួយឪពុកក្រុមហ៊ុនឧស្សាហកម្មដែកថែប។
លោកបានចូលប្រលូកនយោបាយដំបូង ក្រោមការណែនាំរបស់ Zia-ul Haq មេដឹកនាំផ្តាច់ការយោធា ដែលជាប់ចោទថាសម្រួលឱ្យមានអ៊ីស្លាមជ្រុលនិយមនៅប៉ាគីស្ថាន។
នៅឆ្នាំ១៩៩០ លោក ណាវ៉ា ស្ហារីហ្វ បានឈ្នះបោះឆ្នោតទល់នឹងលោកស្រី បេណាហ្សៀ ប៊ូតូ Benazir Bhutto។ បីឆ្នាំក្រោយការកាន់អំណាច លោកត្រូវជាប់សង្ស័យពីបទពុករលួយ ហើយត្រូវខ្ទាតចេញពីតំណែងហើយលោកស្រីប៊ូតូឡើងជំនួសវិញ។ នៅឆ្នាំ១៩៩៧ ក្រោយពីបានបង្កើតចលនានយោបាយសេរី ប្រជាប្រិយភាពឡើងខ្ពស់ លោកក៏បានឈ្នះឆ្នោតសភា និងបានក្លាយជាប្រមុខដឹកនាំរដ្ឋាភិបាល។ ប៉ុន្តែនៅឆ្នាំ១៩៩៩ ឧត្តមសេនីយ៍ មូស្ហារាហ្វ Musharraf បានដឹកនាំធ្វើរដ្ឋប្រហារទម្លាក់លោក និងកាត់ទោសលោកឱ្យជាប់ពន្ធនាគារអស់មួយជីវិត មុននឹងអាចសម្រាលអនុញ្ញាតឱ្យលោកនិរទេសខ្លួនទៅអារ៉ាប៊ីសាអូឌីត។
លោកបានត្រលប់ចូលប្រទេសវិញ ក្រោយឃាតកម្មសម្លាប់លោក ប៊ូតូ នៅឆ្នាំ២០០៧ ដើម្បីចូលរួមបោះឆ្នោតសភា និងបានឡើងកាន់អំណាច ៥ឆ្នាំបន្ទាប់មកទៀត។ ការដឹកនាំប្រទេសរបស់លោកគឺឈរលើគោលការណ៍ផ្សះផ្សាសន្តិភាពជាមួយឥណ្ឌានិងសេដ្ឋកិច្ច លោកមិនសូវផ្តល់អាទិភាពដល់នយោបាយការបរទេស និងសន្តិសុខផ្ទៃក្នុងប្រទេស ដែលពួកយោធាមានអំណាចខ្លាំងទេ។ ហើយនៅថ្ងៃនេះ ក្រោយសេចក្តីសម្រេចរបស់តុលាការកំពូល លោកណាវ៉ា ស្ហារីហ្វ បានបង្ខំ ចិត្តលាលែងចេញពីតំណែង។ បើគិតសព្វៗទៅ លោក ណាវ៉ា ស្ហារីហ្វ មិនដែលបានដឹកនាំប្រទេស បញ្ចប់អាណត្តិរបស់ខ្លួនឱ្យបានពេញលេញទេ។
បក្សប្រឆាំងបានឱកាស
ជាមួយនឹងសេចក្តីសម្រេចរបស់តុលាការកំពូលទម្លាក់នាយករដ្ឋមន្ត្រីនិងរដ្ឋមន្ត្រីក្រសួងហិរញ្ញវត្ថុជាជំនិត ប៉ាគីស្ថានពេលនេះត្រូវធ្លាក់ក្នុងភាពវិលវល់ជាថ្មី បន្ទាប់ពីបានស្គាល់ភាពស្ងប់ស្ងាត់អស់មួយរយៈ។ ការបណ្តេញប្រមុខរដ្ឋាភិបាលចេញពីតំណែង ក្រោមបទពុករលួយ ក៏បានបំផុសឱ្យមានសំណួរមួយទាក់ទងនឹងភាពរឹងមាំនៃលទ្ធិប្រជាធិបតេយ្យនៅប៉ាគីស្ថាន។ គិតចាប់តាំងពីបានទទួលឯករាជ្យនៅឆ្នាំ១៩៤៧មក គ្មាននាយករដ្ឋមន្ត្រីប៉ាគីស្ថានណាម្នាក់អាចបញ្ចប់អាណត្តិរបស់ខ្លួនដោយត្រឹមត្រូវទេ !
ម្យ៉ាងវិញទៀត ថ្វីបើពេលនេះ គណបក្សរបស់លោកណាវ៉ា ស្ហារីហ្វ អាចតែងតាំងនាយករដ្ឋមន្ត្រីថ្មី បានដោយគ្មានបញ្ហាព្រោះពួកគេមានសំឡេងភាគច្រើនក្នុងសភាមែន ប៉ុន្តែវាបានផ្តល់ឱកាសឱ្យបក្សប្រឆាំងធ្វើការវាយប្រហារលើបក្សកាន់អំណាច ព្រោះការបោះឆ្នោតសភាអាណត្តិថ្មី នឹងមកដល់នៅពាក់កណ្តាលឆ្នាំ២០១៨ឆាប់ៗនេះ។
មេបក្សប្រឆាំងធ្លាប់បានទាមទារជាញយមកហើយ ឱ្យលោក ណាវ៉ា ស្ហារីហ្វចុះចេញពីតំណែង ដើម្បីក្រុមអង្កេតពុករលួយធ្វើការស្រួល។ ពេលនេះពួកគេអបអរ ដោយបានឃើញប៉ាគីស្ថានបិទបញ្ចប់សករាជដឹកនាំប្រទេសរបស់ត្រកូលស្ហារីហ្វ។
លោក ណាវ៉ា ស្ហារីហ្វ ថ្វីបើបានប្រកាសលាលែងតំណែងមែន តែលោកបានបដិសេធរាល់គ្រប់បទចោទប្រកាន់ពុករលួយ និងបរិហារថាជាការផ្សំគំនិតសងសឹក។
អំពើពុករលួយជាជំងឺរ៉ាំរ៉ៃនៅប៉ាគីស្ថាន។ បើតាមអង្គការតម្លាភាពអន្តរជាតិ ប៉ាគីស្ថានជាប់ចំណាត់លេខ១១៦ លើ១៧៦ប្រទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ