អ៊ីតាលី៖ជំនួបកំពូល G៧ គ្របដណ្តប់ដោយជំហរស្រពិចស្រពិលរបស់លោកដូណាល់ ត្រាំ
ចុះផ្សាយនៅថ្ងៃ៖
ស្តាប់ - ០៦:១១
នៅថ្ងៃសុក្រ ទី២៦ ឧសភានេះ ក្រុមប្រទេសមហាអំណាចឧស្សាហកម្មទាំង ៧ ក្នុងលោកហៅកាត់ថា G៧ បានផ្តើមជំនួបកំពូលរយៈពេល ២ថ្ងៃក្នុងប្រទេសអ៊ីតាលី។ ប្រទេសមហាអំណាចឧស្សាហកម្មទាំង ៧ មានជប៉ុន អាមេរិក បារាំង អាល្លឺម៉ង់ អង់គ្លេស អ៊ីតាលី និងប្រទេសកាណាដា។ គួររម្លឹកជូនថាតាមធម្មតា មានប្រទេសរុស្ស៊ីមួយទៀត តែរស្ស៊ីត្រូវបានគេព្យួរជើងកាលពីឆ្នាំ ២០១៤ ដោយសារតែរុស្ស៊ីបានក្រសោកយកដែនដីគ្រីមេរបស់ប្រទេសអ៊ុយក្រែន។ តែលក្ខណៈពិសេសនៃជំនួបកំពូល G៧ឆ្នាំ ២០១៧ នេះ គឺការចូលរួមជាលើកទី១ របស់លោកប្រធានាធិបតីបារាំងអេម៉ានុយអែល ម៉ាក្រុង សមភាគីអាមេរិកលោកដូណាល់ ត្រាំ និងលោកស្រីនាយករដ្ឋមន្រ្តីអង់គ្លេស Theresa May។
មានប្រធានបទសំខាន់ៗចំនួន ៣ ដែល G៧ លើកយកទៅជជែក ទី១ យុទ្ធនាការប្រយុទ្ធប្រឆាំងភេរវនិយម ទី២ ពាណិជ្ជកម្មអន្តរជាតិ និងទី៣ បញ្ហាអាកាសធាតុដែលត្រូវបន្តអនុវត្តន៍ឲ្យបានខ្ជាប់ខ្ជួននូវកិច្ចព្រមព្រៀងក្រុងប៉ារីស COP២១ កាលពីឆ្នាំ ២០១៥។ បន្ទាប់មកនៅមានប្រធានបទសំខាន់បន្ទាប់បន្សំជាច្រើនផ្សេងទៀត ដូចយ៉ាងបញ្ហាជនអន្តោប្រវេសន៍ក្នុងទ្វីបអឺរ៉ុប បញ្ហានុយក្លេអ៊ែរកូរ៉េខាងជើង ឬមួយក៏ជម្លោះនៅក្នុងសមុទ្រចិនខាងត្បូងជាដើម។
លក្ខណៈពិសេសនៃជំនួបកំពូល G៧ ឆ្នាំនេះ គឺការចូលរួមជាលើកទី១ របស់លោកប្រធានាធិបតីបារាំងអេម៉ានុយអែល ម៉ាក្រុង សមភាគីអាមេរិកលោកដូណាល់ ត្រាំ និងលោកស្រីនាយករដ្ឋមន្រ្តីអង់គ្លេស Theresa May។ អ៊ីចឹងហើយបានជាសមាជិកផ្សេងទៀតកំពុងចង់ដឹងពីជំហររបស់មេដឹកនាំទើបជាប់ឆ្នោតថ្មីទាក់ទងនឹងសំណុំរឿងអាទិភាពមួយចំនួន។ តាមកម្មវិធីគ្រោងទុកនៅថ្ងៃសុក្រ ទី២៦ ឧសភានេះ G៧ បើកកិច្ចប្រជុំរវាងសមាជិកគ្នាឯងទាំង ៧ប្រទេស ដោយជជែកលើសំណុំរឿងអន្តរជាតិក្តៅៗសព្វថ្ងៃ បន្ទាប់នៅថ្ងៃសៅរ៍ ទី២៧ ឧសភា G៧ នឹងរួមប្រជុំជាមួយ៥ប្រទេសក្នុងតំបន់មានអេត្យូពី កេនញ៉ា នីហ្សេ នីហ្សេរីយ៉ា និងប្រទេសទុយនីស៊ី។
បញ្ហាអាកាសធាតុ និងពាណិជ្ជកម្មអន្តរជាតិជាប្រធានបទស្មុគស្មាញ
កំណត់សម្គាល់នៅក្នុងជំនួបកំពូល G៧ ឆ្នាំនេះ គឺការដែលសមាជិកផ្សេងទៀតកំពុងរង់ចាំជំហររបស់លោកដូណាល់ ត្រាំនៅក្នុងសំណុំរឿងអាកាសធាតុ និងពាណិជ្ជកម្មអន្តរជាតិ។ មូលហេតុមកពីអាមេរិកក្នុងជំនាន់លោកដូណាល់ ត្រាំមិនបានយល់ឃើញដូចសមាជិកផ្សេងទៀត និងក៏មិនបានឯកភាពដូចអាមេរិកក្នុងជំនាន់លោកបារ៉ាក់ អូបាម៉ា ពិសេសលើបញ្ហាអាកាសធាតុទាក់ទងនឹងកិច្ចព្រមព្រៀងក្រុងប៉ារីស COP២១ អនុម័តក្នុងឆ្នាំ ២០១៥។ លោកដូណាល់ ត្រាំបាននិយាយតាំងពីក្នុងសម័យឃោសនាបោះឆ្នោត រហូតមកដល់សព្វថ្ងៃក្នុងនាមជាប្រធានាធិបតីថា អាមេរិកនឹងដកខ្លួនចេញពី COP២១ ដែលលោកអូបាម៉ាបានចុះហត្ថលេខា។
រដ្ឋបាលអាមេរិកាំងបន្តផ្លុំខ្សល់ត្រជាក់ផង និងក្តៅផងលើកិច្ចព្រមព្រៀងស្តីពីបញ្ហាអាកាសធាតុជាប្រវត្តិសាស្រ្តរបស់ពិភពលោកមួយនេះ។ ចំណែករូបលោកត្រាំក៏មិនបានលាក់បាំងពីបំណងរបស់លោកក្នុងការដកខ្លួនចេញកិច្ចព្រមព្រៀងជាស្ថាពរដែរ។ ទីប្រឹក្សាសេដ្ឋកិច្ចរបស់លោកដូណាល់ ត្រាំបាននិយាយត្រង់ៗដោយមិនលាក់លៀមថា COP២១ ជាឆ្អឹងទទឹងកសម្រាប់កំណើនសេដ្ឋកិច្ចអាមេរិក និងជាប្រភពនៃកំណើនចំនួនអ្នកអត់ការងារធ្វើនៅអាមេរិក។ រូបទីប្រឹក្សាសេដ្ឋកិច្ចរបស់ត្រាំដដែលបានបញ្ជាក់ថា អាមេរិកមិនមែនមិនបានគិតគូរពីបញ្ហាអាកាសធាតុទេ តែកំពុងមើលថា តើត្រូវជ្រើសរើសផ្លូវមួយណាសម្រាប់បរិស្ថានដោយមិនឲ្យប៉ះពាល់ដល់ប្រយោជន៍សេដ្ឋកិច្ចអាមេរិកាំង។
ទាក់ទងនឹងពាណិជ្ជកម្មអន្តរជាតិជាមួយនឹងអង្គការពាណិជ្ជកម្មពិភពលោកវិញត្រូវបានលោកដូណាល់ ត្រាំមើលឃើញថា អាមេរិកជាខាតបង់ខ្លាំង ព្រោះជាការដោះដូរពាណិជ្ជកម្មមិនស្មើភាព។ លោកត្រាំបានមើលឃើញថា មានតែចាត់វិធានការការពារ និងជួយខ្លួនឯងទេទើបអាមេរិកទទួលបានកំណើនសេដ្ឋកិច្ចខ្ពស់ និងអាចកាត់បន្ថយអ្នកអត់ការងារធ្វើបាន។ តែក្រុមប្រទេសដៃគូបានប្រឆាំងលើចំណាត់ការរបស់លោកដូណាល់ ត្រាំដែលគេហៅថា ជាវិធានការអាត្មានិយមដែលគិតតែប្រយោជន៍ផ្ទាល់ខ្លួន។
ក្តីសង្ឃឹមតិចតួចនៅក្នុងសេចក្តីថ្លែងការណ៍រួម
លទ្ធផលដែលគ្រប់គ្នាទន្ទឹងរង់ចាំនៅក្នុងជំនួបកំពូល G៧ រយៈពីរថ្ងៃក្នុងប្រទេសអ៊ីតាលីអាចនឹងមានស្តួចស្តើង ព្រោះថា មានបញ្ហាសំខាន់ៗមួយចំនួនដែលលោកត្រាំចង់ពិនិត្យសើរើមើលឡើងវិញជាមួយប្រទេសដៃគូ ពិសេសនៅក្នុងរង្វង់សមាជិក G៧។ ជាក់ស្តែងនៅក្នុងសំណុំរឿងអាកាសធាតុ ពិសេសលើកិច្ចព្រមព្រៀងក្រុងប៉ារីស កិច្ចប្រជុំ G៧ រយៈពេល ២ថ្ងៃប្រហែលជាមិនទាន់អាចដឹងពីជំហរយ៉ាងណារបស់លោកដូណាល់ ត្រាំនៅឡើយទេថា តើលោកនឹងដក ឬមិនដកខ្លួនចេញពីកិច្ចព្រមព្រៀងនោះ ព្រោះថា លោកត្រាំនឹងសម្រេចចិត្តនៅពេលដែលលោកត្រឡប់ទៅអាមេរិកវិញ។
ដូច្នេះឃើញថា ប្រធានបទរសើបមួយនេះនឹងនៅបន្តវិលវល់នាឱកាសជំនួបកំពូល G៧។ តែទោះជាយ៉ាងនេះក្តី សមាជិក ៦ប្រទេសទៀតគ្មានជម្រើសអ្វីក្រៅពីរង់ចាំការសម្រេចរបស់លោកដូណាល់ ត្រាំ និងបន្តឲ្យសារៈសំខាន់លើកិច្ចព្រមព្រៀងនោះ។ ពិតណាស់ ជំហររបស់លោកដូណាល់ ត្រាំបានធ្វើឲ្យសមាជិកផ្សេងមិនសប្បាយចិត្ត តែស្របគ្នានេះ សមាជិកទាំង ៦ប្រទេសនឹងព្យាយាមបង្ហាញជំហររួមគ្នាដោយធ្វើយ៉ាងចៀសវាងការប្រេះឆាផ្ទៃក្នុងដែលបង្ហាញពីការរួមកម្លាំងរវាង សមាជិក ៦ប្រទេសប្រឆាំងនឹងសមាជិក ទី៧៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ