ជម្លោះរវាងក្រុមពុទ្ធសាសនិក និងសហគមន៍អ៊ីស្លាមចាប់កំរើកឡើងវិញ នៅភូមា
ប៉ូលិសភូមា នៅទីក្រុងរ៉ង់ហ្គូន នៅព្រឹកថ្ងៃពុធនេះបានបាញ់កាំភ្លើងឡើងលើមេឃ ដើម្បី គំរាមបង្អើល និងបំបែកក្រុមជាតិនិយម ហើយនិងក្រុមសហគមន៍អ៊ីស្លាម ដែលបានប្រឈមមុខ និងប៉ះទង្គិចគ្នា តាំងពីរាត្រីថ្ងៃអង្គារ។ ក្រុមជាតិនិយម ដែលមានចូលរួមតាំងពីព្រះសង្ឃភូមា បានចោទសហគមន៍អ៊ីស្លាមនៅទីក្រុងរ៉ង់ហ្គូនថា កំពុងលួចលាក់ ក្រុមជាតិរ៉ូហ៊ីងយ៉ា ក្រុមជនជាតិភាគតិច កាន់សាសនាអ៊ីស្លាម ដែលកំពុងរងទុក្ខបុកម្នេញ ទាំងហិង្សា និងផ្នែករដ្ឋបាលនៅក្នុងប្រទេសភូមា។
ចុះផ្សាយនៅថ្ងៃ៖
ការប៉ះទង្គិចគ្នារវាងក្រុមជាតិនិយម ភូមា និងសហគមន៍អ៊ីស្លាមកើតមានឡើង បន្ទាប់ពីក្រុមជាតិនិយមភូមា ដែលមានភាគច្រើនជាពុទ្ធសាសនិក ហើយនិងព្រះសង្ឃបានលើកគ្នា សម្រុកចូលក្នុងសង្កាត់រស់នៅមួយរបស់សហគមន៍អ៊ីស្លាម។ នៅល្ងាចថ្ងៃអង្គារ ក្រុមជាតិនិយម ភូមាដែលតាំងខ្លួនជាអ្នកតាមប្រមាញ់ ក្រុមជនជាតិភាគតិចរ៉ូហ៊ីងយ៉ាបានជូនដំណឹងទៅប៉ូលិសថា មានជនជាតិរ៉ូហ៊ីងយ៉ា សំងំលាក់ខ្លួន នៅក្នុងផ្ទះរបស់ប្រជាជនកាន់សាសនាអ៊ីស្លាម នៅទីក្រុងរ៉ង់ហ្គូន។ ប៉ុន្តែ ប៉ូលិសបានបដិសេធមិនចាប់ខ្លួនក្រុមមនុស្សទៅតាមការចង់បានរបស់ក្រុមជាតិនិយម ក្នុងហេតុផលថា ជនសង្ស័យទាំងនោះ មិនមែនជាជនជាតិរ៉ូហ៊ីងយ៉ា ប៉ុន្តែ ជាប្រជាជនអ៊ីស្លាមដែលមានសិទ្ធិស្របច្បាប់ រស់នៅក្នុងសហគមន៍អ៊ីស្លាម នៅទីក្រុងរ៉ង់ហ្គូន។
ដោយសារតែប៉ូលិសបដិសេធមិនចាប់ខ្លួនជនសង្ស័យ ទើបក្រុមជាតិនិយម ដែលមានលាយឡំដោយព្រះសង្ឃភូមាជាច្រើនអង្គបានលើកគ្នា ទៅរកចាប់ក្រុមមនុស្សដែលគេជឿថា ជាជនជាតិរ៉ូហ៊ីងយ៉ា។ ប៉ុន្តែ ពួកគេត្រូវជួបប្រឈមនឹងក្រុមប្រជាជនអ៊ីស្លាម ដែលចេញមុខ ការពារសហគមន៍របស់ខ្លួន។
Kyaw Nyein ទីប្រឹក្សាផ្នែកច្បាប់របស់ក្រុមអ៊ីស្លាម Jamiat Ulama El Islam លើកឡើងថា ឧប្បត្តិហេតុនៅយប់ថ្ងៃអង្គារធ្វើឲ្យប្រជាជនអ៊ីស្លាមស្លុតចិត្ត និងព្រួយបារម្ភ។ “វាជាការប៉ុនប៉ងដើម្បីញុះញង់ឲ្យមានកំហឹង ការស្អប់ ដោយគ្មានហេតុផល និងភស្តុតាងច្បាស់លាស់។”
នៅប៉ុន្មានខែនេះ ក្រុមជាតិជាតិនិយម នៅទីក្រុងរ៉ង់ហ្គូន បានដឹកនាំការតវ៉ា ជាច្រើនលើក រំខានពិធីបុណ្យសាសនាអ៊ីស្លាម និងរហូតឈានទៅសម្រេចបាន បិទសាលារៀនអ៊ីស្លាមពីរកន្លែង ក្នុងលេសថា តាមរយៈការបង្រៀនសាសនាអ៊ីស្លាម សហគមន៍អ៊ីស្លាមគ្រោងនឹងបង្កើតវិហារនៅប្រទេសភូមា។
ភូមា ជាប្រទេសដែលកាន់ គោរពពុទ្ធសាសនាដ៏ជ្រាលជ្រៅ។ ការប៉ះទង្គិចគ្នាដ៏ហិង្សា រវាងសហគមន៍អ៊ីស្លាម ជាមួយ នឹងសហគមន៍ពុទ្ធសាសនិក នៅឆ្នាំ ២០១២នៅរដ្ឋរ៉ាគីន បណ្តាលឲ្យកើតមានជាបន្តបន្ទាប់ការប្រឈមមុខដាក់គ្នារវាងក្រុមសាសនាទាំងពីរ។ នៅរ៉ាគីន ជនជាតិភាគតិចរ៉ូហ៊ីងយ៉ា ដែលភាគច្រើនកាន់សាសនាអ៊ីស្លាម ជាច្រើនម៉ឺននាក់ រត់ភៀសខ្លួនចេញពីផ្ទះសម្បែង ដើម្បីរត់គេចពីអំពើហិង្សា ហើយនិងការបង្រ្កាប អយុត្តិធម៌របស់ប៉ូលិស និងទាហានភូមា។ ជនជាតិរ៉ូហ៊ីងយ៉ាងត្រូវរដ្ឋាភិបាលភូមា ចាត់ទុកជាជនអន្តោប្រវេសន៍ដែលរត់ពីបង់ក្លាដែស មករស់នៅខុសច្បាប់ ក្នុងទឹកដីភូមា។ ជាជនជាតិដែលគ្មានប្រទេស គ្មានអត្តសញ្ញាណសំគាល់ខ្លួន ជនជាតិរ៉ូហ៊ីងយ៉ា ទទួលរងការរើសអើង និងធ្វើបាប ពីសំណាក់អាជ្ញាធរភូមា។
ទាហានភូមាដែលជឿថា ក្រុមអ៊ីស្លាមជ្រុលនិយមដែលវាយប្រហារប៉ុស្តប៉ូលិសនៅព្រំដែន កន្លងមក ជាក្រុមរ៉ូហ៊ីងយ៉ា បានបើកការបង្រ្កាប នៅរដ្ឋរ៉ាគីន រហូតបណ្តាលឲ្យប្រជាជនរ៉ូហ៊ីងយ៉ា ៧ម៉ឺននាក់រត់ចេញទៅប្រទេសបង់ក្លាដែស។ ក្រុមអ្នកស៊ើបអង្កេតរបស់អង្គការសហប្រជាជាតិដែលបាននិយាយទៅកាន់ជនភៀសខ្លួនរ៉ូហ៊ីងយ៉ា បានចាត់ទុកការបង្រ្កាបរបស់ទាហានភូមាថា អំពើឧក្រិដ្ឋកម្មប្រឆាំងមនុស្សជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ