Moody’s ទម្លាក់ចំណាត់ថ្នាក់ចិន ជាលើកទីមួយ
មិនធ្លាប់ដែលមានទេ គិតចាប់តាំងពី ២៨ឆ្នាំមក ដែលចិនបានជួបហេតុការណ៍បែបនេះ ! ទីភ្នាក់ងារវាយតម្លៃហានិភ័យ Moody’s បានសម្រេច នៅថ្ងៃពុធនេះ បញ្ចុះចំណាត់ថ្នាក់ចិន មួយកំរិត ដោយពន្យល់ថា មហាអំណាចសេដ្ឋកិច្ចទីពីរលើពិភពលោក កំពុងប្រឈមនឹងហានិភ័យ មានប្រាក់បំណុលជាតិប៉ោងឡើងខ្ពស់ខ្លាំង ឥតឈប់ នៅប៉ុន្មានឆ្នាំខាងមុខ។
ចុះផ្សាយនៅថ្ងៃ៖
បញ្ចុះចំណាត់ថ្នាក់ចិនពី Aa3 ទៅ A1 ហើយទស្សនៈវិស័យក៏នឹងមិនបានប្រសើរឡើងទៀត ! បើតាមទីភ្នាក់ងារវាយតម្លៃហានិភ័យ ភាពរឹងមាំនៃប្រព័ន្ធហិរញ្ញវត្ថុចិន អាចនឹងត្រូវរង្គោះរង្គើនៅរវាងប៉ុន្មានឆ្នាំខាងមុខ បរិមាណសរុបនៃប្រាក់បំណុលជាតិនឹងបន្តប៉ោងឡើងឥតឈប់ ឯសក្តានុពលនៃកំណើនសេដ្ឋកិច្ចបែរជាបន្ថយល្បឿន។
នៅឆ្នាំមុន ចិនមានបំណុលសរុបប្រមាណ២៥៦%នៃផលិតផលដុលក្នុងស្រុក។ ចិនមានបំណុលនៅបរទេសប្រមាណតែ១២%។ ប៉ុន្តែបំណុលសាធារណៈវិញ អាចឡើងដល់៤៥%នៃផលិតផលសរុបក្នុងស្រុក នៅចុងទសវត្ស។ នេះបើតាមការព្យាករណ៍របស់Moody's ដែលផ្តោតការព្រួយបារម្ភជាពិសេសទៅលើបំណុលក្រុមហ៊ុនរដ្ឋ។ ថ្វីបើចិនបានបង្ហាញឆន្ទៈធ្វើកំណែទម្រង់វិស័យសាធារណៈមែន ប៉ុន្តែការប្រឹងប្រែងនោះ មិនគ្រប់គ្រាន់សម្រាប់ទប់ចម្រោះប្រព័ន្ធហិរញ្ញវត្ថុមិនឱ្យរង្គើបានឡើយ។
ម្យ៉ាងវិញទៀត កំណើនសេដ្ឋកិច្ចចិននៅឆ្នាំ២០១៦មានត្រឹមតែ ៦,៧% គឺទាបបំផុតមិនធ្លាប់ទេ។ ដោយហេតុតែប្រជាពលរដ្ឋ ចាស់ សកម្មភាពវិនិយោគនិងផលិតកម្មក៏ថយ បើតាមMoody’s ចិននឹងមានកំណើនសេដ្ឋកិច្ចត្រឹមតែប្រមាណ៥% នៅរវាង៥ឆ្នាំខាងមុខ ពោលគឺទាបជាងផែនការ របស់រដ្ឋាភិបាល ដែលកំណត់ឱ្យមានកំណើនជាមធ្យម៦,៥% សម្រាប់រយៈពេល ២០១៦-២០២០។
SP Global Ratings ភ្នាក់ងារវាយតម្លៃហានិភ័យមួយទៀត ដែលគ្រោងបញ្ចុះចំណាត់ចិនដែរកាលពីខែមីនា២០១៦ តែទុកពេល២៤ខែ ក៏សង្កេតឃើញកំណែទម្រង់គំរូសេដ្ឋកិច្ចចិនមានភាពយឺតយ៉ាវជាងការគ្រោងទុកដែរ។ ទីភ្នាក់ងារ Fitch វិញ សម្គាល់ថាទស្សនៈវិស័យសេដ្ឋកិច្ចចិនមានការវិវឌ្ឍន៍កំរិត ស្មើ។
តាំងពីឆ្នាំ១៩៨៩មក Moody’s មិនដែលបញ្ចុះចំណាត់ថ្នាក់ចិនឡើយ ! ដំណឹងថ្ងៃនេះ បាន ប៉ះពាល់បន្តិចដល់ទីផ្សារភាគហ៊ុននិងលុយយ័ន នៅពេលព្រឹក និងត្រូវបានភាគីចិនច្រានចោលទាំងស្រុង។ សម្រាប់ក្រសួងហិរញ្ញវត្ថុចិន ទីភ្នាក់ងារបានប្រើវិធីសាស្ត្រវាយតម្លៃមិនសមស្រប ហើយមិនស្រាលភាពលំបាកដែលប្រទេសកំពុងឆ្លងកាត់ និងមើលស្រាលការខិតខំប្រឹងប្រែងធ្វើកំណែទម្រង់របស់ប៉េកាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ