កិច្ចព្រមព្រៀងពាណិជ្ជកម្មជប៉ុន-អឺរ៉ុប ជិតចាប់កំណើតហើយ !
ចុះផ្សាយនៅថ្ងៃ៖
ស្តាប់ - ០៤:១៨
បន្ទាប់ពីធ្វើការចរចាអស់រយៈពេលបួនឆ្នាំសហភាពអឺរ៉ុប និងជប៉ុន អាចនឹងប្រកាសនៅថ្ងៃព្រហស្បតិ៍ទី ៦ កក្កដា ២០១៧នេះ កំណើតនៃសន្ធិសញ្ញាផ្តោះប្តូរពាណិជ្ជកម្មសេរីរវាងគ្នាសហភាពអឺរ៉ុប និងជប៉ុន។ ជាកិច្ចព្រមព្រៀងនយោបាយដែលអឺរ៉ុបសំលៀងមាត់ចង់ប្រកាសឱ្យបានមុនថ្ងៃបើកជំនួបកំពូលក្រុមប្រទេសមហាឧស្សាហកម្មទាំង២០លើពិភពលោក ហៅកាត់ថា G២០ ដើម្បីបង្អួតពិភពលោកនិងពិសេសលោកដូណាល់ ត្រាំ ថានយោបាយការពារតែប្រយោជន៍ឯងមិនមែនជាដំណោះស្រាយសេដ្ឋកិច្ចតែមួយគត់ឡើយ។ តើជាកិច្ចព្រមព្រៀងអ្វី ? និងមានដំណើរការដល់ណាដែរ ?
សហភាពអឺរ៉ុប និងជប៉ុន អាចនឹងប្រកាសចុះហត្ថលេខាលើសន្ធិសញ្ញាផ្តោះប្តូរពាណិជ្ជកម្មសេរីរវាងគ្នា ក្រោមអធិបតីភាពលោកនាយករដ្ឋមន្ត្រីជប៉ុនស្ហ៊ីនហ្សូ អាបេ និងលោកដូណាល់ ទូស្ក៍ ប្រធានក្រុមប្រឹក្សាអឺរ៉ុប នាឱកាសជំនួបកំពូលអឺរ៉ុបជប៉ុននៅទីក្រុងព្រុចសែល នៅថ្ងៃព្រហស្បតិ៍នេះ បន្ទាប់ពីបានឆ្លងកាត់ការចរចាអស់រយៈពេលបួនឆ្នាំ។ ការចរចាលើចំណុចសេសសល់ត្រូវបង្ហើយ នៅថ្ងៃពុធម្សិលមិញនេះ ក្រោមវត្តមានរបស់រដ្ឋមន្ត្រីក្រសួងការបរទេសជប៉ុន និងឧត្តមស្នងការទទួលបន្ទុកពាណិជ្ជកម្មនៃគណៈកម្មការអឺរ៉ុប។
ការប្រកាសដំណឹង ថាអាចនឹងមានកិច្ចព្រមព្រៀងនយោបាយលើសន្ធិសញ្ញាជប៉ុន-អឺរ៉ុបដូច្នេះ គឺជាតម្រ៉ុយមួយបញ្ជាក់ថាក្រុមអ្នកចរចាពិតជាមានទំនុកចិត្តខ្លាំងហើយ។ ម្យ៉ាងវិញទៀត ទាំងអឺរ៉ុប ក៏ដូចជាជប៉ុន ទាំងពីរនាក់សុទ្ធតែចង់ធ្វើគំរូ ការពារសន្ធិសញ្ញាផ្តោះប្តូរពាណិជ្ជកម្ម។ ជប៉ុនបានចាត់គម្រោងនេះ ជាអាទិភាពមួយរបស់រដ្ឋាភិបាល ព្រោះបរិបទពិភពលោក បច្ចុប្បន្នកំពុងធ្លាក់ទៅរកនិន្នាការមូរមុខការពារតែប្រយោជន៍ប្រទេសឯង។ តាំងពីលោកត្រាំបានឡើងកាន់តំណែងជាប្រធានាធិបតីមក អាមេរិក បានសម្រេចដើរសន្ធិសញ្ញាផ្តោះប្តូរពាណិជ្ជកម្មអន្តរប៉ាស៊ីហ្វិកដែលជប៉ុនជាសមាជិកម្នាក់ដែរ។
សន្ធិសញ្ញា JEFTA (Japan Eu Free Trade Agreement) ឬសន្ធិសញ្ញាផ្តោះប្តូរពាណិជ្ជកម្មសេរី រវាងជប៉ុន-សហភាពអឺរ៉ុប តំណាងឱ្យមួយភាគបីនៃផលិតផលសរុបពិភពលោក និង៣៦,៨%នៃការផ្តោះប្តូរពាណិជ្ជកម្មពិភពលោក។
ជប៉ុននិងអឺរ៉ុបបានផ្តើមកិច្ចចរចាពាណិជ្ជកម្មតាំងពី ខែមីនាឆ្នាំ២០១៣មក ដោយស្ងាត់ៗខ្លាំង ហើយទើបមានការវិវឌ្ឍន៍លឿនខ្លាំងនារយៈពេលប៉ុន្មានខែចុងក្រោយតែប៉ុណ្ណោះ។ ការចរចានេះបានជួបឧបសគ្គជាច្រើន ជាពិសេសខាងភាគីអឺរ៉ុប ព្រោះថាក្រុមហ៊ុនបារាំងធ្លាប់បានស្រែកថ្ងូរអំពីភាពលំបាកក្នុងការជ្រៀតចូលក្នុងទីផ្សារជប៉ុន និងភាពស្មុគស្មាញនៃបទដ្ឋាន ព្រមទាំងដំណើរការកំណត់ដោយជប៉ុន។
តាំងពីដើមមក ការពិភាក្សានៅប្រទាំងប្រទើសគ្នាខ្លាំងលើ តម្លៃពន្ធដា និងបញ្ហាពន្ធគយ ដ៏ខ្ពស់ដែលត្រូវអនុវត្តលើការនាំចូលផលិតផលចំណីអាហារអឺរ៉ុបដ៏ល្បីល្បាញ ហ្វ្រូម៉ា និងសិទ្ធិពន្ធគយតម្រូវដោយអឺរ៉ុបលើការនាំចូលរថយន្តពីជប៉ុន។ ប៉ុន្តែបើតាមសារព័ត៌មានជប៉ុន ចំណុចខ្ទាស់ដ៏សំខាន់ៗនេះ ត្រូវលុបបំបាត់ហើយ។
កិច្ចចរចាចុងក្រោយ បានផ្តល់ការព្រមព្រៀងគ្នាថា ផលិតផលហ្វ្រូម៉ាអឺរ៉ុបត្រូវចាត់ចូលទៅក្នុងប្រភេទចំណីអាហារនាំចូលពិសេស ដែលអាចលុបពន្ធបាន នៅរយៈពេល១៥ឆ្នាំ ឯការនាំចូលរថយន្តជប៉ុនមកអឺរ៉ុប ក៏នឹងត្រូវលើកពន្ធគយចេញដែរ នៅ៧ឆ្នាំក្រោយ។ ផលិតផលចំណីអាហារអឺរ៉ុបផ្សេងទៀត ដូចជាសូកូឡា ជាដើម ក៏នឹងលែងមានពន្ធ ក្រោយពីការនាំចូលបាន១០ឆ្នាំ។ នេះបើកាសែតជប៉ុនដដែល ដែលមិនបានបញ្ចេញប្រភពផ្តល់ព័ត៌មានទេ។
ទាក់ទងនឹងផលិតផលនៅលើទីផ្សាររបស់ភាគីម្ខាងៗ សហភាពអឺរ៉ុប និងជប៉ុន បានរកឃើញភាពត្រូវរ៉ូវគ្នាហើយ ! ឯការពិភាក្សាស្តីពីបញ្ហាបច្ចេកទេស អំពីការការពារប្រយោជន៍វិនិយោគ និងវិធានច្បាប់ នឹងត្រូវទុកលើទៅចរចាបន្តនៅពេលបើកបវេសណកាលថ្មី។ ដូច្នេះមិនយូរមិនឆាប់ឮ កិច្ចព្រមព្រៀងបង្ហើយ ស្តីពីសន្ធិសញ្ញាផ្តោះប្តូរសេរីជប៉ុន-អឺរ៉ុប នឹងត្រូវចេញជារូបរាងពិត។
ប៉ុន្តែយ៉ាងណាក៏ដោយ ក៏គេសង្កេតឃើញមានភាពចម្លែកមួយគឺថា សន្ធិសញ្ញាជប៉ុន-អឺរ៉ុបនេះហាក់ដូចជាពុំសូវបានទទួលការចាប់អារម្មណ៍ពីសំណាក់មហាជន អង្គការក្រៅរដ្ឋាភិបាល អ្នកបរិស្ថាន សង្គមស៊ីវិល អ្នកនយោបាយ និងប្រព័ន្ធឃោសនាព័ត៌មានសោះ បើទោះបីជាទំហំនៃការផ្តោះប្តូរពាណិជ្ជកម្មរវាងភាគីទាំងពីរមានលក្ខណៈមហាសាល និងសំខាន់ខ្លាំងក៏ដោយ។ សម្រាប់សហភាពអឺរ៉ុប សន្ធិសញ្ញាពាណិជ្ជកម្មជប៉ុនអឺរ៉ុប ជាមហិច្ឆតាមួយមានតម្លៃដូចសន្ធិសញ្ញាអឺរ៉ុប-កាណាដាដែរ។ តែវាអាចផ្តល់ផលវិបាកធ្ងន់ធ្ងរណាស់ដល់សេដ្ឋកិច្ច ព្រោះថា អឺរ៉ុបជាដៃគូសេដ្ឋកិច្ចលំដាប់លេខបីនៅជប៉ុន ឯជប៉ុនដែលជាមហាអំណាចសេដ្ឋកិច្ចទីបីពិភពលោក មានប្រជាជន១២៧លាននាក់វិញ ជាដៃគូពាណិជ្ជកម្មលំដាប់ទី៦ប៉ុណ្ណោះ នៅអឺរ៉ុប។
សំឡេងប្រឆាំងទើបតែផ្តើមលាន់ឮឡើង នៅពេលការចរចាមានសន្ទុះកាន់តែខ្លាំងប៉ុណ្ណោះ។ ក្រុមអង្គការក្រៅរដ្ឋាភិបាល ការពារបរិស្ថានបានបង្ហាញជាសាធារណៈនូវឯកសារសម្ងាត់ចំនួនជាង២រយទំព័រ ទាក់ទងនឹងគម្រោងសន្ធិសញ្ញានេះ ដោយបរិហារថាជាគំរាមកំហែងសិទ្ធិប្រជាធិបតេយ្យ សុខភាព និងបរិស្ថាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ