ជនជាតិចិន២រូបត្រូវបានគេចាប់ជម្រិតនៅភាគនិរតីនៃប្រទេសប៉ាគីស្ថាន
ជនជាតិចិនពីររូបដែលធ្វើការនៅក្នុងប្រទេសប៉ាគីស្ថាន ត្រូវបានគេចាប់ជម្រិតនៅថ្ងៃពុធម្សិលមិញ -នេះបើតាមការគូសបញ្ជាក់របស់ប៉ូលិសនិងប្រព័ន្ធផ្សព្វផ្សាយផ្លូវការណ៍មួយរបស់ចិន។ ហេតុការណ៍នេះ អាចនឹងធ្វើឲ្យចិនមានការភ័យរអារខ្លាំងពីបញ្ហាសន្តិសុខនៅប៉ាគីស្ថាន នៅខណៈដែលចិនគ្រោងនឹងធ្វើវិនិយោគជាង ៥០ពាន់លានដុល្លារនៅក្នុងប្រទេសប៉ាគីស្ថាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
ជនជាតិចិនទំាង ២នាក់នោះ ត្រូវបានគេចាប់ជម្រិតនៅភាគនិរតីនៃប្រទេសប៉ាគីស្ថាន គឺនៅ Quetta ទីក្រុងនៃខេត្ត Baloutchistan ។ Baloutchistan ដែលជាច្រកយុទ្ធសាស្រ្តសម្រាប់របៀងសេដ្ឋកិច្ចរវាងចិននិងប៉ាគីស្ថាន (CPEC) គឺជាតំបន់អស្ថិរភាព ដោយសារតែការធ្វីទុក្ខបុកម្នេញពីពួកអ៊ីស្លាមជ្រុលនិងពួកផ្តាច់ទឹកដីនិយម។
នគបាលប៉ាគីស្ថាននៅក្នុងតំបន់ បានគូសបញ្ជាក់បា្រប់ដល់ទីភ្នាក់ងារព័ត៌មានបារាំង AFP ថា “ចំណាប់ខ្មាំងទាំងពីររូបនោះ ជាអ្នកគ្រប់គ្រងនៅមជ្ឈមណ្ឌលភាសាដ៏សំខាន់មួយ ហើយក្នុងពេលដែលពួកគេ បានចាកចេញពីសាលាបង្រៀនភាសាដើម្បីទៅទទួលទានអាហារថ្ងៃត្រង់ ស្រាប់តែជនដៃដល់ ៣នាក់ដែលគេពុំស្គាល់ បាននាំគ្នាចាប់បង្ខំពួកគេឲ្យចូលទៅក្នុងរថយន្តមួយគ្រឿងដែលគ្មានផ្លាកសញ្ញាសំគាល់។
ក្នុងពេលនោះដែរ ស្ត្រីជនជាតិចិនម្នាក់ទៀតដែលបានគេចរួចពីការចាប់ជម្រិត បានរត់ទៅជ្រកកោននៅក្នុងមជ្ឈមណ្ឌលមួយ រីឯអ្នកដំណើរតាមផ្លូវម្នាក់ទៀតក៏ត្រូររងរបួសដោយគ្រាប់កាំភ្លើងដែរ។
នៅក្នុងការចាប់ជម្រិតជនជាតិចិនទាំងពីរនាក់នេះ ទីភ្នាក់ងារព័ត៌មានចិន Xinhua ក៏បានបញ្ជាក់អះអាងដែរពីការចាប់ជម្រិតនេះ។ មន្ត្រីស្ថានទូតចិននៅប៉ាគីស្ថានវិញ បានជូនព័ត៌មាននេះ ដល់ទីភ្នាក់ងារព័ត៌មានបារាំង AFP ដែរ ថា" ស្ថានទូតចិន កំពុងធ្វើការដើម្បីឲ្យបានការដោះលែងជនជាតិចិនទាំងពីររូបនោះ"។
គួររំលឹកថា ការវិនិយោគរបស់ចិននៅប៉ាគីស្ថាន កំពុងតែកើនសន្ទុះយ៉ាងខ្លាំងនៅក្នុងក្របខណ្ឌច្រករបៀងសេដ្ឋកិច្ចរវាងចិននិងប៉ាគីស្ថាន (CPEC) ជាអាទិ៍ការវិនិយោគនៅលើការតភ្ជាប់ផ្លូវនិងទូរគមនាគមន៍រវាងប្រទេសទាំងពីរដែលចិនបានជូនដំណឹងតាំងពីឆ្នាំ ២០១៥ ម៉្លេះ ពោលគឺសំដៅតភ្ជាប់ភាគខាងលិចប្រទេសចិនទៅកាន់សមុទ្រអារ៉ាប់ប៊ីសាអ៊ូឌីត ដោយកាត់តាមប៉ាគីស្ថានភាគខាងជើងទៅកាន់ភាគត្បូង។ នេះរួមបញ្ចូលទាំងការសាងសង់ផ្លូវ កន្លែងថាមពល កំពុងផែសំខាន់មួយនៅ GWAdar និងហេដ្ឋារចនាសម្ព័ន្ធផ្សេងៗទៀតដែលទីក្រុងអ៊ីស្លាម៉ាបាត រំពឹងទុកថានឹងជួយផ្តល់សន្ទុះដល់សេដ្ឋកិច្វប៉ាគីស្ថាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ