IISS៖ចិនកំពុងបន្តបំពាក់គ្រឿងសព្វាអាវុធលឿនជាងប្រទេសផ្សេងក្នុងលោក
នៅថ្ងៃអង្គារ ទី១៤ កុម្ភៈ វិទ្យាសា្ថនអន្តរជាតិដើម្បីសិក្សាយុទ្ធសាស្រ្តហៅកាត់ថា IISS បានចេញផ្សាយរបាយការណ៍ប្រចាំឆ្នាំ ២០១៦ ស្តីពីសមភាពកម្លាំងយោធានៅក្នុងពិភពលោក។ របាយការណ៍បានបញ្ជាក់ថា ចិនជាប្រទេសដែលកំពុងបន្តបំពាក់គ្រឿងសព្វាវុធលឿនជាងប្រទេសដទៃទៀតក្នុងលោកជាមួយនឹងថវិកាការពារជាតិប្រចាំឆ្នាំ ២០១៦ ចំនួន ១៤៥ ០០០លានដុល្លារ។ ទោះជាយ៉ាងនេះក្តី អាមេរិកបន្តស្ថិតនៅចំណាត់ថ្នាក់ទី១ លើការចំណាយផ្នែកយោធា។
ចុះផ្សាយនៅថ្ងៃ៖
ស្តាប់ - ០២:៤១
គឺនៅក្នុងទីក្រុងឡុងដ៏ ប្រទេសអង់គ្លេសដែលលោក John Chipman នាយកវិទ្យាសា្ថនអន្តរជាតិដើម្បីសិក្សាយុទ្ធសាស្រ្ត (IISS) បានបង្ហាញរបាយការណ៍ប្រចាំឆ្នាំ ២០១៦ ស្តីពីសមភាពកម្លាំងយោធានៅក្នុងពិភពលោក។ តាមលោក John បស្ចិមលោកកំពុងបាត់បង់បន្តិចម្តងៗនូវឧត្តមភាពបច្ចេកវិទ្យាយោធាដែលខ្លួនធ្លាប់មានពីមុនមក។ របាយការណ៍របស់ IISS បានបញ្ជាក់ថា តាំងពីអាស៊ីបានបង្កើនការចំណាយយោធាទ្វេដងលើសអឺរ៉ុបក្នុងឆ្នាំ ២០១២ មក ការចំណាយក្នុងវិស័យនេះនៅអាស៊ីបានបន្តកើនឡើងជារៀងរាល់ឆ្នាំក្នុងរង្វង់ពី ៥ ទៅ ៦%។ តែបើនិយាយជាលក្ខណៈទូទៅនៅទូទាំងពិភពលោកក្នុងឆ្នាំ ២០១៦ វិញ ការចំណាយក្នុងវិស័យយោធាមានការធ្លាក់ចុះចំនួន ០,៤%។
តំបន់ដែលបានកាត់បន្ថយចំណាយយោធា គឺតំបន់មជ្ឈិមបូព៌ាដោយសារតែតម្លៃប្រេងឆៅធ្លាក់ថ្លៃខ្លាំងពេក។ របាយការណ៍របស់ IISS ឲ្យដឹងថា ទ្វីបអាស៊ីបានស្រូបយកជាង ១ភាគ៣នៃការចំណាយយោធាសរុបក្នុងលោក ក្នុងនោះ ថវិកាយោធាចិនតែម្នាក់ឯងក្នុងឆ្នាំ ២០១៦ មានដល់ទៅ ១៤៥ ០០០លានដុល្លារ។ យ៉ាងណាក៏ដោយ អាមេរិកបន្តស្ថិតចំណាត់ថ្នាក់ទី១ ដោយមានថវិកាយោធាចំនួន ៦០៤ ៥០០លានដុល្លារ រុស្ស៊ីស្ថិតចំណាត់ថ្នាក់ទី៣ ជាមួយនឹងទឹកប្រាក់យោធាចំនួន ៥៨ ៩០០លានដុល្លារ ប្រទេសអារ៉ាប៊ីសាអូឌីតជាមួយនឹងទឹកប្រាក់ ៥៦ ៩០០លានដុល្លារ អង់គ្លេសចំនួន ៥២ ៥០០លានដុល្លារ ឬមួយបារាំងចំនួន ៤៧ ២០០លានដុល្លារ។
របាយការណ៍របស់ IISS ដដែលបានបញ្ជាក់ថា ចិនដែលពីមុនពឹងតែលើកម្មវិធីយោធាក្នុងជំនាន់សហភាពសូវៀត ឬមួយរុស្ស៊ីសព្វថ្ងៃបានផ្តើមងាកទៅពឹងលើការស្រាវជ្រាវ ការអភិវឌ្ឍន៍ និងការកសាងគ្រឿងសព្វាវុធជាមួយនឹងបច្ចេកវិទ្យារបស់ខ្លួនវិញម្តង។ លើសពីនេះ ចិនក៏បានផ្តើមលក់គ្រឿងសព្វាវុធរបស់ខ្លួនទៅបរទេសដែរ។ សម្រាប់ក្រុមប្រទេសអឺរ៉ុបខាងកើត និងខាងជើង រុស្ស៊ីនៅបន្តជាប្រភពគួរឲ្យបារម្ភ នោះបើទោះបីជាថវិកាការពារជាតិរុស្ស៊ីក្នុងឆ្នាំ ២០១៦ មានការធ្លាក់បន្តិចក៏ដោយ។
នៅខាងក្រុមប្រទេសទាំង ២៦ ជាសមាជិករបស់អង្គការអូតង់វិញ ការចំណាយផ្នែកយោធាបានកើនឡើងតិចតួច តែមានប្រទេសសមាជិកចំនួន ២ គឺអេស្តូនី និងក្រិកបានគោរពកម្មវត្ថុត្រឹមត្រូវដោយចំណាយតែ ២% នៃផលិតផលសរុបសម្រាប់វិស័យការពារជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ