តើប្រធានាធិបតីថ្មីរបស់កូរ៉េខាងត្បូងនឹងអាចធ្វើឲ្យសេអ៊ូល និងព្យុងយ៉ាងចុះសម្រុងគ្នា ដែរឬទេ?
ចុះផ្សាយនៅថ្ងៃ៖
ប្រធានាធិបតីជាប់ឆ្នោត លោក មូន ជេអ៊ីន នៅថ្ងៃពុធម្សិលមិញ បានស្បថចូលកាន់តំណែងជាប្រធានាធិបតីថ្មី របស់កូរ៉េខាងត្បូង។ លោកមូន ជេអ៊ីន អតីតមេធាវីការពារសិទ្ធិមនុស្ស និងដែលមានឪពុកម្តាយ រត់ចេញពីកូរ៉េខាងជើង បានប្រកាសថា លោកត្រៀមខ្លួន ធ្វើដំណើរទៅទីក្រុងព្យុងយ៉ាង ដើម្បីបន្ថយភាពតានតឹងជាមួយប្រទេសជិតខាង។ តើប្រធានាធិបតីថ្មីរបស់កូរ៉េខាងត្បូង នឹងអាចទៅចរចា បង្កើតសន្តិភាពជាមួយ កូរ៉េខាងជើង បានដែរឬទេ? កូរ៉េខាងជើងដែលតែងតែគំរាមបាញ់ឲ្យខ្ទេច សេអ៊ូល រដ្ឋធានីរបស់កូរ៉េខាងត្បូង។
នៅក្នុងពេលស្បថចូលកាន់តំណែង នៅថ្ងៃពុធ ប្រធានាធិបតីថ្មីរបស់កូរ៉េខាងត្បូង លោកមូន ជេអ៊ីន មកពីខាងក្រុមសេរីនិយម បាននិយាយ ថា លោកត្រៀមខ្លួននឹងទៅកូរ៉េខាងជើង បើសិនលក្ខខណ្ឌអំណោយផល។ តាំងពីនៅក្នុងយុទ្ធនាការបោះឆ្នោតមកម្ល៉េះ ប្រធានាធិបតីថ្មីរបស់កូរ៉េខាងត្បូង បានអះអាងថា លោកចង់បង្កើតបរិយាកាសធូស្រាល ចរចាជាមួយកូរ៉េខាងជើង ក្នុងសំណុំរឿងនុយក្លេអ៊ែររបស់ប្រទេសនេះ។
លោកមូន ជេអ៊ីន ចង់បើកផ្លូវចរចា បង្កើតសន្តិភាពជាមួយកូរ៉េខាងជើង ជាជាងដាក់ខ្លួនប្រឈម តទល់នឹងប្រទេសដែលគំរាមឥតល្ហែរថា នឹងបាញ់មីស៊ីលកម្ទេចទីក្រុងសេអ៊ូល។ និន្នាការរបស់លោកមូន ជេអ៊ីន គឺផ្ទុយស្រឡះពីរដ្ឋាភិបាលមុនរបស់លោកស្រីប៉ាក់ គុនហេ ដែលមកពីក្រុមអភិរក្សនិយម និងមានអរិភាព ជាមួយកូរ៉េខាងជើង។ នៅក្នុងបរិបទដែលភាពតានតឹងកើនឡើងខ្លាំង នៅឧបទ្វីបកូរ៉េ ការបោះឆ្នោតរបស់ប្រជាជនកូរ៉េខាងត្បូង ជ្រើសរើសយកលោកមូន ជេអ៊ីន ឲ្យដឹកនាំប្រទេសអាចជាសញ្ញាថា ប្រជាជនកូរ៉េខាងត្បូង ចង់បានការចរចាដើម្បីសន្តិភាព ជាជាងបង្កាត់ភ្លើងសង្រ្គាម ជាមួយប្រទេសជិតខាង។
សង្រ្គាមពាក្យសំដី ការគំរាមកំហែងប្រើកម្លាំងយោធា និងការបាញ់សាកល្បងគ្រាប់បែកនុយក្លេអ៊ែរ និងមីស៊ីលរបស់កូរ៉េខាងជើង រហូតធ្វើឲ្យកូរ៉េខាងជើង ទទួលរងការដាក់ទណ្ឌកម្ម សេដ្ឋកិច្ចពីអង្គការសហប្រជាជាតិ នៅប៉ុន្មានឆ្នាំចុងក្រោយនេះ បានធ្វើឲ្យភ្លេច មិនដឹងថា តាមពិត កូរ៉េខាងជើង និងកូរ៉េខាងត្បូងធ្លាប់បានត្រូវរ៉ូវគ្នា បង្កើតកិច្ចប្រជុំកំពូលកូរ៉េ កាលពី១០ឆ្នាំមុន គឺឆ្នាំ ២០០៧។
លោកមូន ជេអ៊ីន ផ្ទាល់ ធ្លាប់ចូលរួម និងជាមនុស្សស្និទ្ធនឹងអតីតប្រធានាធិបតីកូរ៉េខាងត្បូង លោក រ៉ូ ម៉ូហ៊ុន ដែលធ្វើដំណើរទៅទីក្រុងព្យុងយ៉ាង ដើម្បី ចូលរួមក្នុងកិច្ចប្រជុំកំពូលកូរ៉េ លើកទី ២ នៅឆ្នាំ ២០០៧ គឺ៧ឆ្នាំក្រោយ កិច្ចប្រជុំកំពូលលើកទី ១ នៅឆ្នាំ ២០១០ ដែលរៀបចំឡើងជាពិសេស នៅទីក្រុងប៉េកាំង។ នៅក្នុងកិច្ចប្រជុំកំពូលទាំងពីរលើក លោកគីម ជុងអ៊ីល អគ្គមគ្គទេសក៍កូរ៉េខាងជើង និងជាឪពុករបស់លោកគីម ជុងអ៊ុន បានសម្រេចចុះកិច្ចព្រមព្រៀងមួយចំនួនជាមួយប្រធានាធិបតីកូរ៉េខាងត្បូង ដែលភាគច្រើន មាននិយាយតែពីសេដ្ឋកិច្ច និងជំនួយរបស់កូរ៉េខាងត្បូងសម្រាប់ទីក្រុងព្យុងយ៉ាង។
តាំងពីចប់សង្រ្គាមកូរ៉េ នៅឆ្នាំ ១៩៥៣ ប្រទេសបងប្អូនសត្រូវនឹងគ្នា កូរ៉េខាងត្បូង និងកូរ៉េខាងជើង នៅមិនទាន់បានចុះហត្ថលេខាលើសន្ធិសញ្ញាសន្តិភាពនៅឡើយទេ។ ការផ្ទុះអាវុធ និងសង្រ្គាមរវាងប្រទេសទាំងពីរ នៅតែអាចកើតមានគ្រប់ពេលវេលា។ ទៅតាមការសង្កេតកន្លងមក កិច្ចប្រជុំកំពូលកូរ៉េទាំងពីរ តែងតែធ្វើឡើង នៅក្នុងស្ថានភាពដែលប្រទេសទាំងពីរ ប្រឈមមុខ តានតឹងនឹងគ្នាខ្លាំង ជាពិសេសនៅក្រោយកូរ៉េខាងជើង ពង្រាយទ័ព ដាក់ ដាក់បែរកាណុងកាំភ្លើងសំដៅរដ្ឋធានីសេអ៊ូល។ នៅក្នុងកិច្ចព្រមព្រៀង កូរ៉េខាងត្បូងតែងសន្យាផ្តល់ជំនួយស្បៀងអាហារ ឬដាក់ទុនវិនិយោគនៅក្នុងទឹកដីព្រំដែនទាំងពីរ ដើម្បីជាថ្នូរ បន្ធូរបន្ថយភាពតានតឹង ជាមួយកូរ៉េខាងជើង។
ប្រធានាធិបតីថ្មីរបស់កូរ៉េខាងត្បូង លោកមូន ជេអ៊ីន ទំនងនឹងប្រើនយោបាយចាស់ ដើម្បីអន្ទងចិត្តទីក្រុងព្យុងយ៉ាង។ លោកបាននិយាយរួចហើយថា នឹងចរចា ជាមួយកូរ៉េខាងជើង ដើម្បីដាក់ដំណើរការឡើងវិញ តំបន់សេដ្ឋកិច្ច កេសុង ក្នុងទឹកដីកូរ៉េខាងជើង ដែលវិនិយោគដោយក្រុមហ៊ុនកូរ៉េខាងត្បូង។ ដើម្បីបង្ហាញពីចេតនា ស្មោះត្រង់ ចង់បោះដៃទៅរកកូរ៉េខាងជើង ប្រធានាធិបតីថ្មីរបស់កូរ៉េខាងត្បូងនៅបានតែងតាំងមនុស្សសំខាន់ៗ ពីររូបដែលធ្លាប់ចូលរួមក្នុងកិច្ចប្រជុំកំពូលកូរ៉េ ទាំងពីរកន្លងមក ឲ្យធ្វើជានាយករដ្ឋមន្រ្តី និងប្រធានទីភ្នាក់ងារចារកិច្ចកូរ៉េខាងត្បូង។
លោកមូន ជេអ៊ីន ចង់បង្កើតការចរចាដើម្បីខិតចូលជិតគ្នាវិញ ជាមួយកូរ៉េខាងជើង។ ប៉ុន្តែ អ្នកជំនាញជាច្រើនវាយតម្លៃថា ការប៉ុនប៉ងរបស់រដ្ឋាភិបាលកូរ៉េខាងត្បូងនឹងជួបដែនកំណត់មួយ ព្រោះថា កូរ៉េខាងជើងបច្ចុប្បន្ន មិនមែនជាកូរ៉េខាងជើង កាលពី២០ឆ្នាំមុននោះទេ។ កូរ៉េខាងជើងសព្វថ្ងៃ ដឹកនាំដោយមេដឹកនាំវ័យក្មេង គីម ជុងអ៊ុន ដែលមិនរាថយនឹងការផលិតមីស៊ីល និងគ្រាប់បែកនុយក្លេអ៊ែរ ដោយផ្គើន មិនខ្លាចនឹងការដាក់ទណ្ឌកម្មរបស់អង្គការសហប្រជាជាតិ។
មួយវិញទៀត លោកមូន ជេអ៊ីន មានទំនោរចង់ទៅជានាជាមួយកូរ៉េខាងជើង នឹងអាចដើរផ្ទុយស្រឡះពីនយោបាយចង់បានរបស់វ៉ាស៊ីនតោន ដែលជាសម្ព័ន្ធមិត្តរបស់កូរ៉េខាងត្បូង និងដែលធ្លាប់បានព្រមានប្រើកម្លាំងយោធា តែម្នាក់ឯង ទៅលើកូរ៉េខាងជើង បើសិនចាំបាច់។ ចង់ ឬមិនចង់ ជ័យជំនះរបស់លោកមូន ជេអ៊ីន បានធ្វើឲ្យប៉ះពាល់ដល់ នយោបាយ និងយុទ្ធសាស្រ្តរបស់អាមេរិក នៅឧបទ្វីបកូរ៉េ។ ខុសពីប្រធានាធិបតីមុនៗ លោកមូន ជេអ៊ីន ហាក់បានដកខ្លួន ឲ្យឃ្លាតឆ្ងាយពីអាមេរិក ដោយបានចោទសំណួរពីភាពចាំបាច់នៃការតាំងប្រព័ន្ធខែលមីស៊ីល របស់អាមេរិកនៅទឹកដីកូរ៉េខាងត្បូង។ នៅថ្ងៃពុធ លោកបាននិយាយថា លោកនឹងទៅប្រទេសចិន ដើម្បីនិយាយពីរឿងប្រព័ន្ធខែលមីស៊ីល នៅកូរ៉េខាងត្បូង។ សម្រាប់លោកមូន ជេអ៊ីន កូរ៉េខាងត្បូងត្រូវមានសិទ្ធិសម្រេចចុងក្រោយពីរឿងតាំងខែលមីស៊ីលរបស់អាមេរិក នៅកូរ៉េខាងត្បូង។ បើមើលពីសំបកក្រៅ លោកមូន ជេអ៊ីន អាចបញ្ច្រាសនឹងនយោបាយចង់បានរបស់អាមេរិក ប៉ុន្តែ អ្នកជំនាញយល់ថា តាមពិត លោកមូន ជេអ៊ីន នៅតែជាកូនអុក ធ្វើតាមអាមេរិក របស់លោកដូណាល់ ត្រាំ ដែលកាលពីដើមខែឧសភានេះបាននិយាយថា លោកចង់ជួប គីម ជុងអ៊ុន បើសិនលក្ខខណ្ឌអំណោយផល។ លោកគីម ជុងអ៊ុនដែលលោកដូណាល់ ត្រាំ កោតសរសើរថា ជាក្មេងឆ្លាត ប្រកបដោយល្បិចកល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ