កូរ៉េខាងជើងបាញ់គ្រាប់មីស៊ីលបាលីស្ទិកអន្តរទ្វីបចំថ្ងៃបុណ្យឯករាជ្យជាតិអាមេរិក និងមុនជំនួបកំពូល G២០
ចុះផ្សាយនៅថ្ងៃ៖
ស្តាប់ - ០៦:៥៩
នៅថ្ងៃអង្គារ ទី៤ កក្កដានេះ កូរ៉េខាងជើងបានប្រកាសឲ្យដឹងពីការបាញ់សាកល្បងគ្រាប់មីស៊ីលបាលីស្ទិកអន្តរទ្វីបប្រកបដោយជោគជ័យ។ ការបាញ់សាកល្បងជាថ្មីពេលនេះបានធ្វើឡើង ចំថ្ងៃដែលអាមេរិកប្រារព្ធបុណ្យឯករាជ្យជាតិ និងនៅប៉ុន្មានថ្ងៃមុនជំនួបកំពូល G២០ ក្នុងប្រទេសអាល្លឺម៉ង់។ ប្រតិកម្មអន្តរជាតិបានធ្លាក់មកជាបន្តបន្ទាប់ ពិសេសពីអាមេរិក កូរ៉េខាងត្បូង ជប៉ុន និងចិន។ ក៏ដូចជាសព្វមួយដង របបក្រុងព្យុងយ៉ាងហាក់មិនខ្វាយខ្វល់នឹងទ័ណ្ឌកម្ម ឬការព្រមានពីអន្តរជាតិទេ។ បើគិតតាំងពីដើមឆ្នាំ ២០១៧ នេះមក នេះជាការបាញ់សាកល្បងគ្រាប់មីស៊ីលគ្រប់ប្រភេទលើកទី១៣ ហើយពីសំណាក់កូរ៉េខាងជើង។
សម្រាប់ការបាញ់សាកល្បងគ្រាប់មីស៊ីលថ្ងៃនេះត្រូវបានរបបក្រុងព្យុងយ៉ាងប្រកាសក្តែងៗថា ជាការសាកល្បង និងជាការបោះមួយជំហានជាប្រវត្តិសាស្រ្ត។ ជាប្រវត្តិសាស្រ្ត ព្រោះជាប្រភេទគ្រាប់មីស៊ីលបាលីស្ទិកអន្តរទ្វីប « Hwasong-១៤ » ដែលអាចបាញ់បានចម្ងាយឆ្ងាយ និងអាចបំពាក់ក្បាលគ្រាប់នុយក្លេអ៊ែរទៅជាមួយ។ បើយោងតាមទូរទស្សន៍ជាតិកូរ៉េខាងជើង ការបាញ់សាកល្បងគ្រាប់មីស៊ីល « Hwasong-១៤ » ត្រូវបានត្រួតពិនិត្យផ្ទាល់ដោយប្រមុខដឹកនាំគីម ជុងអ៊ុន ហើយគ្រាប់មីស៊ីលនោះហោះសំញ៉ែងក្នុងអាកាសរយៈពេលប្រមាណជា ៤០នាទីនៅក្នុងកម្ពស់ ២ ៨០២គីឡូម៉ែត្រ និងហោះបានចម្ងាយ ៩៣៣គីឡូម៉ែត មុននឹងធ្លាក់ចូលក្នុងសមុទ្រជប៉ុន។
តាមទូរទស្សន៍ជាតិកូរ៉េខាងជើងដដែល ជោគជ័យនៃការបាញ់សាកល្បងគ្រាប់មីស៊ីលបាលីស្ទិកអន្តរទ្វីប « Hwasong-១៤ » ពេលនេះ ជាការបោះមួយជំហានទៅមុខយ៉ាងសំខាន់ឆ្ពោះទៅសម្រេចកម្មវត្ថុរបស់កូរ៉េខាងជើងដែលអាចវាយប្រហារទីកន្លែងណាក៏បាននៅក្នុងលោក ពិសេសកម្ទេចអាមេរិកដោយភ្លើងនុយក្លេអ៊ែរ។ ព័ត៌មានដែលផ្តល់ដោយទូរទស្សន៍ជាតិកូរ៉េខាងជើងស្តីពីលទ្ធផលនៃការសាកល្បងគ្រាប់មីស៊ីល « Hwasong-១៤ » ថ្ងៃនេះក៏ត្រូវបានបញ្ជាក់ដោយកងទ័ពអាមេរិក កូរ៉េខាងត្បូង និងជប៉ុនដែរ។
បើយោងតាមក្រុមអ្នកវិភាគ គ្រាប់មីស៊ីល « Hwasong-១៤ » អាចនឹងហោះបានចម្ងាយដល់ទៅ ៦ ៧០០គីឡូម៉ែត្រ ប្រសិនបើគេបាញ់វាក្នុងមុំធម្មតា ពោលមិនមែនក្នុងមុំកោងដូចដែលកូរ៉េខាងជើងបានបាញ់ពេលនេះទេ។ បាញ់បានចម្ងាយដល់ទៅ ៦ ៧០០គីឡូម៉ែត្រ គឺពិតជាមិនអាចកម្ទេចដែនដីអាមេរិកទាំងមូលបានមែន តែវាជាចម្ងាយគ្រប់គ្រាន់ដើម្បីអាចកម្ទេចរដ្ឋអាឡាស្កាទាំងស្រុង។
លោកដូណាល់ ត្រាំ៖តើគីម ជុងអ៊ុនគ្មានការងារអ្វីផ្សេងធ្វើទេឬ?
ការបាញ់សាកល្បងគ្រាប់មីស៊ីលបាលីស្ទិកអន្តរទ្វីបរបស់កូរ៉េខាងជើងថ្ងៃនេះបានធ្វើឡើង ចំថ្ងៃបុណ្យឯករាជ្យជាតិនៅអាមេរិក និងនៅប៉ុន្មានថ្ងៃមុនជំនួបកំពូល G២០ ក្នុងប្រទេសអាល្លឺម៉ង់។ លោកប្រធានាធិបតីអាមេរិកដូណាល់ ត្រាំបានបញ្ចេញប្រតិកម្មនៅក្នុងបណ្តាញសង្គម Tweeter របស់លោក។ ដោយមិននិយាយចំឈ្មោះមនុស្សខ្លាំងកូរ៉េខាងជើងគីម ជុនអ៊ុន លោកត្រាំបានសរសេរដោយចោទជាសំណួរថា « តើម្នាក់ហ្នឹងគ្មានការងារអ្វីធ្វើទេឬ? » និងបន្ថែមថា « គេពិបាកនឹងជឿថា កូរ៉េខាងត្បូង និងជប៉ុនអាចនឹងអនុគ្រោះឲ្យមានទង្វើបែបនេះយូរអង្វែង »។ ទន្ទឹមគ្នានេះ លោកដូណាល់ ត្រាំក៏បានឆ្លៀតអំពាវនាវចិនជាថ្មីម្តងទៀតឲ្យចាត់វិធានការដាក់គំនាបលើកូរ៉េខាងជើង។
ចំណែកសមភាគីកូរ៉េខាងត្បូង លោកមូន ជែអ៊ីនក៏បានកោះប្រជុំក្រុមប្រឹក្សាសន្តិសុខជាតិមួយជាបន្ទាន់នៅថ្ងៃនេះ។ រីឯជប៉ុនដែលហាក់ស្ថិតចំទិសដៅនៃការបាញ់សាកល្បងគ្រាប់មីស៊ីលកូរ៉េខាងជើងខ្លាំងជាងគេបានចេញមុខបរិហារក្រុងព្យុងយ៉ាងពីបទរំលោភលើសេចក្តីសម្រេចចិត្តរបស់ក្រុមប្រឹក្សាសន្តិសុខអង្គការសហប្រជាជាតិ។ ទន្ទឹមគ្នានេះ លោកប្រមុខរដ្ឋាភិបាលជប៉ុនស្ហ៊ីនហ្សូ អាបេបានថ្លែងនៅថ្ងៃនេះថា លោកគ្រោងនឹងស្នើរុស្ស៊ី និងចិនឲ្យដើរតួនាទីប្រកបដោយលក្ខណៈស្ថាបនាប្រឈមនឹងកូរ៉េខាងជើង។
គឺជាសំណើដែលលោកអាបេគ្រោងលើកនៅក្នុងជំនួបកំពូល G២០ ដែលត្រៀមបានធ្វើក្នុងប្រទេសអាល្លឺម៉ង់ពីថ្ងៃសុក្រ ដល់ថ្ងៃសៅរ៍ ទី៨ កក្កដា។ តែទោះជាយ៉ាងនេះក្តី គេពិតជាមិនអាចរង់ចាំដំណោះស្រាយណាមួយដែលឈានទៅបិទបញ្ចប់សំណុំរឿងនុយក្លេអ៊ែរកូរ៉េខាងជើងដ៏ចម្រូងចម្រាស ស្មុគស្មាញ និងអូសបន្លាយភ្លាមៗបានទេ។ ទ័ណ្ឌកម្មអន្តរជាតិមានច្រើនរាប់មិនអស់ តែហាក់មិនបានធ្វើឲ្យរបបក្រុងព្យុងយ៉ាងព្រឺរោមបន្តិចណាសោះ។ ផ្ទុយទៅវិញ គឺមានតែបង្ករឿងបន្ថែមទៀត។
ចិនបានព្រមានពីគ្រោះមហន្តរាយមិនអាចគ្រប់គ្រងបាន
សំណួរដែលគ្រប់គ្នាកំពុងចោទសួរពេលនេះគឺថា តើកូរ៉េខាងជើងមានសមត្ថភាព និងលទ្ធភាពបញ្ចេះភ្លើងនុយក្លេអ៊ែរដែរ ឬទេ និងថា ហេតុអ្វីបានជាបញ្ហាកូរ៉េខាងជើងមួយនេះស្មុគស្មាញពិបាកដោះស្រាយខ្លាំងម្ល៉េះ។ រហូតមកដល់ពេលនេះ ពោលតាំងពីការឡើងកាន់តំណែងប្រមុខដឹកនាំកូរ៉េខាងជើងរបស់លោកគីម ជុនអ៊ុននាដំណាច់ឆ្នាំ ២០១១ មក ក្រុមអ្នកវិភាគ និងក្រុមអ្នកជំនាញបានទទួលស្គាល់ពីការចម្រើនទៅមុខគួរឲ្យកត់សម្គាល់នូវកម្មវិធីនុយក្លេអ៊ែរ និងកម្មវិធីគ្រាប់មីស៊ីលរបស់កូរ៉េខាងជើងដែលជារដ្ឋឯកោជាងគេមួយនៅក្នុងលោក។
តែពួកគេហាក់នៅមានការសង្ស័យលើសមត្ថភាពរបស់ក្រុងព្យុងយ៉ាងក្នុងការបំពាក់គ្រាប់ក្បាលនុយក្លេអ៊ែរនៅលើគ្រាប់មីស៊ីលបាលីស្ទិកអន្តរទ្វីប។ តាមក្រុមអ្នកវិភាគ និងក្រុមអ្នកជំនាញ ការបាញ់សាកល្បងគ្រាប់មីស៊ីលបាលីស្ទិកអន្តរទ្វីបដោយគ្មាននាំគ្រាប់ក្បាលនុយក្លេអ៊ែរទៅជាមួយ ជារឿងងាយស្រួល តែកូរ៉េខាងជើងនៅមិនទាន់មានបច្ចេកវិទ្យាគ្រប់គ្រាន់ដើម្បីអាចបញ្ជូនគ្រាប់ក្បាលនុយក្លេអ៊ែរភ្ជាប់ជាមួយគ្រាប់មីស៊ីលបាលីស្ទិកអន្តរទ្វីបទៅក្នុងលំហអាកាសនៅឡើយទេ។ និយាយពីដំណោះស្រាយវិញ តាមពិតទៅ គ្មានបញ្ហាណាមួយដែលគ្មានដំណោះស្រាយទេ គ្រាន់តែថា មានកត្តាច្រើនណាស់ដែលបានធ្វើឲ្យសំណុំរឿងមួយនេះជាប់គាំងអូសបន្លាយមកដល់សព្វថ្ងៃ។
ម្នាក់ៗ ពិសេសអាមេរិក ចិន ជប៉ុន រុស្ស៊ី កូរ៉េខាងត្បូង និងរាប់ទាំងកូរ៉េខាងជើងផងពិតជាមានឆន្ទៈចង់បញ្ចប់បញ្ហា តែគេត្រូវដឹងថា គឺក្រុមប្រទេសមហាអំណាចទាំងនោះឯងដែលបាន និងកំពុងបន្តចិញ្ចឹមបញ្ហាមួយនេះដើម្បីទទួលបានប្រយោជន៍ និងការប្រជែងកម្លាំងគ្នា។ ពីសំបកក្រៅ ចិន និងរុស្ស៊ីដែលជាមិត្តស្លាប់រស់នឹងកូរ៉េខាងជើងបានសន្យាដាក់គំនាបលើក្រុងព្យុងយ៉ាង តែនៅខាងក្នុងវិញ ចិន និងរុស្ស៊ីបានបិទភ្នែកដោយទុកបណ្តាយឲ្យក្រុមអ្នកជំនួញ និងក្រុមហ៊ុនរបស់ខ្លួនរកស៊ីជាមួយកូរ៉េខាងជើង។
ក្នុងនាមជាប្រធានផ្លាស់វេនក្រុមប្រឹក្សាសន្តិសុខពេលនេះ ចិនបានព្រមានពីគ្រោះមហន្តរាយមិនអាចគ្រប់គ្រងបាន ប្រសិនបើភាគីនីមួយៗមិនព្រមសម្របសម្រួល និងមិនចេះអត់ធ្មត់។ អ្វីដែលចិនចង់មានន័យនោះគឺថា បើសង្រ្គាមផ្ទុះនៅឧបទ្វីបកូរ៉េមែន គឺគ្មាននរណាម្នាក់អាចទាយទុកពីលទ្ធផល ហើយក៏គ្មាននរណាម្នាក់ឈ្នះពីសង្រ្គាមនោះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ