ឥណ្ឌាផ្តល់ប្រាក់កំចី ដើម្បីចែចង់បង់ក្លាដែស
រដ្ឋាភិបាលឥណ្ឌា នៅថ្ងៃសៅរ៍ម្សិលមិញ បានសម្រេចផ្តល់ប្រាក់កម្ចីប្រមាណ ៤ពាន់ ៥រយលានដុល្លារ ដល់ប្រទេសបង់ក្លាដែស។ នៅក្រោយជំនួបទ្វេរភាគីជាមួយលោកស្រីនាយករដ្ឋមន្រ្តីបង់ក្លាដែស លោកណារិនដ្រា ម៉ូឌី នាយករដ្ឋមន្រ្តីឥណ្ឌាបានប្រកាសផងដែរ ពីទឹកប្រាក់៥០០លានដុល្លារ ដែលឥណ្ឌា ឲ្យបង់ក្លាដែសខ្ចី សម្រាប់វិស័យកងទ័ពបង់ក្លាដែស។
ចុះផ្សាយនៅថ្ងៃ៖ កែប្រែថ្ងៃទី៖
នៅក្នុងអំឡុងទស្សនកិច្ចផ្លូវរដ្ឋ រយៈពេល ៤ថ្ងៃ នៅប្រទេសឥណ្ឌា លោកស្រីនាយករដ្ឋមន្រ្តីបង់ក្លាដែស ស្ហែក ហាស៊ីណាត្រូវបានរដ្ឋាភិបាលឥណ្ឌាក្រាលកម្រាលព្រំក្រហម ទទួលយ៉ាងរាក់ទាក់។ នៅថ្ងៃសៅរ៍ម្សិលមិញ ភាគីទាំងពីរ ឥណ្ឌា និងបង់ក្លាដែសចុះហត្ថលេខា លើកិច្ចព្រមព្រៀងចំនួន២២ ដែលនៅក្នុងនោះមានផងដែរ វិស័យបច្ចេកវិទ្យាថាមពលនុយក្លេអ៊ែរស៊ីវិល។
នៅក្នុងសន្និសីទកាសែត ដែលធ្វើឡើង នៅក្រោយការចុះហត្ថលេខារវាងភាគីទាំងពីរលោកនាយក រដ្ឋមន្រ្តីឥណ្ឌា ណារិនដ្រា ម៉ូឌីបានប្រកាសឲ្យដឹងពីសម្បទានប្រាក់កម្ចី៤ពាន់ ៥រយលានដុល្លារ សម្រាប់ឲ្យបង់ក្លាដែសយកទៅអភិវឌ្ឍគម្រោងសំខាន់ៗនៅក្នុងប្រទេស។ តាមលោកណារិនដ្រា ម៉ូឌី ឥណ្ឌា នឹងផ្តល់ផងដែរ ប្រាក់កំចី ៥០០លានដុល្លារ សម្រាប់វិស័យការពារបង់ក្លាដែស។ អាចនិយាយថា សំភារៈ សព្វាវុធរបស់កងទ័ព បង់ក្លាដែស នឹងត្រូវផ្គត់ផ្គង់ដោយប្រទេសឥណ្ឌា។
នៅក្នុងទស្សនកិច្ច៤ថ្ងៃ បង់ក្លាដែសនឹងទទួលបានប្រាក់កំចី ដោយមិនបាច់ប្រឹង នៅពេលដែលឥណ្ឌា ប៉ងចង់បានតែមួយគត់ គឺអូសទាញប្រទេសជិតខាងមួយនេះ ឲ្យមកស្ថិតនៅក្រោមឥទ្ធិពលរបស់ខ្លួន។ ឥណ្ឌាដែលបានផ្តល់ប្រាក់កំចីរាប់ពាន់លានដុល្លារ ក៏ដើម្បីទាក់ទាញទឹកចិត្ត បង់ក្លាដែស ដែលនៅប៉ុន្មានឆ្នាំចុងក្រោយនេះបានជាប់នុយសន្ទូច របស់ក្រុងប៉េកាំង។ នៅក្នុងដំណើរទស្សនកិច្ចផ្លូវរដ្ឋរបស់លោកប្រធានាធិបតីស៊ី ជីនពីង នៅខែតុលា ប្រទេសចិនបានប្រកាសផ្តល់ប្រាក់កម្ចី ២៤ពាន់លានដុល្លារដល់បង់ក្លាដែស ដែលចិនបានចាត់ទុកជាដៃគូយុទ្ធសាស្រ្ត ដើម្បីបង្កើតខ្សែក្រវ៉ាត់ ផ្លូវសូត្រ របស់ចិន នៅអាស៊ីខាងត្បូង។ វត្តមាន និងឥទ្ធិពលរបស់ចិន ដែលកាន់តែរីកធំឡើង នៅប្រទេសជិតខាង ក្បែរមាត់ទ្វារឥណ្ឌា មិនមែនជាដំណឹងល្អសម្រាប់ឥណ្ឌា នោះទេ។
ឥណ្ឌាមានព្រំដែនជាប់ជាមួយបង់ក្លាដែស ប្រមាណ ជាង ៤ពាន់គីឡូម៉ែត្រ។ លោកណារិនដ្រា ម៉ូឌីបានធ្លាប់បានព្យាយាមរឹតចំណងមិត្តភាពជាមួយបង់ក្លាដែស ដោយបានចុះកិច្ចព្រមព្រៀង ជា ប្រវត្តិសាស្រ្ត ដោះដូរដីភូមិ នៅតាមព្រំដែនជាមួយបង់ក្លាដែស នៅឆ្នាំ ២០១៥។ បង់ក្លាដែសនឹងរៀបចំការបោះឆ្នោតសភា នៅឆ្នាំ ក្រោយ។ ដោយផ្តល់ប្រាក់កំចីទៅបង់ក្លាដែស លើកនេះ រដ្ឋាភិបាលឥណ្ឌាដឹងថា ដើម្បីឈ្នះឆ្នោត លោកស្រីនាយករដ្ឋមន្រ្តីបង់ក្លាដែសមិនអាចត្រលប់ចូលប្រទេស ដោយដៃទទេនោះទេ។ នាយករដ្ឋមន្រ្តីបង់ក្លាដែស លោកស្រីហាស៊ីណា មានសមានចិត្ត ច្រើនទៅរកឥណ្ឌា ព្រោះថា ឪពុករបស់លោកស្រី ធ្លាប់ត្រូវបានរដ្ឋាភិបាលឥណ្ឌាជួយជ្រោមជ្រែង ឲ្យទាមទារឯករាជ្យ បានសម្រេចពីប៉ាគីស្ថាន នៅឆ្នាំ ១៩៧១៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ