នៅចិនមានគ្រាប់បែកផ្ទុះនៅពីមុខសាលារៀនមតេយ្យមួយនៅភាគខាងកើតប្រទេស
ហេតុការណ៍ផ្ទុះគ្រាប់បែកមួយ បានកើតឡើងកាលពីថ្ងៃព្រហស្បតិ៍១៥មិថុនាម្សិលមិញនៅចំពីមុខសាលាមតេយ្យមួយនៅភាគខាងកើតប្រទេសចិន ជាហេតុបណ្តាលឲ្យស្លាប់មនុស្សចំនួន៨នាក់និងរងរបួសជនចំនួន៦៥នាក់ផ្សេងទៀត។ យោងតាមអាជ្ញាធរក្នុងតំបន់ គ្រាប់បែកផ្ទុះនេះ ត្រូវបានឆ្នៃប្រឌិតឡើងដោយយុវជនមានជម្ងឺសរសៃប្រសាទម្នាក់ដែលត្រូវបានស្លាប់នៅក្នុងការផ្ទុះគ្រាប់បែកនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
សម្ភារៈផ្ទុះ ត្រូវបានគេរកឃើញនៅក្នុងលំនៅស្ថានរបស់យុវជនអាយុ២២ឆ្នាំដែលមានជម្ងឹសសៃប្រសាទនោះ-នេះជាការគូសបញ្ចាក់របស់អាជ្ញាធរនៅក្រុងតូចមួយនៅ Fengxian ភាគខាងកើតប្រទេសចិន ដែលជាកន្លែងកើតសោកនាដកម្ម។
ប្រព័ន្ធផ្សព្វផ្សាយព័ត៌មានចិនវិញ បានជូនដំណឹងប្រាប់ថា ការផ្ទុះនេះ បង្កឡើងដោយបំពង់ឧស្ម័នមួយដែលប្រើប្រាស់ដោយអ្នកលក់ម្ហូបអាហារមួយកន្លែងនៅតាមដងផ្លូវ ។
សាព័ត៌មានចិន ជាច្រើន ក៏ បានផ្សព្វផ្សាយដែរ នូវរូបភាពនានា បង្ហាញពីជនរងគ្រោះជាច្រើននៅដេករណូករណែលលើដី ក្រោយការផ្ទុះ ហើយក្នុងចំណោមនោះ ជនរងគ្រោះខ្លះៗ សន្លប់ឥតដឹងខ្លួន ឬ ក៏មានសម្លៀកបំពាក់រហែករយ៉ៃ។ រូបភាពមួយទៀត បង្ហាញពីស្ត្រីម្នាក់ ដែលអង្គុយឧបរឹតកូនស្រីតូចរបស់គាត់នៅក្នុងដៃទាំងពីរ យំស្រែកទាំងម៉ែទាំងកូនដោយការភ័យស្លន់ស្លោរ។
នៅថ្ងៃសុក្រនេះ ក្រុមប៉ូលីសចិន ដោយមានពាក់ស្រោមប្លាស្ទីកពណ៌ខៀវដើម្បីការពារពីលើស្បែកជើងរបស់ខ្លួន បានបើកអង្កេតស្រាវជ្រាវនៅលើកន្លែងផ្ទុះដែលស្ថិតនៅពីមុខសាលារៀនមតិយ្យ។ សាក្សីម្នាក់ដែលរស់នៅក្នុងតំបន់ បានរៀបរាប់ប្រាប់ដល់ទីភ្នាក់ងារសាព័ត៌មានបារាំង AFPថា នៅសាលាមតិយ្យនេះ កូនក្មេងៗដែលចុះឈ្មោះចូលរៀន មានចំនួនរាប់រយនាក់។
រីឯជនរងគ្រោះស្លាប់វិញ ភាគច្រើន គឺជាបណ្តាជនដែលមករង់ចាំទទួលយកកូនៗរបស់ពួកគេនៅពេលចេញពីលាលារៀន។
អាជ្ញាធរនៅក្នុងតំបន់វិញ បានអះអាងបញ្ជាក់ថា ជាសំណាងល្អកូនសិស្សនិងគ្រូបង្រៀននៅក្នុងពេលផ្ទុះគ្រាប់នោះ ស្ថិតនៅក្នុងថ្នាក់រៀនទាំងអស់ ដូច្នេះ ហើយបានជាពុំមានអ្នកណាម្នាក់ រងគ្រោះថ្នាក់ទេ។
ក្រោយពីឧប្បត្តិហេតុនេះមក រដ្ឋមន្ត្រីក្រសួងសន្តិសុខសាធារណៈចិន បានចេញបញ្ជាឲ្យបើកការអង្កេតជាបន្ទាន់មួយ ដើម្បីរកមូលហេតុនៃសោកនាដកម្ម និងតម្រូវឲ្យមានការពង្រឹងការត្រួតពិនិត្យយ៉ាងម័តធ្យ័តជាទីបំផុតនៅគ្រប់ទីកន្លែងណាដែលប្រកបដោយហារនិភ័យខ្ពស់និងជាពិសេសនៅទីន្លែងដែលមានប្រជាជនយ៉ាងកុះករ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ