ប្រមុខសង្ឃកាតូលិកសម្តេចប៉ាបហ្រ្វង់ស័រទិតៀនភូមាក្នុងរឿងរ៉ូហ៊ីងយ៉ា
នៅថ្ងៃពុធ ទី៨ កុម្ភៈ ប្រមុខសង្ឃកាតូលិកសម្តេចប៉ាបហ្រ្វង់ស័របានមានបន្ទូលទិតៀនខ្លាំងៗលើរដ្ឋាភិបាលនៃប្រទេសភូមាក្នុងសំណុំរឿងជនជាតិភាគតិចរ៉ូហ៊ីងយ៉ា អ្នកកាន់សាសនាអ៊ីស្លាមរស់ក្នុងទឹកដីភូមា។ តាមសម្តេចប៉ាបហ្រ្វង់ស័រ ពួករ៉ូហ៊ីងយ៉ាត្រូវបានគេវាយធ្វើបាបដោយសារតែពួកនេះប្រាថ្នាចង់រស់នៅតាមទំនៀមទម្លាប់ ប្រពៃណីសាសនារបស់ពួកគេ។ ប្រតិកម្មរបស់ប្រមុខសង្ឃកាតូលិកនេះបានធ្វើឡើង បន្ទាប់ពីតុលាការក្រុងរ៉ង់ហ្គូនបានកាត់ទោសប៉ូលិសភូមាចំនួន ៣នាក់ឲ្យជាប់គុកចំនួន ២ខែពីបទបានវាយប្រហារលើពួករ៉ូហ៊ីងយ៉ា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
ប្រតិកម្មរិះគន់ ទៀនរបស់សម្តេចប៉ាបហ្រ្វង់ស័រលើរដ្ឋាភិបាលភូមាក្នុងរឿងជនជាតិភាគតិចរ៉ូហ៊ីងយ៉ាបានធ្វើឡើងនៅបុរីវ៉ាទីកង់ ប្រទេសអ៊ីតាលីនាឱកាសទិវាបន់ស្រន់ប្រឆាំងនឹងការជួញដូរមនុស្សដែលមានគ្រិស្តបរិស័ទចូលរួមជាច្រើនពាន់នាក់។ សម្តេចប៉ាបហ្រ្វង់ស័របានលើកឡើងចំៗថា អស់ជាច្រើនឆ្នាំកន្លងមកហើយដែលពួករ៉ូហ៊ីងយ៉ាត្រូវបានគេវាយធ្វើបាប និងសម្លាប់ចោលដោយសារតែជនជាតិភាគតិចអ្នកកាន់សាសនាអ៊ីស្លាមមួយនេះប្រាថ្នាចង់រស់នៅជាមួយនឹងវប្បធម៌ ប្រពៃណីសាសនារបស់ពួកគេ។ នាឱកាសនោះដែរ សម្តេចប៉ាបបានអំពាវនាវឲ្យបន់ស្រន់ចំពោះពលរដ្ឋរ៉ូហ៊ីងយ៉ាដែលត្រូវបានរដ្ឋអំណាចភូមាបណ្តេញចេញពីទឹកដីភូមា។
ទន្ទឹមគ្នានេះ ប្រមុខសង្ឃកាតូលិកក៏បានលើកទឹកចិត្តរដ្ឋាភិបាលទីក្រុងណៃពីដ៏ឲ្យប្រឹងប្រែងបន្ថែមទៀតក្នុងការព្យាបាលស្នាមរបួសមួយនេះដោយធ្វើយ៉ាង អនុញ្ញាតឲ្យពលរដ្ឋរ៉ូហ៊ីងយ៉ារួចផុតពីការធ្វើទុក្ខបុកម្នេញ និងអាចរស់នៅក្នុងភាពថ្លៃថ្នូររបស់ពួកគេ។ តាមសម្តេចប៉ាបហ្រ្វង់ស័រ គេត្រូវតែកំចាត់ឲ្យខានតែបាននូវឧក្រិដ្ឋកម្មគួរឲ្យអាម៉ាស់ និងមិនអាចទទួលយកបានមួយនេះ។ បន្ទូលរបស់ប្រមុខសង្ឃកាតូលិកពេលនេះបានធ្វើឡើង បន្ទាប់ពីអង្គការសហប្រជាជាតិទើបបានចេញផ្សាយរបាយការណ៍មួយស្តីពីពលរដ្ឋរ៉ូហ៊ីងយ៉ា។
តាមរបាយការណ៍ គិតតាំងពីខែតុលា ឆ្នាំ ២០១៦ មកទល់ពេលនេះ មានពួករ៉ូហ៊ីងយ៉ាប្រមាណ ៦៦ ០០០នាក់បានភៀសខ្លួនរត់ទៅជ្រកកោណក្នុងប្រទេសបង់ក្លាដែស និងមានប្រមាណជា ២២ ០០០នាក់ផ្សេងទៀតបានប្តូរកន្លែងរស់នៅក្នុងប្រទេសភូមា។ នៅក្នុងបទសម្ភាសន៍ជាមួយជនរងគ្រោះចំនួន ២០០នាក់ធ្វើដោយអង្គការសហប្រជាជាតិ ជនរងគ្រោះបានពណ៌នាពីទារុណកម្មយ៉ាងសាហាវដែលពួកគេបានទទួល ពិសេសស្រ្តីក្មេង ចាស់ត្រូវបានគេចាប់រំលោភ បុរសត្រូវគេដុតទាំងរស់ ហើយទារក និងកូនក្មេងត្រូវគេចាក់សម្លាប់នឹងកាំបិត។
របាយការណ៍របស់អង្គការសហប្រជាជាតិដដែលក៏បានលើកឡើងពីនយោបាយបោសសំអាតជនជាតិភាគតិចរ៉ូហ៊ីងយ៉ា និងឧក្រិដ្ឋកម្មប្រឆាំងមនុស្សជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ