ខួប៦៤ឆ្នាំនៃការបញ្ចប់សង្គ្រាមកូរ៉េ អាមេរិកបារម្ភខ្លាចកូរ៉េខាងជើងបាញ់មីស៊ីលជាថ្មីទៀត
ចុះផ្សាយនៅថ្ងៃ៖
ថ្ងៃព្រហស្បតិ៍ ២៧កក្កដានេះ កូរ៉េខាងជើងនិងកូរ៉េខាងត្បូងប្រារព្ធថ្ងៃខួប៦៤ឆ្នាំនៃការបញ្ចប់សង្គ្រាមកូរ៉េ។ កូរ៉េខាងជើងប្រារព្ធខួបនេះ ដោយបានចាត់ទុកខ្លួនថា ជាប្រទេសមហាអំណាចនុយក្លេអ៊ែរពិតប្រាកដ។ សហរដ្ឋអាមេរិកបារម្ភថា កូរ៉េខាងជើងអាចបាញ់មីស៊ីលអន្តរទ្វីបជាថ្មីទៀត នៅថ្ងៃខួបបញ្ចប់សង្គ្រាមកូរ៉េនេះ។
កូរ៉េខាងជើងប្រារព្ធខួប៦៤ឆ្នាំនៃការបញ្ចប់សង្គ្រាមកូរ៉េ ដោយចាត់ទុកខ្លួនឯងជាមហាអំណាចនុយក្លេអ៊ែរពិតប្រាកដ
កូរ៉េខាងជើងហ៊ានអួតអាងដូច្នេះ ដោយសារតែបានបាញ់មីស៊ីលអន្តរទ្វីបICBM ពេលអាមេរិកប្រារព្ធ ថ្ងៃបុណ្យជាតិ ៤កក្កដា កាលពីដើមខែនេះឯង។ មីស៊ីលអន្តរទ្វីបកូរ៉េខាងជើងមួយនេះ ត្រូវបានអ្នកជំនាញរំពឹងថា អាចបាញ់ដល់អាឡាស្កា ក្នុងទឹកដីអាមេរិក។ ដោយសារក្រុមជំនាញលើកឡើងបន្តបន្ទាប់គ្នា ថា កូរ៉េខាងជើងមានការរីកចំរើននុយក្លេអ៊ែរនេះហើយ ទើបថ្ងៃខួប៦៤ឆ្នាំ នៃការបិទបញ្ចប់សង្គ្រាមកូរ៉េ ក្រុងព្យុងយ៉ាងមានមោទនភាព ហ៊ានរហូតអះអាងអួតទៅអាមេរិកថា គឺកូរ៉េខាងជើងឯណេះទេទើបជាមហាអំណាចនុយក្លេអ៊ែរពិតប្រាកដ ព្រោះមីស៊ីលក្រុងព្យុងយ៉ាងអាចបាញ់ដល់ដែនដីអាមេរិក។ ក្រុងព្យុងយ៉ាងធ្លាប់អួតដែរថា មីស៊ីលខ្លួនអាចបាញ់បាននៅគ្រប់ទិសទីទៀតផង។ ថ្មីៗនេះ រដ្ឋមន្ត្រីក្រសួងការពារជាតិកូរ៉េខាងជើងបានព្រមានអាមេរិកជាថ្មីទៀត ថាកុំអោយបន្តនយោបាយប្រឆាំងក្រុងព្យុងយ៉ាងអោយសោះ មិនដូច្នោះទេ ក្រុងព្យុងយ៉ាងនឹងវាយប្រហារអាមេរិកដោយអាវុធនុយក្លេអ៊ែរតែម្តង។ កូរ៉េខាងជើងគំរាមដូច្នេះ ដោយសារតែថ្មីៗនេះដែរ ទីភ្នាក់ងារសេអ៊ីអាធ្វើអោយកូរ៉េខាងជើងគិតថា អាមេរិកចង់ទំលាក់លោកគឹម ជុងអ៊ុនពីអំណាច។ អាមេរិកផ្គើនកូរ៉េខាងជើងដែរនោះ ដោយសារតែកូរ៉េខាងជើងបានបាញ់មីស៊ីលអន្តរទ្វីបកាលពីថ្ងៃបុណ្យជាតិអាមេរិកនោះហើយ។
ប៉ុន្តែ អាមេរិកបារម្ភដែរថា កូរ៉េខាងជើងអាចបាញ់មីស៊ីលជាថ្មីទៀត ពិសេសអាចបាញ់ថ្ងៃព្រហស្បតិ៍នេះតែម្តង ព្រោះជាថ្ងៃខួបបញ្ចប់សង្គ្រាមកូរ៉េ។ ក្រោយក្រុងព្យុងយ៉ាងបាញ់មីស៊ីលអន្តរទ្វីបថ្ងៃ៤កក្កដា អាមេរិកនិងកូរ៉េខាងត្បូងធ្លាប់សង្ស័យទៀតថា កូរ៉េខាងជើងកំពុងធ្វើសកម្មភាពត្រៀមបាញ់មីស៊ីលថ្មីទៀត។ កូរ៉េខាងត្បូងធ្លាប់ចាប់បានសញ្ញាថា មានសកម្មភាពរថយន្តដឺកសម្ភារប្រើសម្រាប់បាញ់មីស៊ីល នៅភាគខាងលិចកូរ៉េខាងជើង។ បើក្រុងព្យុងយ៉ាងបាញ់មីស៊ីលជាថ្មីទៀត អាមេរិកគិតថា វាជាប្រភេទមីស៊ីលអន្តរទ្វីបICBM រឺក៏មីស៊ីលបាញ់បានចំងាយមធ្យម។
ទីបំផុត អាមេរិកដែលធ្លាប់តែមើលស្រាលសមត្ថភាពនុយក្លេអ៊ែរក្រុងព្យុងយ៉ាង ចាប់ផ្តើមបារម្ភ ហើយ។ សង្គ្រាមកូរ៉េបិទបញ្ចប់ទៅហើយមែន តែបញ្ចប់ដោយមានបទឈប់បាញ់ ចុះថ្ងៃ២៧កក្កដា ឆ្នាំ១៩៥៣ប៉ុណ្ណោះ គ្មានសន្ធិសញ្ញាសន្តិភាពអ្វី ដែលតំរូវដាច់ខាតទេ ដូច្នេះ កូរ៉េនៅតែស្ថិតក្នុងស្ថានភាពសង្គ្រាម នៅតែអាចមានសង្គ្រាមជាមួយគ្នាជានិច្ច។ ដោយសារគ្មានសន្ធិសញ្ញាសន្តិភាពនេះហើយ ទើបសារព័ត៌មានផ្លូវការកូរ៉េខាងជើងថា កូរ៉េខាងជើងជាអ្នកឈ្នះ ក្រោយសង្គ្រាមកូរ៉េបិទបញ្ចប់ទៅនេះ។ ជាជោគជ័យរបស់កូរ៉ែខាងជើង។ កូរ៉េខាងជើងនិងអាមេរិកនៅតែតានតឹងខ្លាំងនឹងគ្នា/ ល្ងាចមិញនេះ មន្ត្រីមួយចំនួននៅមន្ទីរប៉ង់តាហ្កូនគិតរហូតថា លោកដូណាល់ ត្រាំ អាចសរសេរតាមទ្វីតថឺ ប្រកាសសង្គ្រាម រឺការវាយប្រហារណាមួយ ទល់នឹងកូរ៉េខាងជើងទៀតផង។
សូមបញ្ជាក់ដែរថា ចាប់ពីថ្ងៃ២៧កក្កដានេះទៅ អាមេរិកហាមពលរដ្ឋខ្លួនអោយមិនអោយទៅកំសាន្តនៅកូរ៉េខាងជើងទេ នេះជាទណ្ឌកម្មហើយក៏ជាការផ្គើនមួយរបស់អាមេរិកចំពោះកូរ៉េខាងជើង ចំថ្ងៃបុណ្យខួបបញ្ចប់សង្គ្រាមកូរ៉េដែរ។ ហេតុនេះហើយទើបអាមេរិកបារម្ភថាថ្ងៃនេះ កូរ៉េខាងជើងបាញ់មីស៊ីលជាថ្មីទៀត។
ក្រុងព្យុងយ៉ាងមិនខ្វល់ខ្វាយពីទណ្ឌកម្មអាមេរិកប្រឆាំងវិស័យទេសចរកូរ៉េខាងជើងទេ
ភ្ញៀវទេសចរដែលមកលេងកូរ៉េខាងជើងឆ្នាំ២០១៦ មានប្រមាណជា១សែននាក់ ក្នុងនោះ៩៥ភាគរយជាទេសចរជនជាតិចិន។ អញ្ចឹងមានន័យថា អ្នកទេសចរអាមេរិកមិនមានច្រើនទេ។ ប្រហែលដូច្នេះហើយ ទើបក្រុងព្យុងយ៉ាងមិនខ្វល់ពីទណ្ឌកម្មអាមេរិក។ ទោះយ៉ាងនេះក្តី អ្នកទេសចរអាមេរិកទៅកំសាន្តកូរ៉េខាងជើង ឆ្នាំ២០១៦កន្លងទៅ មានជាង១ពាន់នាក់ដែរ។ ក្រុងព្យុងយ៉ាងកំពុងបើកទីផ្សារបន្តបន្ទាប់ កំពុងធ្វើការផ្សព្វផ្សាយ អោយអ្នកទេសចរលោកខាងលិចមកទស្សនាទឹកដីខ្លួន។ មានទេសចរលោកខាងលិចមកលេងកូរ៉េខាងជើង៥ពាន់នាក់ដែរ ឆ្នាំមុននេះ។ ក្រុងព្យុងយ៉ាងមានទិសដៅជំរុញអោយភ្ញៀវទេសចរមកកំសាន្តកូរ៉េខាងជើង បានឡើងដល់ចំនួន១លាននាក់ នៅសម្រាប់ឆ្នាំ២០១៧នេះ និង២លាននាក់សម្រាប់ឆ្នាំ២០២០។ ក្រុងព្យុងយ៉ាងថាមិនខ្វល់ពីទណ្ឌកម្មអាមេរិក រឺក៏ទណ្ឌកម្មអន្តរជាតិសោះនោះ ក៏ពិបាកជឿ១០០ភាគរយដែរ។
កន្លងមក ឃើញថា លោកគឹម ជុងអ៊ុន គិតតែអភិវឌ្ឍន៍នុយក្លេអ៊ែរ ភ្លេចគិតពីភាពអត់ឃ្លានរបស់ប្រជាជន ភ្លេចគិតពីគ្រោះរាំងស្ងួតក្នុងស្រុក។ ប៉ុន្តែ បើយោងតាមធនាគារកណ្តាលរបស់កូរ៉េខាងត្បូង សេដ្ឋកិច្ចកូរ៉េខាងជើង ឆ្នាំ២០១៦កន្លងទៅ មានការកើនខ្ពស់គួរកត់សម្គាល់ណាស់ គឺក្នុងតួលេខ៣,៩ភាគរយ មិនធ្លាប់មានទេ គិត១៧ឆ្នាំចុងក្រោយនេះ។ កូរ៉េខាងជើងអាចសម្រេចកំណើនសេដ្ឋកិច្ចដូច្នេះ ដោយសារការផលិតផ្នែកឧស្សាហកម្មធុនធ្ងន់ ឧស្សាហកម្មគីមី និងការនាំចេញរ៉ែទៅបរទេស។ រដ្ឋាភិបាលកូរ៉េខាងជើងមាននយោបាយសេរីភាវូបនីយកម្ម អនុគ្រោះសហគ្រាសក្រុមហ៊ុនតូចៗ ដែលរកស៊ីផ្នែកចំណីអាហារ និងនាំផលិតផលចូលមកពីចិន។ អញ្ចឹងហើយ ទើបសេដ្ឋកិច្ចកូរ៉េខាងជើងអាចធនទ្រាំ ទប់ទល់ទណ្ឌកម្មអន្តរជាតិបាន។
ដោយឡែក អាមេរិកតែងទូន្មានពលរដ្ឋខ្លួនមិនអោយទៅលេងកូរ៉េខាងជើង មិនមែនដើម្បីតែបិទខ្ទប់ចំណូលថវិកា រារាំងការអភិវឌ្ឈន៍មីស៊ីលរបស់កូរ៉េខាងជើងតែមួយមុខទេ។ អាមេរិកបារម្ភដែរថា កូរ៉េខាងជើងអាចចាប់ខ្លួនអ្នកទេសចរអាមេរិកដោយប្រកាសណាមួយ។ ជាក់ស្តែង កន្លងមក និស្សិតអាមេរិកមួយរូប ត្រូវបានក្រុងព្យុងយ៉ាងដាក់ទោសអោយធ្វើពលកម្មលត់ដំ១៥ឆ្នាំ តែទទួលទោសមិនបានមួយឆ្នាំផង និស្សិតអាមេរិកបានធ្លាក់ខ្លួនឈឺសន្លប់ ឈឺរហូតស្លាប់។ ដោយឡែក បើអាមេរិកដាក់ទណ្ឌកម្មធ្ងន់ប្រឆាំងសេដ្ឋកិច្ចកូរ៉េខាងជើង ក៏អាចប៉ះពាល់ដល់ចិនដែរ ព្រោះចិនមានសហគ្រាសក្រុមហ៊ុនរកស៊ីនៅកូរ៉េខាងជើង។
ដោយឡែក បញ្ហាប្រទាក់ក្រឡាគ្នា នៅឧបទ្វីបកូរ៉េ បែបយ៉ាងការប្រឈមរវាងកូរ៉េខាងជើង ទល់នឹងអាមេរិកបូករួមទាំងកូរ៉េខាងត្បូងមិនបានជួយបន្ថយភាពតានតឹងនៅឧបទ្វីបកូរ៉េទេ។ លោកមូន ចែអ៊ីន ជាប្រធានាធិបតីកូរ៉េខាងត្បូង បានសុំចរចាជាមួយកូរ៉េខាងជើងជាផ្លូវការក៏ពិតមែន តែលោកនៅតែព្យាយាមបន្តរឹតចំណងទំនាក់ទំនងជាមួយអាមេរិក។ សង្គ្រាមកូរ៉េបានបញ្ចប់ទៅហើយមែន តែកូរ៉េខាងត្បូងនិងអាមេរិកធ្វើសមយុទ្ធយោធាជាមួយគ្នា ធ្វើអោយក្រុងព្យុងយ៉ាងយកលេសថា អាមេរិកនិងកូរ៉េខាងត្បូងផ្គើន ចង់ធ្វើការវាយលុកកូរ៉េខាងជើង។ ដូច្នេះ កូរ៉េខាងជើងមិនអាចលុបចោលការអភិវឌ្ឈន៍មីស៊ីល រឺនុយក្លេអ៊ែររបស់ខ្លួនទេ។ អាមេរិកទៀតសោត ក៏នៅតែផ្គើន ដោយបានបញ្ជូនខែលមីស៊ីលការពារមីស៊ីលទៅកូរ៉េខាងត្បូង ធ្វើអោយចិនដែលនៅក្បែរនោះ មិនសប្បាយចិត្តដូចគ្នាដែរ។ គេមិនងាយដោះស្រាយបញ្ហាតានតឹងឧបទ្វីបកូរ៉េបានស្រួលៗទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ