ប្រធានាធិបតីឥណ្ឌូណេស៊ី បញ្ជាឱ្យប៉ូលិសបាញ់ឈ្មួញគ្រឿងញៀន ដែលចង់តដៃ
ប្រធានាធិបតីឥណ្ឌូណេស៊ី លោក Joko Widodo វីដូដូ បានចេញបញ្ជាផ្តល់សិទ្ធិឱ្យប៉ូលិស អាចបាញ់ ជាស្វ័យប្រវត្តិ ជនសង្ស័យជួញដូរគ្រឿងញៀនណា ដែលមិនព្រមប្រគល់ខ្លួនឱ្យអាជ្ញាធរចាប់ដោយសម្រួល។ បទបញ្ជានេះ ត្រូវប្រតិបត្តិលើគ្រប់ជនសង្ស័យទាំងអស់ មិនថាជននោះជាឥណ្ឌូណេស៊ី ឬជាបរទេសឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥២
ថ្ងៃមុនភ្នាក់ងារជាតិឥណ្ឌូណេស៊ី បានប្រកាសចង់យកគំរូតាមហ្វីលីពីន ក្នុងការប្រយុទ្ធប្រឆាំងគ្រឿងញៀន ! ថ្ងៃនេះ ប្រធានាធិបតី វីដូដូ បានចេញបញ្ជាដោយផ្ទាល់មាត់ និងជាសាធារណៈតែម្តង។
“ត្រូវតែម៉ឺងម៉ាត់ដាច់ខាតខ្លាំង ! ជាពិសេសជាមួយពួកជួញដូរគ្រឿងញៀនបរទេស ដែលចូលមកក្នុងប្រទេសឥណ្ឌូណេស៊ី ! ប្រសិនបើពួកគេហ៊ានតតាំងជាមួយអាជ្ញាធរ ទោះបន្តិចក៏ដោយ អ្នកបាញ់ពួកគេទៅ !” នេះជាប្រសាសន៍របស់លោកប្រធានាធិបតីឥណ្ឌូណេស៊ី ទៅកាន់ស្ថាប័នប៉ូលិស នាឱកាសជំនួបធ្វើសន្ទរកថា ជាមួយបក្សនយោបាយ។
បើតាមតួលេខផ្លូវការ ក្នុងចំណោមប្រជាជនឥណ្ឌូណេស៊ីទាំងអស់២២៥លាននាក់ គេរាប់ឃើញ មកទល់ថ្ងៃនេះ មានអ្នកប្រើប្រាស់គ្រឿងញៀនប្រមាណជាង ៦លាននាក់។ ប្រឈមនឹងស្ថានភាពបែបនេះ លោកប្រធានាធិបតី យល់ថា ប្រទេសកំពុងធ្លាក់ក្នុង ស្ថានភាពអាសន្នគ្រឿងញៀន ដែលមិនអាចអនុគ្រោះបានទៀតឡើយ។
ប៉ុន្តែសេចក្តីថ្លែងការណ៍របស់លោកប្រធានាធិបតី បានទទួលរងការរិះគន់យ៉ាងខ្លាំងក្លា និងភ្លាមមួយរំពេចពីសំណាក់ក្រុមអ្នកការពារសិទ្ធិមនុស្ស ដែលបាននិងកំពុងប្រមូលកម្លាំងគ្នាប្រយុទ្ធប្រឆាំងនឹងសង្គ្រាមគ្មានអាសូរកម្ចាត់ពួកជួញដូរគ្រឿងញៀនរបស់ប្រធានាធិបតីហ្វីលីពីន នៅក្នុងប្រទេសហ្វីលីពីន។ បើតាមតំណាងអង្គការការពារសិទ្ធិមនុស្ស Human Rights Watch ទទួលបន្ទុកលើប្រទេសឥណ្ឌូណេស៊ី សេចក្តីថ្លែងការណ៍របស់ប្រធានាធិបតី វីដូដូ គឺពាក្យបញ្ជា និងជាការបើកដៃឱ្យប៉ូលិសបាញ់ ជនសង្ស័យ ដោយគ្មានខ្វល់នឹងដំណើរការនីតិវិធីអ្វីទាំងអស់។
ឥណ្ឌូណេស៊ីមានច្បាប់ប្រឆាំងនឹងការជួញដូរគ្រឿងតឹងតែងខ្លាំងស្រាប់ណាស់ទៅហើយ ដោយបានកំណត់ដាក់ទោសប្រហារជីវិតតែម្តង ជនណាដែលមានគ្រឿងញៀនក្នុងដៃចាប់ពី៥ក្រាមឡើងទៅ។ នារយៈពេលពីរឆ្នាំចុងក្រោយនេះ អ្នកជួញដូរគ្រឿងញៀន១៨នាក់ បានត្រូវប្រហារជីវិត ក្នុងនោះពីរនាក់ជាជនជាតិអូស្ត្រាលី។ នៅសប្តាហ៍មុន ប៉ូលិសឥណ្ឌូណេស៊ីបានបាញ់សម្លាប់ជនជាតិតៃវ៉ាន់ម្នាក់ ដែលចង់រត់គេចខ្លួន នៅពេលប៉ូលិសចាប់បានរកឃើញមានគ្រៀងញៀនសំយោគ មេតាមហ្វេតាមីនជាគ្រីស្តាល់១តោន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ