តៃវ៉ាន់ប្រកាសថានឹងផលិតនាវាមុជទឹកដោយខ្លួនឯង
ថ្ងៃអង្គារ២១មីនានេះ ប្រធានាធិបតីតៃវ៉ាន់ លោកស្រី ត្សៃ អ៊ីងវេន បានប្រកាសថា តៃវ៉ាន់នឹងផលិតនាវាមុជទឹកដោយខ្លួនឯង។ គេមើលឃើញថា ការប្រកាសនេះ គឺដើម្បីប្រឈមនឹងចិន ដែលចាត់ទុកតៃវ៉ាន់ជាដែនដីរបស់ខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៥
ថ្ងៃអង្គារនេះ ប្រធានាធិបតីតៃវ៉ាន់ ត្សៃ អ៊ីងវេន សន្យាថា តៃវ៉ាន់នឹងសាងសង់នាវាមុជទឹកច្រើនគ្រឿង ដោយខ្លួនឯង។ ក្នុងដំណើរទៅកាន់មូលដ្ឋានយោធាជើងទឹកមួយកន្លែង លោកស្រីអ៊ីនវេន លើកឡើងថា ការពង្រឹងសមត្ថភាពប្រយុទ្ធផ្នែកមុជទឹក មានសារៈសំខាន់ដើម្បីការពារតៃវ៉ាន់។
តៃវ៉ាន់មិនដែលសង់នាវាមុជទឹកដោយខ្លួនឯងទេ។ យោងតាមក្រុមអ្នកជំនាញ ក្នុងការសាងសង់ជាលើកទី១នេះ តៃវ៉ាន់ត្រូវផ្អែកលើបច្ចេកវិទ្យាបរទេស ដើម្បីឆ្លើយតបបញ្ហាមួយចំនួន បែបយ៉ាងខាងផ្នែកប្រព័ន្ធអេឡិចត្រូនិកជាដើម។
សព្វថ្ងៃ កោះតៃវ៉ាន់មាននាវាមុជទឹក២គ្រឿង ទិញពីសហរដ្ឋអាមេរិក។ ជានាវាសម័យសង្គ្រាមលោកលើកទី២។ តៃវ៉ាន់ប្រើនាវាទាំង២នេះ សម្រាប់ការហ្វឹកហាត់។ មាននាវាមុជទឹក២គ្រឿងទៀតដែរ ដែលទិញពីប្រទេសហូឡង់ ក្នុងទស្សវត្សឆ្នាំ១៩៨០។ ជានាវាសង់ក្នុងទស្សវត្សឆ្នាំ១៩៧០។ កាលពីឆ្នាំ២០០១ អាមេរិកធ្លាប់យល់ព្រមលក់អោយតៃវ៉ាន់ នូវនាវាមុជទឹក៨គ្រឿង ប្រើប្រេងម៉ាស៊ូតនិងអេឡិចត្រូនិក។ តែតៃវ៉ាន់មិនដែលបានទិញពីអាមេរិកទេ ដោយសារមានបញ្ហាថវិកាជាតិ និងការជំទាស់ក្នុងស្រុក។
ការប្រកាសសង់នាវាមុជទឹកដោយខ្លួនឯង ប្រកាសចេញពីមាត់របស់ប្រធានាធិបតីតៃវ៉ាន់ផ្ទាល់នេះ ត្រូវគេមើលឃើញថា ជាសារឆ្លើយតបទៅចិន។ ប្រធានាធិបតី ត្សៃ អ៊ីនវេន ជាអ្នកគាំទ្រការទាមទារឯករាជ្យកោះតៃវ៉ាន់។ យោងតាមក្រសួងការពារជាតិតៃវ៉ាន់ ចិនមិនដែលទាត់ចោលយុទ្ធសាស្ត្រប្រើកម្លាំងបាយ ដើម្បីទាមទារយកខែត្រខ្លួនមកវិញទេ។ កាលពីខែមករា ចិនបានបញ្ជូនកប៉ាល់ផ្ទុកយន្តហោះចម្បាំង ឈ្មោះថា Liaoning លៀវនីង ទៅក្បែរកោះតៃវ៉ាន់។ សប្តាហ៍មុន តៃវ៉ាន់ទើបតែបានព្រមានពីការប្រឈម ទៅនឹងការឈ្លានពានរបស់ចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ