ចិនបញ្ជូនផ្កាយរណបសម្រាប់ ចាប់ដានឧស្ម័នកាបូនិកក្នុងបរិយាកាស
ចិន នៅថ្ងៃព្រហស្បតិ៍ទី២២ ធ្នូ ២០១៦ បានបាញ់បង្ហោះ ដោយជោគជ័យ ផ្កាយរណបដែលមាននាទីតាមដាន ត្រួតពិនិត្យការបញ្ចេញឧស្ម័នកាបូនិកទៅក្នុងបរិយាកាស។ តាមទីភ្នាក់ងារព័ត៌មានចិនថ្មី ចិនជាប្រទេសទី៣ ក្នុងលោក បន្ទាប់ពីអាមេរិក និងជប៉ុនដែលមានផ្កាយរណបសម្រាប់ចាប់សញ្ញាឧស្ម័នកាបូនិក ដែលគេបញ្ចេញទៅក្នុងបរិយាកាស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៥
តាមទីភ្នាក់ងារព័ត៌មានចិនថ្មី ផ្កាយរណបដែលចិនបាញ់បង្ហោះ នៅថ្ងៃព្រហស្បតិ៍នេះមានសមត្ថភាពចាប់បានប្រភពបញ្ចេញឧស្ម័នផ្ទះកញ្ចក់។ ព័ត៌មានផ្តល់ដោយផ្កាយរណបនឹងជួយឲ្យគេដឹងថា តើប្រទេសណាមួយ ដែលបានគោរព ឬមិនគោរពការសន្យារបស់ខ្លួន ក្នុងការកាត់បន្ថយការបញ្ចេញឧស្ម័នផ្ទះកញ្ចក់។
ចិន និងអាមេរិក ជាប្រទេសធំជាងគេដែលបញ្ចេញឧស្ម័នផ្ទះកញ្ចក់។ កាលពីខែកញ្ញាកន្លងទៅ ប្រទេសមហាអំណាចសេដ្ឋកិច្ចទាំងពីរបានយល់ព្រមផ្តល់សច្ចាប័នលើកិច្ចព្រមព្រៀងទីក្រុងប៉ារីសស្តីពីអាកាសធាតុ។ ទៅតាមកិច្ចព្រមព្រៀង ប្រទេសហត្ថលេខី ដូចជាចិនជាដើមបានសន្យាកាត់បន្ថយការបញ្ចេញឧស្ម័នផ្ទះកញ្ចក់ ដែលជាប្រភពឡើងកំដៅនៃភពផែនដី។
ដូច្នេះ ដោយបាញ់ បង្ហោះផ្កាយរណប សម្រាប់ចាប់ដានឧស្ម័នកាបូនិក ចិនចង់បង្ហាញថា ខ្លួនឲ្យតម្លៃខ្លាំងទៅលើកិច្ចព្រមព្រៀងទីក្រុងប៉ារីស ស្តីពីអាកាសធាតុ។ តាមទីភ្នាក់ងារព័ត៌មានចិនថ្មីវិញ លើកនេះ ចិនមិនត្រឹមមានមោទនភាពដែលមានផ្កាយរណបសម្រាប់ចាប់ដានឧស្ម័នកាបូនិក តែប៉ុណ្ណោះទេ ប៉ុន្តែ ចិនក៏នឹងមានទឹកមាត់ប្រៃ ដើម្បីចរចា ពីកម្រិតឧស្ម័នផ្ទះកញ្ចក់ដែលខ្លួនសន្យាកាត់បន្ថយ បើប្រៀបធៀបនឹងប្រទេសបញ្ចេញឧស្ម័នផ្ទះកញ្ចក់ផ្សេងទៀត។ និយាយបែបសាមញ្ញ គឺនៅពេលណាផ្កាយរណបចិនរកឃើញថា ប្រទេសណាមួយ មិនគោរពតាមសន្យា គឺនៅតែបញ្ចេញឧស្ម័នកាបូនិក ច្រើន នោះ ចិន ក៏នឹងមិនគោរពធ្វើតាម តែម្នាក់ឯង នោះដែរ។
ការប្រកាសរបស់ចិន ក្នុងការបញ្ចូនផ្កាយរណបតាមដានការបញ្ចេញឧស្ម័នកាបូនិក នៅក្នុងពិភពលោក ធ្វើឡើង នៅតែប៉ុន្មានថ្ងៃក្រោយ អនាគតប្រធានាធិបតីអាមេរិក លោកដូណាល់ ត្រាំ ដែលមានមិត្តភក្តិសុទ្ធសឹងជាមហាសេដ្ឋីប្រេង និងធ្យូងថ្ម ចង់សើរើ ដោយសារសង្ស័យថា កិច្ចព្រមព្រៀងស្តីពីអាកាសធាតុ គ្មានប្រសិទ្ធិភាព និងផ្ទុយទៅវិញ គឺមានតែទៅរឹតចង ចាប់ដៃអាមេរិកមិនឲ្យប្រើប្រភពធនធានធម្មជាតិរបស់ខ្លួន ដើម្បីជំរុញកំណើនសេដ្ឋកិច្ច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ