មូលនិធិរូបិយវត្ថុបារម្ភនឹងភាពរិចរឹលនៃប្រជាសាស្ត្រនៅអាស៊ី
នៅក្នុងរបាយការណ៍ចេញផ្សាយនៅថ្ងៃអង្គារទី ៩ ឧសភា ២០១៧នេះ អង្គការមូលនិធិរូបិយវត្ថុអន្តរជាតិ បានស្នើសុំឱ្យបណ្តាប្រទេសនៅតំបន់អាស៊ីកុំយកគំរូតាមជប៉ុន ដោយត្រូវចាប់ផ្តើមបញ្ចេញសកម្មភាពភ្លាមបន្ទាន់រកវិធីទប់ស្កាត់ភាពរិចរិលនៃប្រជាសាស្ត្រ។ បើតាមមូលនិធិ បើក្រុមប្រទេសនៅអាស៊ីមិនព្រមគិតគូរផ្តល់កំណើតបង្កើតក្មេងជំនាន់ក្រោយគ្រប់គ្រាន់ទេ នោះប្រទេសមួយចំនួននឹងត្រូវជួបគ្រោះមានតែចាស់ជរាមុននឹងក្លាយទៅជាប្រទេសអ្នកមានហើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៩
អត្រាកំណើនប្រជាជននៅអាស៊ីនឹងមានកំរិតសូន្យ នៅឆ្នាំ២០៥០ ! នេះបើតាមការព្យាកររបស់អង្គការមូលនិធិរូបិយវត្ថុអន្តរជាតិ ដោយបញ្ជាក់ទៀតថា ចំនួនប្រជាពលរដ្ឋពេញវ័យធ្វើការ ដែលមានអត្រាខ្ពស់ដល់កំរិតកំពូលនៅពេលនេះ នឹងធ្លាក់ចុះជាបន្តបន្ទាប់នៅទសវត្សរ៍ខាងមុខ។
ចំណែកអត្រាមនុស្សចាស់ អាយុចាប់ពី៦៥ឆ្នាំឡើងទៅ នឹងកើនឡើងយ៉ាងខ្លាំង ពោលគឺនៅឆ្នាំ២០៥០ អាស៊ីនឹងមានមនុស្សចាស់ច្រើនជាងពេលបច្ចុប្បន្នដល់ទៅជិត ជិតពីរដងកន្លះ។
មានអត្រាពលរដ្ឋជាមនុស្សចាស់ច្រើន នោះមានន័យថាកំណើនសេដ្ឋកិច្ចក៏នឹងត្រូវថយចុះ។ បើតាមការគុណគិតរបស់មូលនិធិរូបិយវត្ថុអន្តរជាតិ កត្តាមនុស្សពន្យឺតកំណើនសេដ្ឋកិច្ចក្នុងល្បឿនប្រមាណ០,១ពិន្ទុ ក្នុងរយៈពេលបីទសវត្សរ៍ទៀត។
នេះជាបញ្ហាដែលមិនគួរធ្វេសប្រហែសឡើយ ព្រោះអាស៊ីមានជប៉ុនមួយជាគំរូ ជាក់ស្តែង។ គំរូដែលបញ្ជាក់ថា គ្មានកំណើនប្រជាពលរដ្ឋ ក៏អាចជះផលអវិជ្ជមានដល់កំណើនសេដ្ឋកិច្ច ដល់ភាពស្វាហាប់និងប្រសិទ្ធិភាពនៃនយោបាយរូបិយវត្ថុ។ ក្នុងរយៈពេលតែ២០ឆ្នាំចុងក្រោយនេះសោះ ពលរដ្ឋសកម្មរបស់ជប៉ុនបានកាត់បន្ថយអស់៧%។ អត្រាកំណើតនៅជប៉ុនមានមានតិចពេក ពលរដ្ឋចាស់កាន់តែច្រើនឡើងៗ ហេតុដូច្នេះហើយបានសកម្មភាពសន្សំប្រាក់កើនឡើង ឯសកម្មភាពវិនិយោគមានតិចទៅៗ។ សកម្មភាពបែបនេះបានខ្ទាស់កំណើនសេដ្ឋកិច្ច និងជាចំណែកមួយបង្កបង្កើតរដ្ឋាភិបាលមិនអាចសម្រេចកម្មវត្ថុទប់ស្កាត់វិបត្តិអតិផរណាបាន។
ដោយសារមូលហេតុនេះទើបអង្គការមូលនិធិរូបិយវត្ថុអន្តរជាតិ ស្នើឱ្យបណ្តាប្រទេសនៅអាស៊ីទាំងអស់ចាប់ផ្តើមគិតគូរដោះស្រាយបញ្ហាប្រជាសាស្ត្រ ឱ្យមែនទែន ដោយត្រូវបង្កើនការងារដល់ស្ត្រី ដល់មនុស្សចាស់ និងសើរើមើលគម្រោងបន្តពូជ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ