មនុស្សស្និទ្ធនឹងប៉េកាំង ឈ្នះឆ្នោតធ្វើជាប្រមុខដឹកនាំថ្មី នៅហុងកុង
លោកស្រី Lam Carrie មនុស្សស្និទ្ធិនឹងទីក្រុងប៉េកាំង នៅថ្ងៃអាទិត្យទី ២៦ មីនា ២០១៧ បានឈ្នះឆ្នោត ក្លាយជាប្រមុខដឹកនាំថ្មី នៅហុងកុង។ ហុងកុងដែលធ្លាប់ស្ថិតនៅក្រោមការកាន់កាប់របស់អង់គ្លេស ជាង១០០ឆ្នាំ ត្រូវបានផ្ទេរមកឲ្យចិនគ្រប់គ្រងវិញ កាលពី២០ឆ្នាំមុន។ លោកស្រី Lam Carrie ជាមនុស្សស្រីដំបូងគេដែលចូលដឹកនាំក្បាលម៉ាស៊ីនរដ្ឋាភិបាលហុងកុង។
ចុះផ្សាយនៅថ្ងៃ៖
តាមលទ្ធផលឆ្នោត នៅថ្ងៃអាទិត្យនេះ លោកស្រី Lam Carrie បានទទួលសំឡេងគាំទ្រ ចំនួន ៧៧៧ ក្នុងចំណោមសំឡេងឆ្នោតសរុប ១១៩៤សំឡេង របស់គណៈកម្មាធិការបោះឆ្នោត។ ជ័យជំនះរបស់លោកស្រី Lam Carrieត្រូវបានគេគន់គូរ ដឹងរួចជាស្រេច តាំងពីមុនការបោះឆ្នោត។
ក្នុងវ័យ៥៩ឆ្នាំ លោកស្រី Lam Carrieបានទទួលការគាំទ្រ ពេញទំហឹងពីទីក្រុងប៉េកាំង ដែលគ្រប់គ្រងសំឡេង ២ភាគ៣ នៃគណៈកម្មាធិការបោះឆ្នោត ដែលមានសិទ្ធិបោះឆ្នោតជ្រើសរើសប្រមុខដឹកនាំហុងកុង។ សម្រាប់ក្រុមប្រជាធិបតេយ្យដែលបានបោះឆ្នោតគាំទ្រទាំងស្រុងលោក John Tsang គូប្រជែងរបស់លោកស្រី Lam Carrie ហុងកុងនឹងបន្តកាន់កាប់ដោយមនុស្សរបស់ប៉េកាំង។ ជាអតីតអនុប្រមុខដឹកនាំរដ្ឋាភិបាល ដែលជាអ្នកមានអំណាចទី ២ នៅហុងកុង បន្ទាប់ពីលោកលឿង ជុនយីង លោកស្រី Lam Carrieធ្លាប់បានចេញមុខប្រកាសគាំទ្រនយោបាយកំណែទម្រង់របស់ទីក្រុងប៉េកាំង ដែលចង់រក្សាអំណាចក្នុងការជ្រើសរើសរដ្ឋាភិបាលហុងកុង។
នៅពេលបានទទួលគ្រប់គ្រងហុងកុងពីដៃអង់គ្លេស នៅខែកក្កដា ឆ្នាំ ១៩៩៧ ប្រទេសចិនធ្លាប់បានសន្យាផ្តល់ពេល ៥០ ឆ្នាំដើម្បីឲ្យកោះហុងកុងរក្សារបបនយោបាយស្វយ័ត ពោលគឺប្រទេសមួយ ប្រព័ន្ធនយោបាយពីរ។ ហុងកុងមានច្បាប់ សភា លុយ និងរដ្ឋាភិបាលដឹកនាំ ខុសផ្សេងពីចិនដីគោក។
នៅប៉ុន្មានឆ្នាំចុងក្រោយនេះ ការលូកដៃ ជាបន្តបន្ទាប់របស់ចិន ទៅក្នុងនយោបាយដឹកនាំហុងកុង ជាពិសេសលើសិទ្ធិសេរីភាព បញ្ចេញមតិ នៅហុងកុងបានបង្កឲ្យមានការងើបតវ៉ាប្រឆាំងពីប្រជាជនហុងកុង។ ចលនាប្រជាធិបតេយ្យ ដែលដឹកនាំដោយក្រុមយុវជនហុងកុង ឬក្រុមឆ័ត្រពណ៌លឿង ត្រូវបានបង្រ្កាប បំបែកដោយហិង្សាពីសំណាក់លោកលឿង ជុនយីង ប្រមុខរដ្ឋាភិបាលហុងកុង ដែលត្រូវអស់អាណត្តិនៅខែកក្កដាខាងមុខ។
ជាមួយនឹងការជាប់ឆ្នោតរបស់លោកស្រី Lam Carrie ដែលធ្លាប់ជាមនុស្សមានអំណាចធំទី២ របស់រដ្ឋាភិបាលចាស់ ក្រុមអ្នកប្រជាធិបតេយ្យហុងកុងបារម្ភថា ហុងកុងនឹងបន្តធ្លាក់ចូលកាន់តែជ្រៅ ទៅក្នុងកណ្តាប់ដៃកាន់កាប់របស់រដ្ឋអំណាចចិន។ ជាក់ស្តែង នៅក្រោយជាប់ឆ្នោត នៅថ្ងៃនេះ លោកស្រី Lam Carrieបានប្រកាសបិទផ្លូវ តវ៉ា មិនឲ្យមានការទាមទារឯករាជ្យពីប្រទេសចិន។ អនាគតប្រមុខដឹកនាំថ្មីហុងកុងដែលទទួលស្គាល់ថា មានការប្រេះឆា ក្នុងសង្គមហុងកុង បានអំពាវនាវឲ្យមានការគិតបែបថ្មី និងសន្យាការពារសិទ្ធិមនុស្ស និងសេរីភាពបញ្ចេញមតិត ដើម្បីធានាការចម្រុងចម្រើន រុងរឿងរបស់ហុងកុង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ