អ.ស.ប.អំពាវនាវឲ្យលោកស្រី អ៊ុងសាន ស៊ូជីអន្តរាគមនៅក្នុងវិបត្តជនជាតិភាគតិចរ៉ូហ៊ីងយ៉ា
ទីប្រឹក្សាពិសេសរបស់អ.ស.ប.ទទួលបន្ទុកបញ្ហាភូមា នៅក្នុងសេចក្តីជូនដំណឹងមួយចុះផ្សាយនៅថ្ងៃព្រហស្បតិ៍ម្សិលមិញពីទីក្រុងញូវយក លោក Vijay Nambiar បានអំពាវនាវសុំឲ្យលោកស្រី អ៊ុងសានស៊ូជី ជួយអន្តរាគមនៅលើវិបត្តិជនជាតិភាគតិចរ៉ូហ៊ីងយ៉ា។ ទីប្រឹក្សាពិសេសរបស់អ.ស.ប. ថែមទាំងបានអញ្ជើញលោកស្រី ស៊ូជីឲ្យចុះទៅមើលសភាពការណ៍ដោយផ្ទាល់ភ្នែកនៅតំបន់ពាយ័ព្យភូមាដែលនៅទីនោះ ជនជាតិរ៉ូហ៊ីងយ៉ា ត្រូវបានកងទ័ពភូមាធ្វើទុក្ខបុកម្នេញឥតល្ហែរ។
ចុះផ្សាយនៅថ្ងៃ៖
ស្តាប់ - ០២:២៤
នៅក្នុងវិបត្តិជនជាតិភាគតិចរ៉ូហ៊ីងយ៉ា ទីប្រឹក្សាពិសេសរបស់អ.ស.ប.ទទួលបន្ទុកបញ្ហាភូមា បានថ្លែងជាថ្មីម្តងទៀត ពីការខ្វល់ខ្វាយព្រួយបារម្ភរបស់លោកចំពោះស្ថានការណ៍នៅរដ្ឋRakhine ក្នុងប៉ែកពាយ័ព្យភូមា។ ក្នុងន័យនេះ លោក Vijay Nambiar បានអំពាវនាវសុំឲ្យលោកស្រី ស៊ូជីដែលជាជ័យលាភីរង្វាន់ណូបែលសន្តិភាពធ្វើអន្តរាគមដើម្បីបើកច្រកឲ្យក្រុមអង្គការមនុស្សធម៌នានា អាចចូលទៅជួយដល់សហគមន៍ជនជាតិភាគតិចរ៉ូហ៊ីងយ៉ានៅក្នុងប៉ែកពាយព្យភូមា។
មួយវិញទៀត បន្ទាប់ពីការវាយប្រហារពីសំណាក់ក្រុមប្រដាប់អាវុធនានា ប្រឆាំងទៅលើប៉ុស្តិប៉ូលីសភូមាជាច្រើនកន្លែងកាលពីដើមខែតុលាកន្លងទៅ កងទ័ពភូមា បានបើកការវាយប្រហារយោធាមួយក្នុងទ្រង់ទ្រាយដ៏ធំធេងនៅក្នុងតំបន់ ដែលអ្នកតំណាងអ.ស.ប.ប្រចាំប្រទេសបង់ក្លាដែសមួយរូប វាយតម្លៃថា”ជាយុទ្ធនាការបោសសំអាតជាតិពិន្ធុ”។
ពីព្រោះ យោធាភូមា បានវាយរុញច្រានជនជាតិរ៉ូហីងយ៉ាចំនួន ២ម៉ឺននាក់ ឲ្យរត់ភៀសខ្លួនចេញពីតំបន់សង្គ្រាមនិងរត់ទៅជ្រកកោននៅបឹងក្លាដែសប្រទេសជិតខាងភូមា។
ចំណែកជនភៀសខ្លួនរ៉ូហ៊ីងយ៉ាវិញ បាននិយាយរៀបរាប់ពី ទុក្ខវេទនារបស់ពួកគេនិង“អំពើឃោឃៅដែលកងទ័ពភូមា បានបង្កធ្វើឡើងប្រឆាំងទៅលើពួកគេ ដូចជាការចាប់រំលោភជាក្រុម ការធ្វើទារុណកម្ម ឃាតកម្មនិងការសម្លាប់រង្គាល ល និង ល។
នៅក្នុងការធ្វើទារុណកម្មប្រឆាំងទៅលើសហគមន៍ជាតិពិន្ធុរ៉ូហ៊ីងយ៉ា នាយករដ្ឋមន្រ្តី ប្រទេសម៉ាឡេស៊ី នៅចំពោះមុខបណ្តាជនប្រមាណ៥០០០នាក់ កាលពីថ្ងៃអាទិត្យមុន បានទាមទារឲ្យ លោកស្រីស៊ូជី ចាត់វិធានការដើម្បីកុំឲ្យមានអំពើប្រល័យពូជសាសន៍ទៅលើជនជាតិរ៉ូហ៊ីងយ៉ាតទៅមុខទៀត។
លោក Nafib Razak នាយករដ្ឋមន្ត្រី ម៉ាឡេស៊ី ថែមទាំងបរិហារថាសហគមន៍អន្តរជាតិ នៅស្ងាត់ស្ងៀមគ្មានបញ្ចេញសកម្មភាពអ្វីសោះនៅក្នុងការទប់ស្ងាត់អំពើប្រល័យពូជសាសន៍លើជនជាតិរ៉ូហ៊ីងយ៉ា។ មិនតែប៉ុណ្ណោះ នាយករដ្ឋមន្ត្រីម៉ាឡេស៊ី ថែមទាំងនិយាយដៀមដាមដាក់ផ្លែឲ្យលោកស្រី ស៊ូជីដែរថា “តើពានរង្វាន់ណូបែលសន្តិភាពរបស់លោកស្រី ស៊ូជីនោះ វាបានប្រយោជន៍ស្អីទៅ ?”។
គួររំលឹកថា សហគមន៍ជនជាតិភាគតិចរ៉ូហ៊ីងយ៉ា គឺប្រជាជនអត់ស្រុកទេសនិងត្រូវបានប្រជាជនភូមាចាត់ទុកជាមនុស្សក្រៅស្រុក ទោះបីជាពួកគេបានរស់នៅក្នុងប្រទេសភូមាអស់រយៈពេលជាច្រើនជំនាន់ក្តី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ