ជប៉ុនតវ៉ា ទល់នឹងគម្រោងរុស្ស៊ី ពង្រាយទ័ពមួយម៉ឺននាក់តែម្តង នៅ កោះគួរីល
ថ្ងៃទី ២៣ កុម្ភៈ ក្រុងតូក្យ៉ូ បានផ្ញើកំណត់ទូត តវ៉ា មកកាន់ក្រុងម៉ូស្គូ ចំពោះ ផែនការរុស្ស៊ី ពង្រឹងវត្តមានយោធារុស្ស៊ី នៅលើអំបូរកោះគួរីលខាងត្បូង ទៅដោយ អង្គភាពទ័ព ចំនួនមួយកងពលតែម្តង ហេតុដែលផ្ទុយស្រឡះនឹង គោលជំហររដ្ឋាភិបាលជប៉ុន។ ប៉ុន្តែ ម៉ូស្គូ ថ្លែងថា ការពង្រាយទ័ពនេះ ឥតពាំនាំជាគ្រោះថ្នាក់អ្វីណាទេ។ មិនតែប៉ុណ្ណោះ រុស្ស៊ី ថែមទាំង ត្រៀម សហការ ជាមួយជប៉ុនផង ខាងបញ្ហាយោធា។
ចុះផ្សាយនៅថ្ងៃ៖
គួរនិយាយថា អំបូរកោះនោះឯង តាមការបកស្រាយក្រុងតូក្យ៉ូ គឺជាដែនដីខាងជើង របស់ជប៉ុនទេតើ។ វាបានឆ្លងមកនៅក្រោមការត្រួតត្រារបស់កងទ័ពសូវៀត ក្រោយពីជប៉ុនចាញ់ សង្គ្រាមលោកលើកទី២ ក្នុងឆ្នាំ១៩៤៥ ហើយអ្នកស្រុកជប៉ុន នៅទីនោះ ប្រមាណ១៧.០០០នាក់ ត្រូវ បានបង្ខំឲ្យចាកចេញទៅ។
ថ្លែងម្សិលមិញ ក្នុងសន្និសីទសារព័ត៌មាន នៅក្រុងតូក្យ៉ូ អគ្គលេខាធិការរដ្ឋាភិបាលជប៉ុន លោក Yoshihide Suga បានឲ្យដឹងថា ជប៉ុននឹងតាមដានយ៉ាងដិតដល់ អំពីវិធានការ ចាត់ដោយ រុស្ស៊ី។ តាមសំដីគាត់ បើចំណាត់ការរុស្ស៊ី លេចចេញជាកាបង្កើនចំនួនទ័ពនៅ លើអំបូរកោះនោះមែន គឺវា ផ្ទុយនឹងគោលជំហរជប៉ុនតែម្តង។
ជាការរំលឹក កាលពីខែធ្នូកន្លងទៅ នៅក្រុងតូក្យ៉ូ លោកនាយករដ្ឋមន្ត្រី ជប៉ុន Shinzo Abe និង លោកប្រធានាធិបតីរុស្ស៊ី Vladimir Putin បានចុះកិច្ចព្រមព្រៀងសេដ្ឋកិច្ចជាច្រើន ច្បាប់ ប៉ុន្តែ មិនបានរំកិលឲ្យទៅមុខបានដូចចិត្តឡើយ សំណុំរឿងកោះជាប់វិវាទនោះ។ ដើម្បីពន្លឿនវា លោក Shinzo Abe នឹងមកបំពេញទស្សនកិច្ច នៅរុស្ស៊ី ក្នុងឆ្នាំ ២០១៧នេះ។
កិច្ចចរចានឹងតម្រង់ទៅ ដោះស្រាយដែនដីជាប់វិវាទ ហើយសាកល្បងចុះជាសន្ធិសញ្ញាសន្តិភាព រវាងជប៉ុននិងរុស្ស៊ី គ្រាន់នឹងខ័ណ្ឌបញ្ចប់ជាផ្លូវការ ភាពជាសត្រូវនឹងគ្នា សល់ពី សង្គ្រាមលោក លើកទី២។
តបនឹងក្តីព្រួយបារម្ភរបស់ក្រុងតូក្យ៉ូ ប្រធាន គណៈកម្មាធិការព្រឹទ្ធសភារុស្ស៊ីខាងការពារប្រទេសនិងសន្តិសុខជាតិ លោក Viktor Ozerov បានថ្លែងថា ៖ ដោយដាក់ទ័ពខ្លួនឲ្យប្រចាំការនៅលើ កោះ ជាដែនដីខ្លួន រុស្ស៊ីគ្មានចេតនាវាយប្រហារអ្វីណា ទៅលើជប៉ុនឡើយ។ គាត់គូសបញ្ជាក់ ថា “ប្រទេសរុស្ស៊ីអាចពង្រាយកម្លាំងយោធា នៅត្រង់កន្លែងណា នៃដែនដីខ្លួន ដែលខ្លួន យល់ ថា ជាតម្រូវការចាំបាច់។ មិនតែប៉ុណ្ណោះ រុស្ស៊ី ថែមទាំង ត្រៀម សហការជាមួយជប៉ុនទៅផង ខាងបញ្ហាយោធា”៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ