លោក ស៊ី ជីនពីងចូលរួមជាលើកទី១នៅក្នុងវេទិកាសេដ្ឋកិច្ចពិភពលោកនៅក្រុងDavos
លោក Xi Jinping ប្រធានាធិបតីចិន បានអញ្ជើញទៅដល់ប្រទេសស៊្វីសកាលពីថ្ងៃអាទិត្យម្សិលមិញ ដើម្បីចូលរួមជាលើកទីមួយនៅក្នុងវេទិកាសេដ្ឋកិច្ចពិភពលោកនៅក្រុងដាវ៉ូសដែលចាប់បើកធ្វើនៅថ្ងៃអង្គារទី១៧មករាស្អែក។ នៅមុនថ្ងៃបើកទិវាសេដ្ឋកិច្ចពិភព ប្រធានាធិបតីចិន បានជួបសន្ទនាជាមួយថ្នាក់ដឹកនាំស្វីសអស់រយៈពេលពីរថ្ងៃ ពីព្រោះចិនគឺជាដៃគូពាណិជ្ជកម្មដ៏សំខាន់បំផុតរបស់ប្រទេសស៊្វីសនៅតំបន់អាស៊ី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៦
នៅមុនពេលចូលរួមក្នុងវេទិកាសេដ្ឋកិច្ចពិភពលោកនាក្រុងដាវ៉ូសប្រទេសស៊្វីស លោកប្រធានាធិបតីចិន Xi Jinping បានអញ្ជើញទៅកាន់ទីក្រុងLaussanne នៅទីស្នាក់ការនៃគណកម្មាធិការអូឡាំពិកអន្តរជាតិ។ ពីព្រោះប្រទេសចិននឹងត្រូវរៀបចំកីឡាអូឡាំពិកអន្តរៈជាតិនារដូវត្រជាក់នៅឆ្នាំ ២០២២។ លោក Xi Jinping បានអញ្ជើញទៅកាន់អង្គការសហប្រជាជាតិនៅទីក្រុងហ្សឺណែវផងដែរ ដើម្បីពង្រឹងវត្តមានរបស់ប្រទេសចិន នៅលើឆាកអន្តរជាតិ។
អមដំណើរដោយប្រធានសហគ្រាសគ្រាក់ៗរបស់ចិន លោក Xi Jinping មានបំណងច្បិចយកឱកាសដ៏សំខាន់នៅក្នុងអង្គប្រជុំនៅដាវ៉ូសនេះ ដើម្បីថ្លែងនូវសារថ្មីមួយរបស់លោកប្រកបដោយភាពម៉ឺងម៉ាត់ សារដែលអះអាងថា “ប្រទេសចិន មិនព្រួយបារម្ភអ្វីទេនៅលើបញ្ហាពាណិជ្ជកម្មសេរី។
ទន្ទឹមនេះ អាជ្ញាធរស៊្វីស បានចាត់វិធានការគ្រប់សព្វ ដើម្បីកុំឲ្យកើតមានឧប្បត្តិហេតុការទូតជាថ្មីដូចកាលពីជំនាន់ឆ្នាំ១៩៩៩។ ជំនាន់នោះ ប្រធានាធិបតីចិន លោក Jiang Zeming ត្រូវបានក្រុមបាតុករទីបេចំនួនដ៏ច្រើនដែលរស់នៅប្រទេសស៊្វីស នាំគ្នាស្រែកចំអកឲ្យលោក Jiang Zeming យ៉ាងសម្បើម។ ក៏ប៉ុន្តែ លើកនេះក៏មានជនទីបេមួយរូបដែរ ដែលប៉ុនប៉ងចង់ដុតសម្លាប់ខ្លួនឯងដើម្បីជាសញ្ញាប្រឆាំងចិន តែត្រូវបានប៉ូលីសស៊្វីសធ្វើអន្តរាគមន៍ទាន់។
រីឯបញ្ហាទឹកដីទីបេនិងសិទ្ធិមនុស្ស អាជ្ញាធរស៊្វីស ពុំបាននិយាយដោយផ្ទាល់ជាមួយលោកប្រធានាធិបតីចិនទេ ដើម្បីកុំឲ្យមានការល្អក់កករដល់ដំណើរទស្សនៈកិច្ចរបស់លោកនៅក្នុងប្រទេសស្វ៊ីស។
គឺជាលើកទីមួយដែរចាប់តាំងពី៤៦ឆ្នាំកន្លងមកហើយ ដែលទើបមានប្រធានាធិបតីចិនមួយរូបចូលរួមនៅក្នុងវេទិកាសេដ្ឋកិច្ចពិភពលោកនៅក្រុងដាវ៉ូសនៅថ្ងៃអង្គារទី១៧មករាស្អែកនេះ។
សូមបញ្ជាក់ថាអមដំណើរលោកប្រធានាធិបតី ស៊ីជីនពីង មានរូបលោក Jack Ma ស្ថាបនិកនៃក្រុមហ៊ុនយក្ខ Internet Alibaba និងលោក Wang Jianlin មហាសេដ្ឋីអ្នកមានខ្លាំងជាងគេបំផុតនៅក្នុងប្រទេសចិន។
គួររំលឹកថា សហគ្រិននានារបស់ចិន ធ្លាប់ត្រូវលោកដូណាល់ត្រាំ ប្រធានាធិបតីអាមេរិកដែលទើបនឹងជាប់ឆ្នោត ចោទប្រកាន់ថា ជាអ្នកលួចការងារអាមេរិក អស់រាប់លាន។
នៅពេលនេះ សហគ្រិនចិននឹងឆ្លៀតយកវេទិកាសេដ្ឋកិច្ចពិភពលោកនៅក្រុងដាវ៉ូស ដើម្បីការពារនូវគំនិតមួយបែបផ្សេងវិញ គឺគំនិត ដែលអាចនឹងធ្វើការបង្កើតការងារនៅក្នុងទូទាំងពិភពលោក រួមទាំងនៅក្នុងសហរដ្ឋអាមេរិកផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ