ជប៉ុន-អឺរ៉ុប ចុះកិច្ចព្រមព្រៀងលើសន្ធិសញ្ញាផ្តោះប្តូរពាណិជ្ជកម្មសេរី
ដូចការគ្រោងទុក នៅថ្ងៃព្រហស្បតិ៍ទី៦កក្កដា ២០១៧នេះ ជប៉ុននិងសហភាពអឺរ៉ុប បានព្រមព្រៀងគ្នា និងចុះហត្ថលេខា ជាគោលការណ៍លើសន្ធិសញ្ញាផ្តោះប្តូរពាណិជ្ជកម្មសេរី។ ជាកិច្ចព្រមព្រៀងនយោបាយមែន ប៉ុន្តែវាមានអត្ថន័យជានិម្មត្តរូបបំផុត សម្រាប់សហភាពអឺរ៉ុប និងជប៉ុន ដែលចង់បញ្ជូនសារប្រឆាំងនឹងនយោបាយជាតិនិយម គិតការពារតែប្រយោជន៍ប្រទេសឯង របស់លោកប្រធានាធិបតីអាមេរិក ដូណាល់ ត្រាំ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៧
នៅមានចំណុចខ្លះនៃសន្ធិសញ្ញាដែលត្រូវលើកទៅចរចាគ្នាជាបន្តទៀត មានជាអាទិ៍ការបង្កើតស្ថាប័នដោះស្រាយជម្លោះពាណិជ្ជកម្ម ប៉ុន្តែប្រធានបទសំខាន់ៗដែលជាឧបសគ្គខ្ទាស់ពីមុន ត្រូវបានលុបបំបាត់អស់ហើយ នៅក្នុងពេលចរចានាសប្តាហ៍នេះ។ ច្បាប់ពន្ធគយក្នុងផ្តោះប្តូរពាណិជ្ជកម្មទ្វេភាគីនឹងលុបបំបាត់បន្តិចម្តង ដោយប្រើពេលច្រើនឆ្នាំ នៅពេលសន្ធិសញ្ញាចូលជាធរមាន...
ប៉ុន្តែនៅពេលនេះ កិច្ចចរចានយោបាយនិងពាណិជ្ជកម្ម ជាគោលការណ៦បានសម្រេចហើយ” ! នេះជាសេចក្តីប្រកាសរបស់លោក ដូណាល់ ទូស្ក៍ Donald Tusk ប្រធានក្រុមប្រឹក្សាអឺរ៉ុប នៅក្នុងសន្និសីទកាសែត ដោយបានបញ្ជាក់ទៀតថា ពេលនេះ ជប៉ុននិងសហភាពអឺរ៉ុប ដែលតំណាងដោយលោកនាយករដ្ឋមន្ត្រីជប៉ុន ស្ហ៊ីនហ្សូ អាបេ Shinzo Abe និងប្រធានក្រុមប្រឹក្សាអឺរ៉ុប ហ្សង់ក្លូត ចាំងគ័រ Jean Claude Juncker បានចុះហត្ថលេខាលើកព្រមព្រៀងជាគោលការណ៍ រួចហើយ។
ជប៉ុននិងអឺរ៉ុប បានពុះពារ ធ្វើយ៉ាងណាឱ្យខាងតែចុះហត្ថលេខានៅថ្ងៃនេះ មួយថ្ងៃមុនបើកជំនួបកំពូលG20 ក៏ព្រោះតែចង់ផ្តល់សារដល់ពិភពលោកទាំងមូលថា គំនិតការពារតែប្រយោជន៍ជាតិឯងមិនមែនជាការពារទេ ! អឺរ៉ុបដើរតួកាន់តែខ្លាំងក្នុងពិភពលោក និងសម្រេចបាននូវអ្វីដែលអ្នកចង់ចាកចេញពីអឺរ៉ុបធ្លាប់បង្អាប់ថាស្ថាប័នមួយនេះអសមត្ថភាពនឹងស្ថាបនាកិច្ចព្រមព្រៀងពាណិជ្ជកម្ម។
ចំណែកលោកស្ហ៊ីនហ្សូ អាបេវិញ យល់ថា កិច្ចព្រមព្រៀងនេះ ជាការតស៊ូប្រឆាំងនឹងនយោបាយការពារជាតិឯងនិយមផង តែក៏នយោបាយឈ្នះឈ្នះ ដ៏ធំអាចប្រៀបផ្ទឹមបាននឹងសន្ធិសញ្ញាអន្តរប៉ាស៊ីហ្វិក ដែលលោកដូណាល់ត្រាំ ទើបសម្រេចខ្លួនចេញ។
អ្នកទទួលខុសត្រូវអឺរ៉ុប និងជប៉ុន បានធានាអះអាងទាំងពីរនាក់ថា កិច្ចព្រមព្រៀងផ្តោះប្តូរពាណិជ្ជកម្មសេរីជប៉ុន-អឺរ៉ុបនេះ នឹងជំរុញឱ្យមានការអភិវឌ្ឍការផ្តោះប្តូរពាណិជ្ជកម្មផង និងចំណេញដល់ទីផ្សារការងារផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ