សិង្ហបុរីបន្តស្គាល់កំណើនសេដ្ឋកិច្ចថយចុះដោយទទួលបានតែ ១,៨% ក្នុងឆ្នាំ ២០១៦
នៅក្នុងប្រទេសសិង្ហបុរី រដ្ឋាភិបាលទើបបានផ្សព្វផ្សាយស្ថិតិស្តីពីស្ថានភាពសេដ្ឋកិច្ចក្នុងឆ្នាំ ២០១៦ កន្លងទៅ។ ស្ថិតបានឲ្យដឹងថា សិង្ហបុរីកំពុងបន្តស្គាល់កំណើនសេដ្ឋកិច្ចថយចុះដោយទទួលបានតែ ១,៨% ប៉ុណ្ណោះក្នុងឆ្នាំ ២០១៦។ បើគិតតាំងពីវិបត្តិហិរញ្ញវត្ថុពិភពលោកក្នុងឆ្នាំ ២០០៩ មក នេះជាអត្រាមួយដ៏ទាបដែលសិង្ហបុរីមិនធ្លាប់មានទេ។ មូលហេតុមកពីមានប្រទេសកាន់តែច្រើនក្នុងលោកបានចាត់វិធានការសេដ្ឋកិច្ចអាត្មានិយម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៤
អត្រាកំណើនសេដ្ឋកិច្ច ១,៨% ដែលសិង្ហបុរីទទួលបានក្នុងឆ្នាំ ២០១៦ ពិតជាដំណឹងល្អទៅវិញទេ ព្រោះថា ប្រទេសដែលមានសក្តានុពលសេដ្ឋកិច្ចនៅអាស៊ីអាគ្នេយ៍មួយនេះហៀបនឹងស្គាល់សេដ្ឋកិច្ចដើរថយក្រោយនាត្រីមាសទី៤ ក្នុងឆ្នាំ ២០១៦។ តែក្រុមអ្នកវិភាគបានមើលឃើញថា បើប្រទេសផ្សេងក្នុងលោកនៅបន្តអនុវត្តន៍វិធានការសេដ្ឋកិច្ចអាត្មានិយម ហើយបើធនាគារកណ្តាលអាមេរិកដំឡើងអត្រាការប្រាក់នាំមុខជាថ្មីនាពេលខាងមុខនោះ សិង្ហបុរីនឹងបន្តមានកំណើនសេដ្ឋកិច្ចតិចតួចដដែល។
ចំណាប់អារម្មណ៍របស់ក្រុមអ្នកវិភាគយ៉ាងដូចនេះក៏ត្រូវបានចែករំលែកដោយលោក Weiwen Ng អ្នកសេដ្ឋកិច្ចម្នាក់ធ្វើការនៅក្នុងធនាគារ ANZ ដែរ។ លោក Weiwen បានប្រដូចនយោបាយពាណិជ្ជកម្មដែលប្រទេសនីមួយៗបានអនុវត្តន៍ដើម្បីការពារប្រយោជន៍សេដ្ឋកិច្ចផ្ទាល់ខ្លួនទៅនឹងខ្យល់បញ្រ្ចាស់ទិសបោកបក់លើសេដ្ឋកិច្ចសិង្ហបុរីដែលបានពឹងផ្អែកសឹងតែទាំងស្រុងលើការនាំចេញ។
ក្រៅពីប្រទេសសិង្ហបុរី កំណើនចំណាត់ការសេដ្ឋកិច្ចគិតតែប្រយោជន៍ផ្ទាល់ខ្លួននៅក្នុងបណ្តាប្រទេសលោកខាងលិចក៏ជាប្រភពក្តីបារម្ភសម្រាប់សេដ្ឋកិច្ចនៅក្នុងបណ្តាប្រទេសអាស៊ីអាគ្នេយ៍ផ្សេងទៀតដែរ។ ក្នុងឆ្នាំ ២០១៥ អត្រាកំណើនសេដ្ឋកិច្ចនៅសិង្ហបុរីក៏មានកម្រិតក្រោម ២% ដែរ ហើយបើពិនិត្យមើលជារួមទៅឃើញថា បើស្ថានភាពសេដ្ឋកិច្ចពិភពលោកនៅបន្តម្ង៉ៃកាត់ ម្ង៉ៃកោរដូចសព្វថ្ងៃ នោះប្រទេសសិង្ហបុរីនឹងបន្តស្គាល់អត្រាកំណើនសេដ្ឋកិច្ចទាបជាបន្តទៀតនៅប៉ុន្មានឆ្នាំខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ