របាយការណ៍ ONG ឆ្នាំ២០១៦៖ពលរដ្ឋអាស៊ីចំនួន ១ភាគ៤ បានសូកប៉ាន់ដើម្បីទទួលបានការងាររដ្ឋ
នៅថ្ងៃអង្គារ ទី៧ មីនា អង្គការក្រៅរដ្ឋាភិបាល Transparency International បានចេញផ្សាយរបាយការណ៍មួយស្តីពីរឿងស៊ីសំណូកសូកប៉ាន់ក្នុងឆ្នាំ ២០១៦។ របាយការណ៍បានឲ្យដឹងថា មានពលរដ្ឋរស់ក្នុងតំបន់អាស៊ី ប៉ាស៊ីហ្វិកចំនួន ១ភាគ៤ បានយកលុយទៅសូកមន្រ្តីសាធារណៈដើម្បីទទួលបានការងារធ្វើនៅក្នុងក្របខ័ណ្ឌរដ្ឋ។ Transparency International បានអំពាវនាវដល់គ្រប់រដ្ឋាភិបាលឲ្យរួសរាន់ចាត់វិធានការទប់ស្កាត់លើទង្វើពុករលួយមួយនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
របាយការណ៍របស់អង្គការក្រៅរដ្ឋាភិបាល Transparency International ដែលមានមូលដ្ឋានក្នុងប្រទេសអាល្លឺម៉ង់បានធ្វើឡើង ដោយមានការសាកសួរលើមនុស្សជាង ២០ ០០០នាក់រស់ក្នុង ១៦ប្រទេសស្ថិតក្នុងតំបន់អាស៊ី ប៉ាស៊ីហ្វិកដោយរាប់ចាប់ពីប្រទេសប៉ាគីស្ថានដល់ប្រទេសអូស្ត្រាលី។ តាមរបាយការណ៍ មានមនុស្សជាង ៩០០លាននាក់បានបង្ខំចិត្តយកលុយទៅសូកមន្រ្តីរដ្ឋការដើម្បីទទួលបានការងារធ្វើនៅក្នុងក្របខ័ណ្ឌរដ្ឋ។ ឥណ្ឌា និងវៀតណាម ជាប្រទេសអាស៊ីពីរដែលប៉ះពាល់ខ្លាំងជាងគេ ព្រោះមានពលរដ្ឋជិត ២ភាគ៣ មានទម្លាប់យកលុយទៅសូកប៉ាន់គេដើម្បីអាចទទួលបានការងាររដ្ឋ ពិសេសនៅក្នុងវិស័យអប់រំ ឬមួយនៅក្នុងមន្ទីរពេទ្យរដ្ឋ។
ចំណែកជប៉ុន កូរ៉េខាងត្បូង ហុងកុង និងអូស្រ្តាលីត្រូវបាន Transparency International ចាត់ទុកជាក្រុមប្រទេសគំរូមិនសូវមានបញ្ហាស៊ីសំណូកសូកប៉ាន់របៀបនេះទេ។ របាយការណ៍ដដែលបានបញ្ជាក់ថា ប្រភេទមន្រ្តីរដ្ឋការដែលពុករលួយ ទទួលសំណូកខ្លាំងជាងគេ គឺពួកប៉ូលិស ហើយប្រភេទពលរដ្ឋដែលរងគ្រោះខ្លាំងជាងគេ គឺអ្នកក្រីក្រ។ លោក Jose Ugaz ប្រធានក្រុមប្រឹក្សារដ្ឋបាល Transparency International បានថ្លែងនៅក្នុងសេចក្តីជូនដំណឹងមួយថា រដ្ឋាភិបាលត្រូវតែចាត់វិធានការបន្ថែមទៀតនៅក្នុងយុទ្ធនាការប្រឆាំងអំពើពុករលួយ។
សេចក្តីជូនដំណឹងដដែលបានបន្ថែមថា អំពើពុករលួយមិនមែនជាឧក្រិដ្ឋកម្មតូចតាចទេ តែវាអាចរំខានដល់ការអប់រំ រំខានដល់ការទទួលការព្យាបាលសមរម្យ និងវាអាចឈានដល់ការសម្លាប់ទៀតផង។ របាយការណ៍របស់ Transparency International នេះបានធ្លាក់មក បន្ទាប់ពីមានប្រទេសអាស៊ីខ្លះបានជួបប្រទះនឹងរឿងអាស្រូវពុករលួយជាប់ពាកព័ន្ធនឹងថ្នាក់ដឹកនាំកំពូលៗតែម្តង។
ជាក់ស្តែងនៅកូរ៉េខាងត្បូងថ្មីៗនេះ ការផ្ទុះរឿងអាស្រូវពុករលួយ និងបាតុកម្មរបស់មហាជនបានធ្វើឲ្យលោកស្រីប្រធានាធិបតីប៉ាក់ គុនហេខ្ទាតពីតំណែងដោយការបោះឆ្នោតទម្លាក់ពីសភា។ នៅម៉ាឡេស៊ី លោកនាយករដ្ឋមន្រ្តីណាហ្ស៊ីប រ៉ាហ្សាក់កំពុងជំពាក់វាក់វិននឹងរឿងអាស្រូវពុករលួយរាប់ពាន់លានដុល្លារតាំងពីឆ្នាំ ២០១៥ ជាមួយនឹងធនាគារអភិវឌ្ឍន៍ម៉ាឡេស៊ីទីមួយ 1MD៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ