ហ្វីលីពីនសុំឲ្យកប៉ាល់ចិនចូលល្បាតក្នុងដែនសមុទ្រភាគខាងត្បូងហ្វីលីពីន
ប្រធានាធិបតីហ្វីលីពីន លោករ៉ូឌ្រីហ្កូ ឌុយទែរតេ ចង់ឲ្យចិនបញ្ជូនកប៉ាល់ល្បាតទៅក្នុងដែនសមុទ្រស៊ូលូ Suluរបស់ខ្លួន។ នៅថ្ងៃអង្គារទី ៣១មករា នៅមុខ មេបញ្ជាការកងទ័ព ដែលទើបឡើងតំណែង លោកប្រធានាធិបតី ឌុយទែរតេបានប្រកាសថា លោកបានស្នើសុំរួចហើយទៅរដ្ឋាភិបាល ចិន ឲ្យបញ្ជូនកប៉ាល់ល្បាត ទៅភាគខាងត្បូងហ្វីលីពីន ដើម្បីជួយប្រយុទ្ធប្រឆាំងក្រុមចោរសមុទ្រអាប៊ូ សាយ៉ាហ្វ ដែលបានតាំងខ្លួនជាបណ្តាញអង្គការរដ្ឋអ៊ីស្លាម នៅអាស៊ី។
ចុះផ្សាយនៅថ្ងៃ៖ កែប្រែថ្ងៃទី៖
នៅពេលហ្វីលីពីនកំពុងជាប់មានជម្លោះដណ្តើមដីកោះជាមួយចិននៅសមុទ្រចិនខាងត្បូង ប្រធានាធិបតីហ្វីលីពីន ឌុយទែរតេវិញបានបើកចំហរដៃ ស្វាគមវត្តមានកប៉ាល់ចិន នៅសមុទ្រភាគខាងត្បូងហ្វីលីពីន។ នៅថ្ងៃអង្គារម្សិលមិញ ប្រធានាធិបតីហ្វីលីពីន ឌុយទែរតេបានថ្លែងថា លោកបានសុំជំនួយពីចិន ចង់ឲ្យចិនបញ្ជូនកប៉ាល់ល្បាតរបស់ខ្លួន ទៅក្នុងសមុទ្រ ស៊ូលូ ដែលស្ថិតនៅចន្លោះប្រទេសម៉ាឡេស៊ី និងហ្វីលីពីន។
តាមលោកឌុយទែរតេ ដោយមិនបើកចូលក្នុងដែនទឹករបស់ហ្វីលីពីន កប៉ាល់ចិនអាចចរាចរណ៍ នៅក្នុងសមុទ្រអន្តរជាតិ ដើម្បីចូលរួមប្រយុទ្ធនឹងក្រុមឧទ្ទាមអាប៊ូសាយ៉ាហ្វ ដែលកំពុងធ្វើជាចោរសមុទ្រចាប់ជំរិតកប៉ាល់ទំនិញបរទេស។ “យើងនឹងសប្បាយចិត្តនឹងឃើញវត្តមានកប៉ាល់ចិន នៅទីនេះ។ គឺដើម្បីល្បាតតែមួយមុខប៉ុណ្ណោះ” លោកប្រធានាធិបតីហ្វីលីពីនបាននិយាយយ៉ាងដូច្នេះ ប៉ុន្តែ មិនបានបញ្ជាក់ថា តើចិនបានផ្តល់ចម្លើយយ៉ាងណានោះទេ។
កន្លងមក ហ្វីលីពីនបានពឹងផ្អែកលើជំនួយយោធាអាមេរិក ដើម្បីប្រយុទ្ធប្រឆាំងនឹងក្រុមឧទ្ទាម បំបែកទឹកដី អាប៊ូសាយ៉ាហ្វ។ ប៉ុន្តែ ហ្វីលីពីនក្រោមការដឹកនាំរបស់ប្រធានាធិបតីថ្មី លោកឌុយទែរតេ បានបែរខ្នងដាក់អាមេរិក និងបានងាកទៅចងសម្ព័ន្ធភាពជាមួយ ចិន បើទោះជាប្រទេសទាំងពីរកំពុងឈ្លោះដណ្តើមទឹកដី នៅក្នុងសមុទ្រចិនខាងត្បូងក៏ដោយ។
ទៅតាមលោកឌុយទែរតេ ការចាប់ជំរិត កប៉ាល់ទំនិញ នៅសមុទ្រស៊ូលូ អាចនឹងកើនឡើងខ្លាំង ដូចនៅសមុទ្រប្រទេសសូម៉ាលី។ ប្រមុខរដ្ឋាភិបាលហ្វីលីពីននៅបានព្រមានថា ការចាប់ជំរិតកប៉ាល់ទំនិញ នឹងអាចជះផលអាក្រក់ទៅលើចរាចរណ៍ជើងទឹក ហើយនិងការខាតបង់ធ្ងន់ធ្ងររបស់ក្រុមហ៊ុនធានារ៉ាប់រ៉ង។
ការិយាល័យជើងទឹកអន្តរជាតិបានវាយតម្លៃថា នៅខែនេះ ចំនួនចាប់ជំរិតបានកើនឡើងខ្ពស់ នៅក្នុងដែនទឹក ភាគខាងត្បូងហ្វីលីពីន។ ឥណ្ឌូណេស៊ី ដែលបានចូលរួមល្បាតដែនទឹក ជាមួយហ្វីលីពីន និងម៉ាឡេស៊ី បានព្រមានថា សមុទ្រស៊ូលូ នឹងក្លាយជាអនាគតសមុទ្រសូម៉ាលី ដែលកប៉ាល់ទំនិញ ឧស្សាហ៍រងគ្រោះ ដោយការវាយប្រហារ ចាប់ជំរិតទារលុយពីចោរសមុទ្រ។
សូមបញ្ជាក់ថា ក្រុមឧទ្ទាម អាប៊ូសាយ៉ាហ្វ បានភ្ជាប់ខ្លួន ទៅក្រុមជីហាតអង្គការរដ្ឋអ៊ីស្លាម។ សម្រាប់លោកប្រធានាធិបតីហ្វីលីពីន ក្រុមទ័ពព្រៃហ្វីលីពីន ដែលរស់អាស្រ័យលើលុយបានមកពីការចាប់ជំរិតមនុស្ស និងកប៉ាល់ទំនិញ កំពុងចង់ពង្រីកឥទ្ធិពល យកកោះមីនដាណាវមកធ្វើជាទឹកដីកាលីហ្វា នៅអាស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ